Roma 2 - Muna Southern Dialect

Kahukumuno Lahataꞌala 2:1-16

¹ Dadiꞌanomo hintimiu manusia, laꞌae bhahaa hintu itu sampe foꞌala manusia bhaimu? Ane foꞌala mie bhaimu, gahaꞌaitu podiumu pedamo dua andoa, ingka bhotusi dua wutomu! Sampe miinamo bhe tingkunoa potunduꞌao wutomua.

² Ingka dopandeꞌaaneomu, ane Lahataꞌala nebhotusi mie mehabuno sabhaha kaꞌala saꞌituini, kabhotusino noꞌadhili.

³ Hintimiu manusia humabuno dua peda habundo mie nefoꞌalamiu itu, bhahaa kunaꞌemiu lumapaomu ne kahukumuno Lahataꞌala?

⁴ Mepandaaneomu gahaꞌa kataano lalono Lahataꞌala pontalabhi-labhino, kakosabahano bhe kakowaweno lalono ne hintimiu? Miina mandeꞌaanemoomu bhahaa putae kataano lalono Lahataꞌala nokopatudhu namatokoomu so metompaꞌao dhosamiu maka dumoliomu ne Lahataꞌala?

⁵ Tamaka hampano katuꞌano fotumiu bhe mokiidoomu metompaꞌao dhosamiu, ingka metapi-tapimoomu kabhieno kahukumu so netahimamiu, nahumato oleono Lahataꞌala namekakoꞌula amahano bhe namondawu kabhotusino umadhilino.

⁶ Kapaꞌamo Lahataꞌala namaꞌao manusia seemie-seemie naposahataa bhe habuno.

⁷ Namaꞌao dadi suhue dhamani ne mie kumampuu-mpuuno humabu metaano hampano deꞌondofi dadi tapa binasano, dadi kumalabhia bhe dadi tifosibhala.

⁸ Tamaka mie mosibhalano kaowu wutono, tapa meangkano ne kabanara bhe tanoangka-angkamo modaiꞌano, andoa daeꞌawa amahano bhe kahukumuno Lahataꞌala.

⁹ Sasuka mie humabu modaino nakumangkanaida kasabha bhe kakadee-dee, natumanda ne miendo Yahudi, bhe bansano liwu sigaoꞌano dua.

¹⁰ Tamaka sasuka mie humabu metaano daeꞌawa kakalabhia, kafosibhala bhe katohopono dadi maiꞌao ne Lahataꞌala, natumanda ne miendo Yahudi, bhe bansano liwu sigaoꞌano dua.

¹¹ Kapaꞌamo Lahataꞌala miina napoꞌala-alaꞌanda manusia.

¹² Bansano liwu sigaoꞌano tapa mandeꞌaono tubhono agama Yahudi tibuhino weo Kitabi, ane dokodhosa nabhotusida Lahataꞌala dabinasa, tamaka kabhotusi anaꞌa paise naengkoha ne tubhono agama Yahudi. Tamaka sabhaha mie mandeꞌaono tubhono agama Yahudi maitu, ane dokodhosa tetewei nabhotusida Lahataꞌala naengkoha ne tubhono agama aitu.

¹³ Kapaꞌamo suano mie metingkeno tubhono agama Yahudi banarano te wiseno Lahataꞌala, tamaka mie dhumalangino tubhono agama maitu so netahimano Lahataꞌala peda mie banara.

¹⁴ Tubhono agama Yahudi miina damandeꞌaanea bansano liwu sigaoꞌano. Ampamo kaowu ane habundo nomaiꞌao weo totono lalondo nopokantibha bhe tubhono agama Yahudi, ingka nokomaꞌana totono lalondo nembalimo tubhono agama so andoa, mahinggamo sakotuꞌuno miina damandeꞌao tubhono agama Yahudi.

¹⁵ Ne podiundo notiwohamo putae pahintano tubhono agama Yahudi notibuhimo weo totono lalondo. Totono lalondo kumatanga-tangano nembalimo dua bukutii, sigaꞌa nofoꞌalada, sigaꞌa nofokantibhada fekihindo.

¹⁶ Nadamo aini so kumadhadhiaꞌano nahumato oleono Lahataꞌala nabhotusi sabhaha tifebuniꞌano weo totono lalondo manusia, namangka ne Yesus Kristus. Aini noposahataamo bhe Bhihita Metaa nefosampeku itu.

Miendo Yahudi bhe tubhono agama Yahudi 2:17-29

¹⁷ Hintimiu mabhino wutomiu miendo Yahudi, ingka pasandeomu ne tubhono agama Yahudi bhe sangke-sangke wutomiu hampano hintimiu umatino Lahataꞌala.

¹⁸ Kapoindalono Lahataꞌala pandeꞌaanemoomu, pandeꞌaanemoomu dua poꞌalaꞌaoꞌomu metaaꞌano bhe modaiꞌano, kapaꞌamo dofoinaꞌukoomu maiꞌao ne tubhono agama Yahudi.

¹⁹ Hintimiu parasaeaꞌomu mpuu membalimoomu mie metondano kabunto, membalimoomu dua kantalea so mie meateno weo kahohondo.

²⁰ Hintimiu mefoinaꞌuomu mie mobhoheno, mefoguhuomu manaꞌino, hampano tubhono agama Yahudi netahimamiu nosangkaꞌaomo sabhaha kapande bhe kabanara.

²¹ Dadiꞌanomo hintu mefoinaꞌuno mie bhaimu, noafa gahaꞌa miina moinaꞌuꞌao bhe wutomu? Hintu fotangahino pae daosibua, noafa bhahaa wutomu mosibuꞌao?

²² Hintu fofoguhuno pae damonsulea, noafa wutomu monsuleꞌao? Bansieꞌomu desombai barahala, noafa gahaꞌa merampasiꞌaoꞌomu sabhaha bara weo lambu katisombaiꞌano barahala maitu?

²³ Hintimiu sangke-sangke wutomiu hampano tahimaeꞌomu tubhono agama Yahudi, noafa gahaꞌa fekandidikiomu Lahataꞌala hampano miina mangkafiomu pahintano itu?

²⁴ Aini noposahataa bhe tibuhino weo Kitabi peda ini, “Dhohono hintimiu ⸤ miendo Yahudi⸥ neano Lahataꞌala dofekaꞌaebue sabhaha bansano liwu.”

²⁵ Kasuna daanumo nokofahalaa, sumanomo dhalangieꞌomu tubhono agama Yahudi; tamaka ane pae dhumalangieꞌomu miina sepaliꞌa bhe fahalaanoa, tapototomoomu bhe mie pata nesuna.

²⁶ Ane seemie suano Yahudi tapa nesuna nodadi noangkafi pahintano agama Yahudi, ingka Lahataꞌala noabhiemo dua mie nesuna.

²⁷ Ane nada itu, mie tapa nesuna tamaka dhumalangino tubhono agama Yahudi tetewei damoꞌalakoomu. Kapaꞌamo hintimiu miendo Yahudi tahimaemoomu kasuna bhe tubhono agama tibuhino, gahaꞌaitu kangkalaꞌieꞌomu.

²⁸ Miendo Yahudi sakotuꞌuno, suano mie meangkafino sabhaha kaneando Yahudi; pedamo dua mie nesuna sakotuꞌuno, suano kaowu kasunano mbadha doangkafi kaneando Yahudi.

²⁹ Tamaka miendo Yahudi sakotuꞌuno, miina natiwoha ne mbadhano, tamaka ne totono lalono. Pedamo dua kasuna sakotuꞌuno, suano kasunano mbadha doangkafi tubho tibuhino, tamaka kasunano totono lalo nehabuno Rohino Lahataꞌala. Mie pedando aitu naetahima kapudhi maiꞌao ne Lahataꞌala, suano maiꞌao ne manusia.