Roma 16 - Muna Southern Dialect

Kapakatuno salam 16:1-16

¹ Naetaa amohatokoomu, bhahitientoomu Febe ini seemie hobhine tiparasaeano, anoamo ini umondofaono umati te Kengkrea.

² Tahima metaaꞌeomu weo neano Ompu, hampano ingka pedamo aitu mantasiꞌano mie marasaeano dopotahi-tahima. Tulumieꞌomu ane nefaraluu katulumi o ae maka dua, kapaꞌamo anoa itu nobhahimo netulumi mie, bhemo dua idi.

³ Fosampe kanauꞌomu salam ne Priskila bhe Akwila, posabhangkaꞌaku weo kahadhaa so Kristus Yesus.

⁴ Andoa itu padamo dopotahoꞌao inawando so idi, notumpu sepaliꞌa laloku ne andoa. Bhahamoa suano kaowu idi motumpu lalo ne andoa, tamaka kosasawindo umati suano Yahudi.

⁵ Fosampe kanauꞌomu dua salam ne umati humompuno we lambudo. Fosampe kanauꞌomu dua salam ne Epenetus, bhahitie nemoasiꞌaoku; anoamo itu kabhao-bhaono marasaeano ne Kristus we kadieno Asia.

⁶ Salam dua so Maria, kumahadhaa mobhieno so hintimiu.

⁷ Salam so Andronikus bhe Yunias, miendo Yahudi medano dua idi. Padamo dua dotitohongku poowa bhe idi. Dotilentu rasuluꞌi tiangkano, dopaꞌindulu doparasaea andoa ne Kristus bhe idi.

⁸ Salam so Ampliatus, nemoasiꞌaoku weo Ompu.

⁹ Salam so Urbanus, posabhangkaꞌaku weo kahadhaa so Kristus, bhe dua so Stakis, bhahitie nemoasiaꞌaoku.

¹⁰ Salam so Apeles, anoa padamo doꞌudhie maka nokobukutiimo kamatangkano kaparasaeano ne Kristus. Salam dua so mie weo polambuno Aristobulus.

¹¹ Salam so Herodion, saliwuku miendo Yahudi. Salam dua so mie marasaeano ne Ompu weo polambuno Narkisus.

¹² Salam so Trifena bhe Trifosa, hobhineꞌi aini dokahadhaa mobhie doꞌondofao Ompu. Salam dua so Persis nemoasiꞌaoku, hobhine aini nokahadhaa mobhie dua noꞌondofao Ompu.

¹³ Salam so Rufus, mie tipudhino weo kahadhaa so Ompu, bhe salam dua so inano, anoa ini akonaemo dua inaku.

¹⁴ Salam so Asinkritus, Flegon, Hermes, Patrobas, Hermas, bhe kosasawindo bhahitie poowa-owano bhe andoa.

¹⁵ Salam so Filologus bhe Yulia, Nereus bhe finihobhineno, bhe Olimpas, bhe kosasawindo umati marasaeano poowa-owano bhe andoa.

¹⁶ Pofea-feabhaomu bhe pomoni-moniniꞌaoꞌomu peda bhahitie pomoa-moasiꞌaono. Kosasawindo umatino Kristus ⸤ ne ini⸥ dopakatuangkoomu dua salam.

Katangahi kapuliaono 16:17-24

¹⁷ Bhahitieꞌiku, aesalo mpuu posiꞌondoomu ne mie meowano powengkeꞌa weo umati bhe kakodhosaꞌando mie marasaeano. Aitu nopoꞌala bhe kafoinaꞌu toka netahimamiu. Dadiꞌanomo gampiandaomu.

¹⁸ Kapaꞌamo mie pedando itu miina dameompu ne Kristus, Ompuntoomu, tamaka dofeompu kaowu ne iꞌino handado. Pugaundo nokesa, wambado nomeko, tamaka debhohe-bhoheꞌi kaowu mie kaangka-angkano.

¹⁹ Sabhaha mie dofetingkeemo bhihitano meangkaomu mpuu ⸤ ne Kristus⸥ , dadiꞌanomo nowulaangkoomu sepaliꞌa laloku. Gaoku mpuu mandeꞌaaneomu metaaꞌano, monggelaomu ne modaiꞌano.

²⁰ Lahataꞌala kamaiꞌaoꞌano katohopono dadi, napikifolongko Kafeompuꞌando seetani ne wawono aꞌemiu bhe namobinasae. Sio-siomo kabarakatino Yesus Ompuntoomu sadhia napobhaiangkoomu.

²¹ Salam maiꞌao ne Timotius, posabhangkaꞌaku weo kahadhaa, bhe Lukius, Yason bhe Sosipater, sanea saliwuku miendo Yahudi.

²² Salam dua weo neano Ompu maiꞌao ne idi Tertius, buhinomo suha aini.

²³ Salam dua nomaiꞌao ne Gayus. Anoamo ini motiampe kanau bhe kosasawindo umati. Salam dua nomaiꞌao ne Erastus, mintahano dhoino kota, bhe Kwartus bhahitientoomu.

²⁴ [Sio-siomo kabarakatino Yesus Kristus Ompuntoomu sadhia napobhaiangkoomu! Amin.]

Kasongkono suha 16:25-27

²⁵ Notifekakalabhia mpuu Lahataꞌala! Anoamo kokuasano namekatangka kaparasaeamiu, naposahataa bhe Bhihita Metaa nefoleleku, bhihitano Yesus Kristus. Bhihita anaꞌa ingka o bhihitano patudhuno Lahataꞌala tifebuniꞌano ntini moꞌo-moꞌonono taꞌu.

²⁶ Tamaka ampa aitu, nopoangkafi bhe pahintano Lahataꞌala dumadino suhue dhamani, patudhuno ini dofekantaleaꞌiemo bhe bhihitano padamo dofolelee ne sabhaha bansano liwu, noangka ne nebuhi weo Kitabindo ana-anabii, neanomo kosasawindo damarasaea bhe daeangka ne Lahataꞌala.

²⁷ Anoamo Lahataꞌala Kaseemie-mieꞌano, foliuno kakotimbangi. Nopantasi mpuu namangka ne Yesus Kristus sadhia damekakalabhiaꞌe, ampa suhue dhamani! Amin.