Roma 15 - Muna Southern Dialect

Fekaꞌia mie bhaimu koise wutomu 15:1-6

¹ Intaodiomu motangkano kaparasaea tabeano dakosabaha ne bhahitieꞌi monaleno kaparasaea bhe datumulumida. Koise doꞌondofi kaowu so kaoꞌiaꞌano wutontoomu.

² Ondofi kaitaomu seemie-seemie so kaoꞌiaꞌano mie bhainto, so kaetaaꞌano, somo dua kafekatangkano kaparasaeano.

³ Kapaꞌamo Kristus miina dua namekihi kaoꞌiaꞌano Wutono. Weo Kitabi notibuhi ⸤ wambano Kristus ne Lahataꞌala⸥ , “Sabhaha wamba kafekaꞌaebu nefolimbando so Hintu nokangkanaimo Idi.”

⁴ Hampano bhahi-bhahiꞌae tibuhino weo Kitabi endefiꞌini, ingka saneamo so kafoinaꞌuntoomu, neanomo namangka ne kafoinaꞌuno Kitabi dakosabaha dapotaami bhe natilawesi lalontoomu. Ane nada anaꞌa kaposahunaꞌaontoomu ne Lahataꞌala sedhuluꞌa dua kamatangkano.

⁵ Sio-siomo Lahataꞌala fowaꞌaono kakosabaha dapotaami bhe kalawesino lalo ne manusia, natumulumikoomu dumadi weo kaseꞌise, noposahataa bhe kapoindalono Yesus Kristus.

⁶ Ane nada naꞌa, ingka sekakolalomoomu membaliomu sesuaha mefoampeomu kapudhi ne Lahataꞌala, Amano Ompuntoomu Yesus Kristus.

Bhihita Metaa so bansano liwu suano Yahudi 15:7-13

⁷ Dadiꞌanomo potahi-tahimaomu, pedamo dua Kristus notahima kaita so damekakalabhiaꞌao Lahataꞌala.

⁸ Amohatokoomu, Kristus padamo nembali mie umondofaono miendo Yahudi, so notiwohaꞌao kabanarano Lahataꞌala putae dhandino ne awuaꞌintoomu tetewei nakoꞌula.

⁹ Kanandooꞌanomo dua peda amaitu, neanomo sabhaha bansano liwu sigaoꞌano damekakalabhia Lahataꞌala hampano rahamatino netahimando. Aini noposahataa bhe tibuhino weo Kitabi peda aini, “Hampano anaꞌa amudhiko ne olotando sabhaha bansano liwu, aelagu amekalabhia neamu.”

¹⁰ Nandoo dua notibuhi peda aini, “Hintimiu sabhaha bansano liwu, moꞌiaꞌomu poowa-owaomu bhe umatino Lahataꞌala tipilino!”

¹¹ Nandoo dua peda aini, “Hintimiu sabhaha bansano liwu, pudhiomu Ompu! Kosasawimiu mie te dhunia ini, fekakalabhiaꞌomu Lahataꞌala!”

¹² Peda dua ini nekosuahaꞌaono anabii Yesaya, “Namaiꞌao ne sampuꞌano Isai natiumba tunasino, tunasi aini namehe namintaha pahinta ne sabhaha bansano liwu. Anoamo dua so tumpuꞌano posahunaꞌaondo sabhaha bansano liwu.”

¹³ Sio-siomo Lahataꞌala kaengkohaꞌano posahunaꞌaomiu, nakumabhintiangkoomu kawulano lalo bhe katohopono dadi hampano kaparasaeamiu, neanomo weo kuasano Rohino Lahataꞌala nasedhuluꞌa dua kabhalano posahunaꞌaomiu.

Tingkuno katibuhiꞌano suha aini 15:14-21

¹⁴ Bhahitieꞌiku! Idi ini aparasaeakoomu mpuu nobhahi sepaliꞌa metaaꞌano ne hintimiu, sabhaha kapande nefaraluumiu nonandoomo dua sampe nembalimo potanga-tangahiomu.

¹⁵ Ampamo kaowu akakadoi wutoku aebuhiangkoomu sehonda haa honda kafeꞌulai weo suhaku ini, hampano ainimo taka kaꞌondofaoku newaꞌaono Lahataꞌala.

¹⁶ Takaku ini ingka aembali mie umondofaono Kristus Yesus ne olotando sabhaha bansano liwu suano Yahudi. Aembalimo kanggetu seemie imamu meowano Bhihita Metaa maiꞌaono ne Lahataꞌala, neanomo sabhaha bansano liwu daembali kanggetu kapopanga titahimano ne Lahataꞌala bhe nefekangkilono Rohino Lahataꞌala.

¹⁷ Dadiꞌanomo weo kaseꞌiseku bhe Kristus Yesus nowose bhakeku nembali adhalangi takaku ini so Lahataꞌala.

¹⁸ Miina aokado apugauꞌao kahadhaa sigaoꞌano, mpahinomo nekahadhaano Kristus noangka ne idi. Kahadhaa nepulaoꞌaoku naꞌa aeato bansano liwu suano Yahudi daeangka ne Lahataꞌala. Kahadhaa aini noangka ne wambaku bhe habuku,

¹⁹ noangka dua ne tanda-tanda tapa mentela bhe giu timenteꞌaono, saneamo hampano kuasano Rohino Lahataꞌala. Hampanomo kuasa anaꞌa kaliliꞌaku aefolele Bhihita Metaano Kristus ne amai maka dua, notanda we Yerusalem ampa te kadieno Ilirikum.

²⁰ Patudhukumo sehonda-hondano kaomponano ini, aefolele Bhihita Metaa ne liwu-liwu tapaꞌo metingkeno neano Kristus, keana dokona kanau aefongkoha lambu ne sandi toka nefongkohando bhaindo.

²¹ Aini nopoangkafi bhe tibuhino weo Kitabi, “Mie tapaꞌo sepaliꞌa metingkeno leleno, damohae; mie tapaꞌo metingkeno suahano, dalumosangie.”

Patudhuno Paulus nakumala we Roma 15:22-33

²² Kanandooꞌanomo taꞌampamo aitu sadhia bhe kapaleiku amai we hintimiu.

²³ Tamaka ampa aitu, hampano takaku ne kadie aini nopalusimo bhe ntini taꞌu-taꞌumo nokamba laloku apoꞌawa bhe hintimiu,

²⁴ maka patudhuku weo kala-kalaku ahumope we Spanyol, naembali amangka apoꞌawaangkoomu. Mahingga nasebantaha kaowu, natisangke dua laloku dapoꞌawa-awaomu, mada anaꞌa naembali tumulumi kanauꞌomu amopansuhu kala-kalaku ne watu.

²⁵ Tamaka aitu nandoo akumala kadeki te Yerusalem akoniowa so umati marasaeano ne watu.

²⁶ Kapaꞌamo umati we Makedonia bhe Akaya dosekabhotumo daefoꞌonu dhoi so datumulumiꞌao umati mokaeno we Yerusalem.

²⁷ Andoa dosekabhotumo weo kahelasino lalondo, ingka daanumo nopantasimo datumulumi mie mokae we Yerusalem. Kapaꞌamo ane pae miendo Yahudi, mie suano Yahudi paise daeala dawu ne sabhaha kabarakatino Lahataꞌala. Dadiꞌanomo ingka nopantasimo dua mie suano Yahudi daꞌumondofao miendo Yahudi weo kafaraluuno dadi we dhunia ini.

²⁸ Mada kaowu adhumalangi takaku ini bhe kawaꞌao nefoꞌonundo datumahimaemo we Yerusalem, akumala we Spanyol amangka we kotamiu.

²⁹ Apandeꞌaane humato amai apoꞌawaangkoomu, teteweimo aeowaangkoomu kabarakatino Kristus pontalabhi-labhino.

³⁰ Bhe Ompuntoomu Yesus Kristus, bhe kanini kaasino Rohino Lahataꞌala, aesalo mpuu ne hintimiu dapoowa-owaomu bhe idi dasumambaheaꞌomu sampuu-mpuuno lalo ne Lahataꞌala so idi.

³¹ Sambahea kanauꞌomu sio-siomo Lahataꞌala namolapa kanau maiꞌao ne limando mie tapa marasaeano we Yudea. Sambahea kanauꞌomu dua sio-siomo sabhaha taka kaꞌondofaoku we Yerusalem datumahima metaaꞌe umati marasaeano ne watu.

³² Mada anaꞌa, ane napoangkafi bhe kapoindalono Lahataꞌala, amai we hintimiu weo kawulano lalo, maka amewule bhe natilawesi laloku apobhaiangkoomu.

³³ Sio-siomo Lahataꞌala kamaiꞌaoꞌano katohopono dadi napobhaiangkoomu. Amin.