Roma 14 - Muna Southern Dialect

Koise foꞌala bhahitiemu 14:1-12

¹ Tahimadaomu metaa-metaa bhahitieꞌi pata motangkano kaparasaea, koise foꞌalada ane poꞌalaomu fekihi.

² Nandoo marasaeano putae nembali dohumaa sabhaha tihumaaꞌano, tamaka nandoo dua pata motangkano kaparasaea tadohumaa kaowu hunsau.

³ Momaano sabhahadamo koe nopisaki mie pata momaano, tamaka mie tapa momaano koe dua nofoꞌala mie momaano, kapaꞌamo mie aitu ingka notahimaemo dua Lahataꞌala.

⁴ Patudhumu laꞌae bhahaa hintu itu sampe mokado bhitahaki bhatuano Ompu? Kataano bhe kadaino kahadhaano ingka neatemo ne kafeompuꞌano. Bhatua aitu sadaa-daa kataano kahadhaano hampano wutono Ompu nokokuasa natumulumie.

⁵ Nandoo mie kofekihino putae bhe oleo mongkilo, nopoꞌala bhe oleo sigaoꞌano, tamaka nandoo dua kofekihino kosasawiꞌae oleo tanopototomo. Seemie-seemie tabeano namarasaea mpuu putae fekihino maitu nobanara.

⁶ Mie mefosibhalano oleo peta nahumabua hampano somo dua namosibhalaꞌao Ompu. Pedamo dua momaano sabhahadamo, ingka nohabu peda anaꞌa somo namosibhalaꞌao Ompu, hampano nefoampe katumpuno lalo ne Lahataꞌala. Mie momaano kaowu hunsau, peta nahumabua hampano so namosibhalaꞌao dua Ompu, kapaꞌamo nefoampe dua katumpuno lalo ne Lahataꞌala.

⁷ Intaodiomu ini, bhe naseemie miina bhe dumadino so wutono, bhe naseemie miina dua bhe mateno so wutono.

⁸ Ane dodadi ingka dodadiomu so Ompu, ane domate ingka domateomu so Ompu. Dadiꞌanomo dodadi tawa domate intaodiomu fehebuaꞌano Ompu.

⁹ Kapaꞌamo ingka anaꞌaemo kamateꞌano bhe kawanuꞌano Kristus, neanomo naembali Ompundo mie dumadi bhe mie mate.

¹⁰ Tamaka hintu itu, noafa bhahaa foꞌalaꞌao bhahitiemu? Noafa pisakiꞌao bhahitiemu? Kapaꞌamo kosasawintoomu saneamo damewise ne kaengkohaꞌa kafobhitahakiꞌano Lahataꞌala.

¹¹ Hampano notibuhi weo Kitabi peda aini, “Bhoasaono Ompu ⸤ bhe nofemata⸥ , ‘Bhe dadiku wutoku, kosasawindo mie dasumudhu datumaohao sombado ne wiseku, sabhaha mie daꞌumakui kanau Idimo Lahataꞌala.’ ”

¹² Pedamo anaꞌa intaodiomu seemie-seemie dapowiseꞌao wutonto sabhaha nehabunto ne Lahataꞌala.

Koise mehabu kakodhosaꞌando bhahitiemu 14:13-23

¹³ Dadiꞌanomo koemo dopofoꞌa-foꞌalaomu! Tamaka fekaꞌonu lalomiu koise mehabuomu so katitunoꞌa tawa so kaondawuꞌando bhahitieꞌimiu weo dhosa.

¹⁴ Weo kaseꞌiseku bhe Ompu Yesus, apandeꞌaane bhe aparasaea mpuu miina bhe oti moharamuꞌano nomaiꞌao ne oti aitu. Ampamo kaowu ane nandoo mie mefoharamuno oti, ingka oti anaꞌa daanumo noharamu so anoa.

¹⁵ Tamaka ane fekalea lalono bhahitiemu mbaꞌinomo nehumaamu, ingka habumu itu nopotagali bhe kanini kaasi. Koe dai-dai mie bhaimu dhohono oti nehumaamu, ingka Kristus padamo nomate dua so mie aitu.

¹⁶ Metaaꞌano weo fekihimiu, koise undaomu dakumonae mie bhaimiu nodai.

¹⁷ Kapaꞌamo ane dopugauꞌao Kafopahintaꞌano Lahataꞌala, ingka miina damugauꞌao oti nehumaa bhe nefohoꞌu. Maraluuꞌano mpuu weo Kafopahintaꞌano Lahataꞌala o manusia damangkafi kapoindalono Lahataꞌala, katohopono dadi bhe kawulano lalo maiꞌao ne Rohino Lahataꞌala.

¹⁸ Mie meompuno ne Kristus peda amaitu, anoamo itu mekaꞌiano lalono Lahataꞌala bhe nefosibhalando mie bhaino.

¹⁹ Dadiꞌanomo ulei kaitaomu lalontoomu daꞌumondofi dhalano kapometaa, bhe kofahalaaꞌano so dapofeka-fekatangkaꞌao kaparasaea.

²⁰ Koise dai-dai kahadhaano Lahataꞌala hampano oti nehumaamu. Sabhaha oti daanumo sanea membaliꞌano dohumaaꞌe, tamaka ane nehumaamu nembali kakodhosaꞌando mie bhaimu ingka moꞌalamo.

²¹ Naetaa koemo humaa dagi bhe fohoꞌu angguru tawa sigaoꞌano dua, ane habumu naꞌa naembali kakodhosaꞌano bhahitieꞌimu.

²² Fintahakimo fekihi aini weo totono lalomu, wutomu bhe Lahataꞌala kaowu mandeꞌaanea. Nokodawua mie tapa mabhino wutono nokokaꞌala hampano weo fekihino ingka noangkafi metaaꞌano.

²³ Tamaka mie poibhahano naomaa bhe paise naomaa, gahaꞌa panda-pandano tanohumaamo, ingka namoꞌalae Lahataꞌala hampano habuno miina naengkoha ne kaparasaeano. Sabhaha habu pata mengkohano ne kaparasaea saneamo dhosa.