Roma 13 - Muna Southern Dialect

Deangka ne pamarinta 13:1-7

¹ Seemie-seemie tabeano datumuhu ne pamarinta kokuasano, kapaꞌamo miina bhe pamarinta tapa mealano kapooli ne Lahataꞌala. Sabhaha pamarinta ndumandooꞌano nosangkeda Lahataꞌala.

² Dadiꞌanomo ane doewangi pamarinta ingka doewangimo netubhono Lahataꞌala, maka sasuka humabuno peda naꞌa naeowa kahukumu so wutono.

³ Ane dohabu metaa tantumo miina namaraluua daoteꞌi ne pamarintaa, ingka mpahinomo humabu modaino. Poindaloomu bhahaa weo dadimiu pae moteꞌiomu ne pamarinta? Ia habu metaaꞌomu, ingka tetewei damudhikoomu pamarinta.

⁴ O pamarinta ingka palima-limano Lahataꞌala so kaetaaꞌamiu. Tamaka ane humabu modaiꞌomu, moteꞌidaomu, hampano miina nasumia-siaꞌa dokokuasa dafohukumu. O pamarinta ingka o palima-lima bhoosiꞌaono Lahataꞌala defondawu kahukumu ne mie modai.

⁵ Kanandooꞌanomo intaodiomu nofaraluu datumuhu ne pamarinta, suano kaowu mbaꞌinomo dokiido daeꞌawa kahukumu, tamaka hampano doangkafi dua totono lalo kumatanga-tangano.

⁶ Ainiꞌaemo dua tingkuno sampe tanduaꞌaoꞌomu sewa, hampano o pamarinta palima-lima meompuno ne Lahataꞌala, mpuu-mpuunino takando maitu.

⁷ Dadiꞌanomo tanduaꞌaneomu sabhaha maraluuꞌano so netanduaꞌao ne laꞌae maka dua. Tanduaꞌao sewa ne kohakuno metahimano sewa, tanduaꞌao dua sabhaha ulano sewa sigaoꞌano ne kohakuno tumahimae. Mihikidaomu mie maraluuꞌano nemihiki, fosibhaladaomu mie maraluuꞌano nefosibhala.

Kanini kaasi kafosangkano tubhono agama Yahudi 13:8-14

⁸ Koise nompona kodosaomu ne mie bhaimiu, ampamo kaowu dosa sehondano ini: pomoa-moasiꞌaoꞌomu. Sasuka moasiꞌaono mie bhaino ingka nodhalangiemo bhahi-bhahiꞌae tubhono agama Yahudi.

⁹ Kapaꞌamo bhahi-bhahiꞌae pahinta weo tubhono agama Yahudi: koe monsule, koe fopongko, koe mosibu, koe mekapoindalo pata membalino hakumu, bhe sabhaha pahinta sigaoꞌano, ingka noꞌonumo ne bhoasao sehondano ini, “Moasiꞌao mie bhaimu peda kaasimu ne wutomu.”

¹⁰ Mie moasiꞌaono mie bhaino teteweimo paise nahumabu modai ne mie aitu. Dadiꞌanomo ane doasiꞌao mie bhaindo, ingka nosangkamo dodhalangi sabhaha tubhono agama.

¹¹ Aini tetewei dhumalangieꞌomu, hampano ingka pandeꞌaanemoomu koeateno dhamani aini. Ingka nohatomo tempono manuomu ne kaodomiu, kapaꞌamo ampa aitu oleo so katifosalamatiꞌantoomu sedhuluꞌamo dua kakomaꞌo bhe pakaparasaeantoomu.

¹² Nobhalamo nekundono alo, nomaꞌomo kamentae. Dadiꞌanomo hunsa kaitaeꞌomu podiuno kahohondo, fokana kaitaomu katokano habu metaa so nehabu ne mentaleaꞌano.

¹³ Dadi kaitaomu mantasiꞌano peda mie meateno we mentaleaꞌano. Koe sakahame dohumaa dofohoꞌu bhe dololanu, koe dopokawite-wite bhe konafusuu modai, koe dopowengke-wengke bhe dopokondu-konduaꞌao lalo.

¹⁴ Fokanaomu Ompu Yesus Kristus ne ulumiu tapedamo pakea buꞌou ⸤ maꞌanano membaliomu peda wutono Kristus⸥ , koe folalesaea mbadhamiu so namangkafiꞌao sabhaha kapoindalono.