Roma 12 - Muna Southern Dialect

Dembali kapopanga dumadino 12:1-8

¹ Dadiꞌanomo bhahitieꞌiku, hampano kataano lalono Lahataꞌala, aesalo mpuu ne hintimiu, owaomu mbadhamiu peda kapopanga dumadino, mongkilono bhe mekaꞌiano lalono Lahataꞌala. Nadamo aini tabeano kofeompumiu sakotuꞌuno ne Lahataꞌala.

² Koemo mesandahaomu ne sabhaha podiu bhe kaneano dhunia ini, tamaka hunsaꞌanomo Lahataꞌala namahabuꞌouni fekihimiu sampe natibhalii dadimiu. Ane nadamo anaꞌa mandeꞌaaneomu medano ae kapoindalono Lahataꞌala: sabhaha podiu metaaꞌano, mekaꞌiano lalono bhe sumangkaꞌano.

³ Hampano kadawu neꞌawaku ne Lahataꞌala, amohatokoomu kosasawimiu itu: weo fekihimiu koise abhi wutomiu nalumiuꞌe bhe mantasiꞌano, tamaka fekihiomu saetaaꞌano, noposahataa bhe kabhalano kaparasaea nedawuꞌaono Lahataꞌala ne hintimiu seemie-seemie.

⁴ Mbadhantoomu seemie-seemie nobhahi katokano, maka sehonda-sehonda katoka bhe takano, miina napototo-totoa.

⁵ Pedamo dua intaodiomu, mahinggamo dobhahiomu, weo kaseꞌise bhe Kristus mbadhantoomu seꞌise kaowu. Intaodiomu ini seemie-seemie dopokai-kai dembali katokano mbadha seꞌiseno naꞌa.

⁶ Intaodiomu detahimamoomu kapooli seemie-seemie poꞌala-alano noposahataa bhe kadawu newaꞌaono Lahataꞌala. Dadiꞌanomo ane deꞌawa kapooli dakosuaha peda seemie anabii, tabeano dadhumalangie naposahataa bhe kaparasaeando.

⁷ Meꞌawano kapooli naꞌumondofao mie bhaindo, naetaa nafoꞌondofao. Meꞌawano kapooli nafofoguhu, naetaa nafofoguhu.

⁸ Meꞌawano kapooli nafotangahi, naetaa nafotangahi. Meꞌawano kapooli so nadumawu-dawuꞌao kanandoono ne mie bhaino, naetaa nahumabue weo kahelasino lalo. Meꞌawano kapooli naembali neangka, naetaa naꞌumulei lalono nadhumalangie. Meꞌawano kapooli so metulumino mie weo kasabha, naetaa nadhumalangie weo kawulano lalo.

Katangahi so dadumadiꞌao weo kanini kaasi 12:9-21

⁹ Kamoasiꞌaomiu ne mie bhaimiu tabeano nahelasi. Fekakodoꞌo wutomiu ne modaiꞌano, fintaha ne metaaꞌano.

¹⁰ Mpuu-mpuunieꞌomu pomoni-pominiꞌao peda mie sibhahi-bhahitieno; fosibhalaomu mie bhaimiu nalumiuꞌe kafosibhala ne wutomiu.

¹¹ Fekakokosoomu kahadhaaꞌomu, koise mantawaomua! Naetaa nakamai-mai totono lalomiu ondofaoꞌomu Ompu.

¹² Fowula lalomiu hampano bhe neposahunaꞌaomiu, kosabaha potaamiomu weo kasabha, mpuu-mpuunieꞌomu sambaheamiu!

¹³ Tulumidaomu bhahitie marasaeano mokaeno! Fotiampedaomu mie bhaimu mengkalalono!

¹⁴ Ane bhe mie modee-deekoomu, mesaloandaomu kabarakatino Lahataꞌala; barakatidaomu, koise bhatataꞌiandaomua.

¹⁵ Fowula lalomiu bhe mie mowulano lalo, moꞌaeꞌomu bhe mie moꞌaeno.

¹⁶ Pometa-metaaꞌomu, koise nelangke diumiu tamaka posabhangkaomu bhe mie mepandano kaengkohaꞌa, koise abhi wutomiu mie mande!

¹⁷ Kadai koise bhoosiane kadai. Sabhaha habu metaaꞌano ne pomatando mie, habueꞌomu.

¹⁸ Uleiꞌe lalomiu ampa nepoo-poolimiu dadi pometaaꞌomu bhe kosasawindo mie.

¹⁹ Bhahitieꞌiku timoasiꞌaono! Koe sepaliꞌa bhoosiomu kaleano lalomiu, hunsaꞌanomo Lahataꞌala so fohukumuno. Kapaꞌamo notibuhi weo Kitabi, “Inodimo so bhoosiangko. Inodimo so fohukumuno, bhoasaono Ompu.”

²⁰ Ane kaewamu noꞌaho, waꞌane nohumaa! Ane nokekele wuꞌuno, waꞌane nofohoꞌu! Kapaꞌamo ane humabuomu peda naꞌa ingka tanaoambanoꞌaomo wutono.

²¹ Koise katahoomu wutomiu natumalokoomu modaiꞌano, tamaka modaiꞌano taloaneomu metaaꞌano!