Roma 11 - Muna Southern Dialect

Kabhilaꞌano miendo Israel tipilino 11:1-10

¹ Dadiꞌanomo ameena: bhahaa Lahataꞌala nokukundodamo umatino? Tantumo miina! Ingka idi ini miendo dua Israel, siwuluno Abraham, amaiꞌao ne sampuꞌano Benyamin.

² Lahataꞌala miina nakumukundo umatino toka nepilino mpini kabhao-bhaono. Miina mandeꞌaaneomua gahaꞌa tibuhino weo Kitabi wakutuuno anabii Elia nobhieꞌao miendo Israel ne Lahataꞌala?

³ Ambano anabii Elia, “Ompu, anabiimu dopadada dopongkoda, medha kapopanga so hintu dopadae dohunggae. Tamo idi dumadino tamaka ingka gaondo damala dua inawaku.”

⁴ Peda ae bhahaa katobhoosino Lahataꞌala ne anabii Elia? Ingka bhoasaono Lahataꞌala, “Nandoo aehunsa so wutoku dofitu hewu kabhahindo, tapaꞌo sepaliꞌa sumombaino dewa Baal.”

⁵ Pedamo dua haꞌoleo ini, nandoo seendai ⸤ miendo Yahudi⸥ kabhilaꞌano, andoamo ini nepilino Lahataꞌala hampano rahamatino.

⁶ Lahataꞌala nopilida mbaꞌinomo rahamatino, suano mbaꞌinomo habundo. Kapaꞌamo ane kapilino Lahataꞌala maitu naengkoha ne habundo manusia, ingka rahamatino Lahataꞌala suanomo rahamati sakotuꞌunoa.

⁷ Kaowu pedamo amai? Ingka neꞌondofindo miendo Israel miina daꞌumawaea, tamaka ⸤ seendaino⸥ tipilino doꞌawaemo. We simbalino mie tipilino maitu saneamo dembali katuꞌa fotu.

⁸ Aini noposahataa bhe tibuhino weo Kitabi, “Lahataꞌala nohabu fekihi bhe totono lalondo tapedamo mie moodono, bhe matando tamaka miina dafowohaa, bhe tingalando tamaka miina dafofetingkea, taꞌampamo haꞌoleo ini.”

⁹ Daud nokowamba dua ambano, “Heruane ae hame-hamendo nembaliꞌao tando bhe kampepe so wutondo, somo dua katiloleꞌando bhe katihukumuꞌando.

¹⁰ Heruane ae matando naohawu keana dofowoha, hunsaꞌanomo daobungkuꞌao kasabha ampa suhue dhamani.”

Miendo Israel dotituno, bansano liwu sigaoꞌano dosalamati 11:11-24

¹¹ Ameena dua: bhahaa katitunondo miendo Yahudi somo katiloleꞌando ⸤ maka paemo damoolia damanu⸥ ? Ingka paise. Tamaka dhosando miendo Yahudi neowamo kasalamati mbali bansano liwu suano Yahudi, somo kakonduaꞌano lalondo miendo Yahudi.

¹² Dadiꞌanomo dhosando miendo Yahudi neowamo kabarakati so dhunia ini, kakaeno ⸤ kaparasaeando⸥ neowamo kabarakati pontalabhi-labhino ne bansano liwu sigaoꞌano. Ane peda anaꞌa, ingka mangke-mangkemo sedhuluꞌa dua kataa, ane nasumangka kabhahindo miendo Yahudi so sumalamatino.

¹³ Apugau ne hintimiu, bansano liwu suano Yahudi! Hampano idi ini o rasulu so bansano liwu suano Yahudi, maka taka kaꞌondofaoku ini afosibhalae mpuu.

¹⁴ Patudhuku sio-siomo naembali amekakondua lalono saliwuꞌiku, neanomo nandumandoo dua seemie hodua so nefosalamatiku.

¹⁵ Kapaꞌamo sanginomo nokukundoda Lahataꞌala neowamo pometaano Lahataꞌala bhe dhunia ini, mangke-mangkemo ane natumahimada Lahataꞌala. Ingka tanapototomo bhe mie mate suli dodadi!

¹⁶ Ane deala seendai kadhalono tarigu so roti ⸤ nembali kapopanga so Lahataꞌala⸥ , ingka suano kaowu roti seendaino itu mongkilono tamaka kosasawiꞌae nongkilo. Pedamo dua aitu, ane o pahakano sau nongkilo, ingka tantumo haꞌaꞌino nongkilo dua.

¹⁷ Haꞌano puꞌuno zaitun sigaꞌa dolobhisiemo ⸤ aini apulaoꞌao miendo Yahudi⸥ , maka defopikaane tunano puꞌuno zaitun ngkahoku, aini apulaoꞌao hintimiu ⸤ mie suano Yahudi⸥ . Hintimiu tunano zaitun ngkahoku itu, ingka mepehapimoomu dua dadi menowu maiꞌao ne pahakano zaitun sakotuꞌuno.

¹⁸ Ampamo kaowu koise sangke-sangke wutomiu ne haꞌa tilobhisino naꞌa. Kapaꞌamo tandaiꞌeomu, suano haꞌa tumanggono pahaka, tamaka o pahaka tumanggono haꞌa.

¹⁹ Tamaka bheanea pugauꞌomu dua, “Ingka katilobhiꞌano haꞌano somo damopikaꞌao idi aembali tunano.”

²⁰ Uumbe, anoamo dua. Tamaka katilobhiꞌando mbaꞌinomo miina damarasaea, hintimiu kanandooꞌanomo pikaomu ne itu hampano kaparasaeamiu. Dadiꞌanomo koise nelangke diumiu, tamaka moteꞌiomu!

²¹ Kapaꞌamo ane Lahataꞌala miina naooloanea nolobhisi haꞌa mpuuno ⸤ maꞌanano miendo Yahudi⸥ , bhemo toha hintimiu itu, tetewei pae naooloangkoomu dua.

²² Ne ini dowohaemoomu kataano bhe kaꞌosano lalono Lahataꞌala. Lahataꞌala noꞌosa lalono ne mie mondawuno ⸤ maꞌanano pata marasaeano⸥ , tamaka netaa mpuu lalono ne hintimiu, sumanomo sadaa-daa dadiomu weo kataano lalono. Ane paise tetewei nalumobhikoomu dua.

²³ Ane ⸤ miendo Yahudi⸥ dahumunsa pata kaparasaeando, tetewei Lahataꞌala sumuli namopikada, hampano Lahataꞌala nokokuasa sumuli namopika haꞌa toka nelobhino.

²⁴ Hintimiu doalakoomu maiꞌao ne haꞌano zaitun ngkahoku, maka dofopikakoomu ne puꞌuno zaitun mpuuno, mahinggamo sakotuꞌuno nopoewangi bhe sifatimiu kabhao-bhaono. Ane pedamo anaꞌa, mangke-mangkemo haꞌano mpuu nelobhisi naꞌa, tetewei naembali sumuli namika ne puꞌuno, ingka kamaiꞌanomo!

Kasalamatindo miendo Israel 11:25-36

²⁵ Bhahitieꞌiku! Gaoku mpuu mandeꞌaaneomu patudhuno Lahataꞌala pataꞌo tipandeꞌaoꞌano, keana abhi wutomiu mie mande. Patudhuno Lahataꞌala peda aini: miendo Yahudi sigaꞌa dekatuꞌa fotu, tamaka katuꞌano fotu maitu nalumagi kaowu ampa kabhahindo mie suano Yahudi so maino ne Lahataꞌala nasumangkamo.

²⁶ Nadamo anaꞌa kosasawindo miendo Israel dasumalamati, noposahataa bhe tibuhino weo Kitabi peda aini, “Fosalamatino namaiꞌao te Sion; Anoa namogampi sabhaha podiu modai namaiꞌao ne sampuꞌano Yakub.

²⁷ Ainimo podhandiꞌaku bhe andoa, nahumato tempono aꞌumamponie sabhaha dhosando.”

²⁸ Hampano miendo Yahudi dokiido datumahima Bhihita Metaa, maka dembalimo kaewano Lahataꞌala. Aini nembalimo dawuamiu ⸤ mie suano Yahudi⸥ . Ampamo kaowu hampano padamo nopilida Lahataꞌala, miendo Yahudi sadaa-daaꞌe noasiaanda Lahataꞌala hampano ⸤ podhandino ne⸥ awuaꞌindo.

²⁹ Kapaꞌamo ane Lahataꞌala padamo nepili mie bhe nowaꞌanda kadawuno, pae bhe kapoolia nasumuli nabhalii kabhotusino.

³⁰ Endefiꞌini hintimiu meguuliomu ne Lahataꞌala, tamaka ampa aitu tahimamoomu rahamatino Lahataꞌala, hampano kameguulindo miendo Yahudi.

³¹ Pedamo dua miendo Yahudi maitu. Ampa aitu domeguuli ne Lahataꞌala neanomo namangka ne rahamati toka netahimamiu, andoa daetahima dua rahamatino Lahataꞌala.

³² Kapaꞌamo Lahataꞌala padamo nokalibu kosasawindo manusia weo kuhumano kameguulindo, somo dua naefosampuꞌao rahamatino ne kosasawindo manusia.

³³ Kabhalano kahangkaeano Lahataꞌala! Kalalesano timbangino bhe kandalono kapandeno! Miina mpuu natisonsoa sabhaha kabhotusino! Miina mpuu natilosangia sabhaha dhalano nokonihabu!

³⁴ ⸤ Weo Kitabi notibuhi peda aini,⸥ “Laꞌae bhahaa mandeꞌaono fekihino Ompu? Laꞌae bhahaa tumangahie?

³⁵ Nandoo bhahaa madano koniwaꞌaono ne Lahataꞌala maka tabeano namosuli kabhoosino?”

³⁶ Kapaꞌamo bhahi-bhahiꞌae nomaiꞌao ne Anoa, nonandoo hampano Anoa, bhe nasumuli dua ne Anoa. Notifosibhala mpuu Lahataꞌala ampa suhue dhamani! Amin.