Roma 10 - Muna Southern Dialect

¹ Bhahitieꞌiku! Kakampuu-mpuuno laloku gaoku saliwuꞌiku miendo Yahudi damosalamatida, sampe sadhia asambaheaꞌanda.

² Kapaꞌamo naembali amohatokoomu putae dokamai-mai lalondo dofeompu ne Lahataꞌala, ampamo kaowu miina damandeꞌaane peda amai dofeompu sakotuꞌuno ne Lahataꞌala.

³ Kapaꞌamo miina damandeꞌaanea peda amai dhalano Lahataꞌala nofotahima peda mie banara. Hampano gaondo damangkafi dhalando wutondo, sampe dokiido damangkafi kaangkaꞌa nelengkano Lahataꞌala so nafotahimaꞌao peda mie banara.

⁴ Kristus nofekakoꞌulamo kosasawiꞌae tubhono agama Yahudi, neanomo kotika marasaeano ne Anoa natumahimada Lahataꞌala peda mie banara.

Dosalamati mbaꞌinomo doparasaea 10:5-15

⁵ Anabii Musa nopulaoꞌao dhalano katitahimaꞌa ne Lahataꞌala peda mie banara mengkohano ne tubhono agama Yahudi. Notibuhi peda aini, “Mie dhumalangino tubhono agama ini nadumadiane.”

⁶ Tamaka katitahimaꞌa ne Lahataꞌala mengkohano ne kaparasaea notibuhi dua weo Kitabi peda aini, “Koise nokodukua lalomu, ‘Naetaa daeꞌondofi mie so monino te surugaa’, (patudhuno damosampu Kristus we dhunia).

⁷ Koise dua nokoduku lalomu, ‘Naetaa daeꞌondofi mie so sumampuno we dhuniando mie mate’, (patudhuno dasumangke Kristus maiꞌao ne mate).”

⁸ Tamaka ingka wambano Kitabi peda aini, “Bhoasaono Lahataꞌala nomaꞌo sepaliꞌa bhe hintimiu, neate ne wiwimiu bhe ne totono lalomiu.” Bhoasaomo aitu bhihitano kaparasaea nefosampe mani.

⁹ Ane ambamiu ne wiwimiu Yesus maitu o Ompu, bhe weo totono lalomiu parasaeaꞌomu putae Yesus nofowanue Lahataꞌala maiꞌao ne mate, ingka tetewei osumalamatiomu.

¹⁰ Kapaꞌamo manusia doparasaeaꞌao totono lalondo sampe notahimada Lahataꞌala peda mie banara, bhe dopugauꞌao wiwindo sampe dosalamati.

¹¹ Weo Kitabi notibuhi, “Kosasawindo marasaeano ne Anoa pae nandidiki lalondoa.”

¹² Kapaꞌamo miina bhe poꞌalaꞌano miendo Yahudi bhe bansano liwu sigaoꞌano. Lahataꞌala Kaseemie-mieꞌano, o Ompundomo kosasawindo manusia. Anoamo mefosampuno kabarakati pontalabhi-labhino ne mie metondalano.

¹³ ⸤ Notibuhi weo Kitabi⸥ , “Kosasawindo metondalano ne Lahataꞌala tetewei dasumalamati.”

¹⁴ Ampamo kaowu nada amai daetondala ne Lahataꞌala ane paeꞌo damarasaeaꞌe? Nada amai damarasaea ane paeꞌo dametingke bhihitano? Tamaka nada amai dametingke ane paeꞌo bhe mefoleleanda bhihita?

¹⁵ Nada amai dua daefolele bhihita ane pae bhe fotuduno dakumala? Noposahataa bhe tibuhino weo Kitabi peda aini, “Nokesa mpuu hatondo mie mefoleleno Bhihita Metaa.”

Tapa kaparasaeando miendo Israel 10:16-21

¹⁶ Tamaka miina kosasawindo miendo Israel dotahima Bhihita Metaa maitu. Anabii Yesaya nokowamba peda ini, “Ompu, nandoo bhahaa marasaeano bhihita neowa mani?”

¹⁷ Dadiꞌanomo o kaparasaea nengkoha ne pofetingke, maka kafetingkeꞌa bhihita, mbaꞌinomo bhe mie mefoleleno bhoasaono Kristus.

¹⁸ Ampamo kaowu ameena, bhahaa daanumo miinaꞌo dametingkea bhihita anaꞌa? Ingka tetewei padamo, hampano weo Kitabi notibuhi, “Suahando nokolelengamo ne kosedhuniaꞌae, pugaundo notifetingkemo ampa we tompano dhunia.”

¹⁹ Ameena toha, bhahaa daanumo miendo Israel miinaꞌo dalumosangie nefetingkendoa? Kafeenaku ini kabhao-bhaono notobhoosie anabii Musa peda aini, “Amekakonduaꞌe lalomiu ne bansano liwu suano umatiku, amoꞌamahakoomu ne bansano liwu kabhohe-bhoheno.”

²⁰ Sedhuluꞌa dua kakadono wambano anabii Yesaya, ⸤ Ambano Lahataꞌala⸥ , “Mie tapa umondofi kanau dopoꞌawa kanaumo, afotiwohamo wutoku ne mie tapa meenaꞌa kanau.”

²¹ Tamaka ambano dua anabii Yesaya nopulaoꞌao miendo Israel, ⸤ ambano Lahataꞌala⸥ “Sasuhue oleo limaku sansoho ⸤ aantagi sulindo⸥ mie tapa meangka bhe mansobhalono.”