Powoha 9 - Muna Southern Dialect

Duhulele kalima iseno 9:1-12

¹ Pada anaꞌa malaꞌekati kalidimano nobusomo duhuleleno, taꞌawohamo seꞌulu kulipopo toka mondawuno we dhunia. Kulipopo anaꞌa dowaꞌane kunsino ola tapa kotompano ⸤ kaeateꞌano mate⸥ .

² Fointono olano mate naꞌa nolengkae, lasao nobhombola gawu pasae nomaiꞌao ne kaehampuꞌa bhalano, sampe oleo bhe kosekaꞌewaꞌae lani nohohondo hampano gawu maiꞌaono weo ola anaꞌa.

³ Nomaiꞌao weo gawu naꞌa tambaꞌomo dopolua-lua kapunda dosampu we dhunia. Kapunda aini dowaꞌanda kuasa kabeanga kuasano waꞌati-atikoho.

⁴ Kapunda andoa ini doꞌeleꞌaanda daedai-dai kahoku tawa kantisa tawa sabhaha puꞌuno sau, ampamo kaowu damekolea-leaꞌi manusia tapa mepakeno katandano Lahataꞌala ne kondaꞌindo.

⁵ Andoa miina daꞌumundaꞌaanda daepongko manusia, tamaka dasumikisaada kaowu nalima wula kaomponanoa. Kasikisaando kapunda anaꞌa peda kaleano kaꞌatiꞌano waꞌati-atikoho.

⁶ Wakutuu anaꞌa manusia daeꞌondofi mate, tamaka pae dapoꞌawaanea; gaondo damatemo, tamaka mate namileianda.

⁷ Katundo kapunda andoa naꞌa pasaꞌida adhaha nefontaa-ntaa so popahisaꞌa. Te fotundo bhe songkondo, wohaꞌano peda songko bulawano omputo, ulando nokatu manusia.

⁸ Wulundo pasae wuluno fotundo hobhine, wangkando peda wangkando singa.

⁹ Mbadhando dodapohie tapedamo bhadhu uti, depano panindo pasae kantawuno kareta nehelano adhaha dolumpa weo popahisaꞌa.

¹⁰ Lensindo bhe tifundo pasae waꞌati-atikoho, ne lensindo naꞌa nandoo kuasa so dasumikisaaꞌao manusia nalima wula kaomponano.

¹¹ Kafeompuꞌa mahintangida o malaꞌekati tungguno ola pata kotompano. Neano ne wamba Ibrani dokonae Abadon, ne wamba Yunani dokonae Apolion ⸤ maꞌanano Fobinasano⸥ .

¹² Balaa kabhao-bhaono nolalomo, tadua nahaa ise balaa so humatono.

Duhulele kanomo iseno 9:13-21

¹³ Malaꞌekati kanonoono nobusomo dua duhuleleno. Taꞌafetingkemo dua suaha nomaiꞌao ne kofatoꞌonuꞌae sikuano medha bulawa kaetunuꞌa dupa ne wiseno Lahataꞌala.

¹⁴ Suaha anaꞌa nopugau ne malaꞌekati kanonoono meintahano duhulele maitu ambano, “Lenseda kopopaando malaꞌekati titapuno we umele bhalano Efrat.”

¹⁵ Malaꞌekati popaano naꞌa dolensedamo, andoa ini dofontaa-ntaada somo dhamuno, oleono, wulano bhe taꞌumo anaꞌa, so damongkoꞌao sekatolu dawuꞌa manusia.

¹⁶ Afetingke dua kabhahindo tantara sumawino ne adhaha naꞌa, dohaa fulu hewu lasa.

¹⁷ Weo powohaku ini, awohamo adhaha bhe mie sumawikida peda aini: andoa debhadhu uti, waranaano kadea peda efi, kakanda peda nila bhe kakuni peda waleha. Fotuno adhaha pasaꞌida fotuno singa, nomaiꞌao ne wobhando nolimba efi, gawu bhe soano waleha.

¹⁸ Sekatolu dawuꞌa manusia dotipongkoꞌao balaa tolu hondano ini, oefi, o gawu bhe waleha lumimbano ne wobhando adhaha naꞌa.

¹⁹ Kapaꞌamo kuasando adhaha naꞌa neate ne wobhando bhe ne lensindo, hampano lensindo tapedamo ule kofotuno, fotumo aini fosikisaano.

²⁰ Tamaka manusia sigaoꞌano tapa tipongkoꞌano ne balaa maitu, miina dua dametompaꞌao kahadhaa modai nehabuno limando. Andoa miina datumiehea desombai rohi modai, bhe sabhaha barahala maiꞌao ne bulawa, salaka, tambaga, kontu bhe sau, tapa fowohano, tapa fofetingkeno bhe tapa mekala-kalano.

²¹ Andoa miina dua dametompaꞌao podiundo dofopongko, dofowuhake, dopokawite-wite bhe dosoꞌo.