Powoha 8 - Muna Southern Dialect

Kafulutino kitabi kafitu iseno 8:1-5

¹ Wakutuuno Anano Dhumba nolengka kafuluti kafitu iseno, tanosimolinoꞌamo te surugaa napesetanga dhamu kaomponano.

² Taꞌawohamo dua malaꞌekati pipituno meehe-eheno te wiseno Lahataꞌala, dowaꞌanda duhulele bhalano fitu pele.

³ Tanohatomo dua seemie malaꞌekati neehe-ehe ne wiseno medha kaetunuꞌa dupa neintaha kaenteiꞌano dupa maiꞌao ne bulawa. Anoa dowaꞌane dupa nobhahi sepaliꞌa so namoampe naposaloane bhe sambaheando kosasawindo umati mongkilono. Bhahi-bhahiꞌae naꞌa namoampee te wawono medha bulawa ne wiseno kaengkohaꞌa kumalabhiano.

⁴ Gawuno dupa posaloꞌano bhe sambaheando umati mongkilo maitu tanokatowo-towomo maiꞌao ne limano malaꞌekati ampa ne wiseno Lahataꞌala.

⁵ Pada aitu malaꞌekati naꞌa noalamo kaenteiꞌano dupa, nofosingiꞌiane efi maiꞌao ne medha kaetunuꞌa dupa naꞌa maka noꞌohoe we dhunia. Lasao nokonduuha guntu, nokopisibhela, nokobhibhito noangkafie lualino wite.

Duhulele fato peleno kabhao-bhaono 8:6-13

⁶ Malaꞌekati pipituno mintahano duhulele fitu peleno maitu domantaa-ntaamo dabuso duhulelendo.

⁷ Malaꞌekati kabhao-bhaono nobuso duhuleleno maka nosampumo use ngkobhatu, oefi noposalo bhe hea, kosasawiꞌae naꞌa doꞌohoe we dhunia. Sekatolu dawuꞌa dhunia notitawu, pedamo dua itu sekatolu dawuꞌa sabhaha puꞌuno sau nongampu, bhe sabhaha kahoku moꞌuhino nopuli notihampuni.

⁸ Pada aitu malaꞌekati kahoduano nobusomo duhuleleno, tanonandoomo dua peda seꞌonu kabhawo bhalano hende-hendeꞌano doꞌohoe we teꞌi, maka sekatolu dawuꞌa teꞌi lasao nembali hea.

⁹ Sekatolu dawuꞌa mahaluku dumadino weo teꞌi domate bhe sekatolu dawuꞌa kapala nopuli nohansuru.

¹⁰ Malaꞌekati katotoluno nobusomo dua duhuleleno, tambaꞌomu nomaiꞌao te lani nondawumo seꞌulu kulipopo bhalano hende-hendeꞌano pasae kaꞌula, notabuhiki sekatolu dawuꞌa umele bhe matano oe we dhunia.

¹¹ Neano kulipopo anaꞌa Kapaꞌi. Sekatolu dawuꞌa oe nopaꞌi sampe dobhahi mie mateno hampano dofohoꞌu oe mopaꞌiꞌano naꞌa.

¹² Pada aitu malaꞌekati kapopaano nobusomo dua duhuleleno, maka notihambi sekatolu dawuꞌa oleo, sekatolu dawuꞌa wula bhe sekatolu dawuꞌa kulipopo sampe sekatolu dawuꞌa tilangano nohohondomo. Dadiꞌanomo sekatolu dawuꞌa ole-oleo miina naentaleaꞌa, sekatolu dawuꞌa kohondoꞌa sedhuluꞌa kahohondono.

¹³ Taꞌawohamo dua bhe afetingke seꞌulu bhoa nelola-lola te wuntano lani bhe nokotanga nohaaꞌi sepaliꞌa ambano, “Balaamoomu! Balaamoomu! Balaamo mpuu mie meateno we dhunia, ane natifetingkemo ndiino duhulelendo malaꞌekati totoluno tapaꞌo mebusono.”