Powoha 7 - Muna Southern Dialect

Moꞌono fato fulu fato hewu miendo Israel dokatandada 7:1-8

¹ Pada aitu awohamo malaꞌekati dopopaa deehe-ehe ne kofatosikuaꞌae dhunia maka dotaami kofatohondaꞌae kawea ne dhunia, keana bhe so miuno te wite, we teꞌi bhe ne puꞌuno sau.

² Awohamo dua malaꞌekati sigaoꞌano nomaiꞌao te mata oleo newowoꞌo kakatandano Lahataꞌala dumadino. Malaꞌekati anaꞌa nokei nofekahaa-haaꞌi ne malaꞌekati popaano meꞌawano kuasa dadumai-dai wite bhe teꞌi,

³ ambano, “Kadeki dai-daidaomu wite, teꞌi tawa puꞌuno sau ane palima-limano Lahataꞌalantoomu paeꞌo takumatandada ne kondaꞌindo.”

⁴ Afetingkemo kabhahindo mie nekatanda, domoꞌono fato fulu fato hewu maiꞌao ne sabhaha sampuꞌando Israel.

⁵ Nomaiꞌao ne sampuꞌano Yehuda doompulu haa hewu, nomaiꞌao ne sampuꞌano Ruben doompulu haa hewu, nomaiꞌao ne sampuꞌano Gad doompulu haa hewu,

⁶ nomaiꞌao ne sampuꞌano Asyer doompulu haa hewu, nomaiꞌao ne sampuꞌano Naftali doompulu haa hewu, nomaiꞌao ne sampuꞌano Manasye doompulu haa hewu,

⁷ nomaiꞌao ne sampuꞌano Simeon doompulu haa hewu, nomaiꞌao ne sampuꞌano Lewi doompulu haa hewu, nomaiꞌao ne sampuꞌano Isakar doompulu haa hewu,

⁸ nomaiꞌao ne sampuꞌano Zebulon doompulu haa hewu, nomaiꞌao ne sampuꞌano Yusuf doompulu haa hewu, bhe nomaiꞌao ne sampuꞌano Benyamin doompulu haa hewu.

Mie bhahi pata tilentuno kabhahindo 7:9-17

⁹ Pada amaitu awohamo kantawundo mie, miina natilentua kabhahindo. Andoa domaiꞌao ne sabhaha liwu, sabhaha sampuꞌa, sabhaha siwulu, bhe sabhaha wamba, deehe-ehe ne wiseno kaengkohaꞌa kumalabhiano bhe ne wiseno Anano Dhumba, depake dhuba kapute deintaha hoono potubu.

¹⁰ Dokei fekahaa-haaꞌi ambado, “Kasalamatintoomu nomaiꞌao ne Lahataꞌalantoomu mengkohano te kaengkohaꞌa kumalabhiano bhe nomaiꞌao ne Anano Dhumba.”

¹¹ Kosasawindo malaꞌekati deehe-ehe dolibu-libu kaengkohaꞌa kumalabhiano, kamungkulaꞌi, bhe mahaluku fato uluno maitu. Malaꞌekati andoa naꞌa dosudhu defodapa ne wiseno kaengkohaꞌa kumalabhiano maitu bhe dotaohao sombado ne Lahataꞌala.

¹² Dopugau ambado, “Amin! Sabhaha kapudhi, kakalabhia, kapande, katumpuno lalo, kafosibhala, kuasa bhe kaꞌosa so Lahataꞌalantoomu ampa suhue dhamani. Amin!”

¹³ Seemie maiꞌao ne olotando kamungkulaꞌi maitu nofeena kanau ambano, “Ndo laꞌae bhahaa mepakeno dhuba kapute maitu bhe domaiꞌao ne amai?”

¹⁴ Ambaku, “Waompu, ingka hintumo mandeꞌaane!” Maka nopugau toha ambano, “Andoa ini mie lumimbano maiꞌao ne tempono kasabha bhalano, dhubando padamo dotofae ampa nopute weo heano Anano Dhumba.

¹⁵ Dadiꞌanomo deehe-ehemo ne wiseno kaengkohaꞌa kumalabhiano Lahataꞌala bhe dofeompu ne Anoa mentae mohondo weo Lambuno Lahataꞌala. Mengkohano te kaengkohaꞌa kumalabhiano naꞌa napobhaianda bhe nakumaolumida.

¹⁶ Andoa paemo daoꞌahoa, paemo nakekele wuꞌundo, paemo nakumantibhada kasodono oleo.

¹⁷ Kapaꞌamo Anano Dhumba ne wunta-wuntano kaengkohaꞌa kumalabhiano maitu nadhumaganida bhe namatoda se matano oe meowano dadi. Wutono Lahataꞌala namusuli luundo namopada-padae.”