Powoha 6 - Muna Southern Dialect

Nomo ise kafuluti kabhao-bhaono dolengkae 6:1-17

¹ Pada amaitu awohamo Anano Dhumba nolengka kafuluti kabhao-bhaono maiꞌao ne kafuluti fitu iseno maitu, maka notifetingke suahano seꞌulu mahaluku maiꞌao ne mahaluku fato uluno naꞌa pasae guntu, ambano, “Maimo!”

² Taꞌawohamo seꞌulu adhaha kapute, mie sumawikie neintaha pana maka dowaꞌane songkono omputo. Anoa nokala peda seemie fotalono neꞌondofi kafotalo.

³ Wakutuuno Anano Dhumba nolengka kafuluti kahaa iseno, afetingkemo dua mahaluku kahaa uluno nopugau, ambano, “Maimo!”

⁴ Nodhulumo dua seꞌulu adhaha, wuluno kadea lalo moꞌito, mie sumawikie neꞌawa kuasa namala katohopono dadi maiꞌao we dhunia, neanomo manusia dapopongko-pongko. Anoa dowaꞌane kampue bhalano.

⁵ Wakutuu Anano Dhumba nolengka kafuluti katolu iseno, afetingkemo mahaluku katolu uluno nopugau, ambano, “Maimo!” Taꞌawohamo toha seꞌulu adhaha, o bholo, mie sumawikie neintaha kilo kaetimbangiꞌa.

⁶ Tadua afetingkemo pasae suaha maiꞌao ne olotando mahaluku fato uluno maitu, ambano, “Olino sebaa pae ponambo seꞌoleo, olino tolu baa kahitela ponambo dua seꞌoleo, ampamo kaowu o mina bhe angguru koise dai-daiꞌeomua.”

⁷ Wakutuuno Anano Dhumba nolengka kafuluti kafato iseno afetingkemo suahano mahaluku kafato uluno nopugau, ambano, “Maimo!”

⁸ Taꞌawohamo dua seꞌulu adhaha, wuluno nopupuda, mie sumawikie neano Mate, noangkafie dhuniano mate. Andoa dowaꞌanda kuasa ne sekafato dawuꞌa dhunia, miendo damongkoanda kampue, o gaba, o hopu bhe sabhaha kadadi fohumaano we dhunia.

⁹ Wakutuuno Anano Dhumba nolengka kafuluti kalima iseno, we pandano medha kaefoampeꞌa awohamo alusundo mie nepongko mbaꞌinomo doangkafi bhoasaono Lahataꞌala bhe dosakusiiꞌao kaparasaeando.

¹⁰ Andoa maitu dokei dofekahaa-haaꞌi ambado, “Hintu kafeompuꞌa mongkilono bhe banarano, tana seꞌae bhahaa kaomponano maka bhitahaki bhe bhoosiꞌao hea mani ne mie meateno we dhunia?”

¹¹ Andoa dowaꞌanda dhuba kapute setuwu seemie maka dopugauanda damewule tana sebantaha, ampa nakumapo kabhahino sabhangkaꞌindo weo kaꞌondofao bhe kabhahino bhahitieꞌindo, so nepongko peda dua andoa.

¹² Wakutuuno Anano Dhumba nolengka kafuluti kanomo iseno, taꞌawohamo nokadhadhiamo luali bhalano, oleo noꞌiꞌito pedamo kadu kaꞌito, o wula nodedea pedamo hea.

¹³ O kulipopo te lani nopondawuti we dhunia tapedamo katantano bhakeno foo ngkaamata nohundue kawea moꞌosa.

¹⁴ Pada aitu o lani nokuhu pasae kahatasi dolulue, sabhaha kabhawo bhe liwuto dogampi maiꞌao ne kaeateꞌando.

¹⁵ Omputo-omputono dhunia, kabha-kabhalaꞌi, neangkaꞌindo tantara, mie hangkaea, mie kokuasa, kosasawindo bhatua bhe mie bebasi doꞌuko weo lia bhe kasakaꞌindo kontu ne kabhawo.

¹⁶ Andoa dopugau ne kabhawo bhe ne kontu maitu ambado, “Tabuhiki kainsami! Febuni kainsami maiꞌao ne Mengkohano ne kaengkohaꞌa kumalabhiano bhe amahano Anano Dhumba maitu.

¹⁷ Kapaꞌamo nohatomo oleo bhalano kaꞌamahaꞌando, laꞌae bhahaa so potaamino?”