Powoha 5 - Muna Southern Dialect

Kaluluno kitabi bhe Anano Dhumba 4:1-11

¹ Pada anaꞌa awohamo selulu kitabi nointahaane suanano Mengkohano ne kaengkohaꞌa kumalabhiano maitu. Kaluluno kitabi anaꞌa nokokabuhi kohaawetaꞌae bhe dofulutiane bhindahi fitu kafuluti.

² Awohamo dua seemie malaꞌekati kokuasano maka nokei fekahaa-haaꞌi ambano, “Laꞌae bhahaa so mantasino lumengkano kaluluno kitabi aini bhe so malino kafulutino?”

³ Tamaka bhe naseemie miina bhe moolino, naetaa te surugaa, naetaa we dhunia, naetaa we pandano dhunia, so lumengkano kaluluno kitabi amaitu tawa moolino umondono weta we lalo.

⁴ Aoꞌae kaꞌosano kapeano laloku hampano miina bhe mantasino dalumengka kaluluno kitabi amaitu tawa daꞌumondo weta we lalo.

⁵ Pada anaꞌa nopugaumo seemie nomaiꞌao ne kamungkulaꞌi maitu ne idi, “Koise moꞌaea! Ondo itu! O singa maiꞌaono ne sampuꞌano Yehuda, tunasi bhalano omputo Daud, nofotalomo sampe nopooli nolengka kaluluno kitabi amaitu bhe kofitu iseꞌae kafulutino.”

⁶ Palusi amaitu awohamo dua ne wunta-wuntano kaengkohaꞌa kumalabhiano, dolibu-libue mahaluku fato uluno bhe kamungkulaꞌi maitu, neehe-ehe seꞌulu Anano Dhumba pasae padamo dosumbelee. Tanduno fitu pele, matano fitu onu, andoa maitu kofitu bansaꞌae Rohino Lahataꞌala netuduno dolili ne kosekaꞌewaꞌae dhunia.

⁷ Pada anaꞌa nodhulumo Anano Dhumba maitu maka notahima kaluluno kitabi aitu maiꞌao ne suanano Mengkohano ne kaengkohaꞌa kumalabhiano.

⁸ Sanotahima kaluluno kitabi amaitu, mahaluku fato uluno bhe kamungkula haa fulu popaano maitu dolongko dotaohao sombado ne wiseno Anano Dhumba naꞌa. Andoa sanea meintahano kusapi bhe mangko bulawa noponoꞌao dupa; aituꞌaemo sambaheando umati mongkilono.

⁹ Andoa delaguꞌao lagu buꞌou ambado, “Hintu nopantasi tahima kaluluno kitabi aitu bhe lumengka kafulutino, hampano Hintu padamo dosumbeleko, heamu padamo metolosiane manusia maiꞌao ne sabhaha sampuꞌa, sabhaha wamba, sabhaha siwulu bhe sabhaha bansano liwu so Lahataꞌala.

¹⁰ Hintu padamo habuda mbali bansano liwundo omputo bhe imamu meompuno ne Lahataꞌalantoomu, maka damahinta nada omputo te dhunia.”

¹¹ Pada amaitu awoha bhe afetingkemo dua suahano kantawundo malaꞌekati dolibu-libu kaengkohaꞌa kumalabhiano, mahaluku bhe kamungkulaꞌi maitu, kabhahindo ntini lasa-lasa, ntini hewu-hewu lasa.

¹² Suahando nohaaꞌi sepaliꞌa ambado, “Anano Dhumba nesumbele maitu nopantasi mpuu notahima kuasa, kahangkaea, kapande, kaꞌosa, kafosibhala, kakalabhia, bhe sabhaha kapudhi!”

¹³ Afetingkemo dua kosasawindo mahaluku te surugaa, we dhunia, we pandano dhunia bhe we teꞌi, tangkanomo sabhaha ndumandooꞌano weo alamu bhalano ini, delagu ambado, “Sabhaha kapudhi, kafosibhala, kakalabhia bhe kuasa ampa suhue dhamani so Mengkohano ne kaengkohaꞌa kumalabhiano bhe so Anano Dhumba!”

¹⁴ Mahaluku fato uluno maitu dotobhoosi, “Amin” bhe kamungkulaꞌi defodapa dotaohao sombado.