Powoha 4 - Muna Southern Dialect

Yohanes nokopowohaꞌao Lahataꞌala dosombaiꞌe te surugaa 4:1-11

¹ Palusi anaꞌa akopowohamo toha. Nandoo fointo te surugaa notilengka. Suaha nefetingkeku kabhao-bhaono, mugauno ne idi pasae ndiino duhulele bhalano, nopugaumo toha ambano, “Foni te ini, amosusuangko so tetewei kumadhadhiaꞌano mada kaowu.”

² Lasao nokabhinti kanau Rohino Lahataꞌala, gahaꞌa awohamo nandoo seꞌonu kaengkohaꞌano omputo kumalabhiano te surugaa. Kaengkohaꞌa maitu bhe Mengkohafie.

³ Mengkohano ne kaengkohaꞌa naꞌa wohaꞌano pasae kontu moinda moidho nekonando baidhuri bhe pirus. Nandoo dua toꞌue nokalibu kaengkohaꞌa naꞌa, nokotilanga wohaꞌano pasae kontu moinda moidho nekonando zamrud.

⁴ Dolibu-libu kaengkohaꞌa kumalabhiano naꞌa nandoo haa fulu fato onu kaengkohaꞌa kumalabhiano sigaoꞌano, dengkohafie dohaa fulu popaa kamungkulaꞌi. Pakeando sakapu-kapute, ne fotundo defokana songkono omputo maiꞌao ne bulawa.

⁵ Nomaiꞌao ne kaengkohaꞌa kumalabhiano naꞌa nokosilakamo bhibhito, pisibhela bhe guntu. Ne wiseno kaengkohaꞌa naꞌa nandoo fitu pele kaꞌula bhalano hende-hendeꞌano, andoamo maitu kofitu bansaꞌae Rohino Lahataꞌala.

⁶ Ne wiseno kaengkohaꞌa kumalabhiano naꞌa wohaꞌano nandoo bhe teꞌi peda paeasa bhalano, nohumaha pasae kristal. We wunta-wunta, dolibu-libu kaengkohaꞌa kumalabhiano naꞌa, bhe mahaluku dofato ulu, samata-mata te wisendo bhe we kundodo.

⁷ Mahaluku kabhao-bhaono pasae singa, mahaluku kahaa uluno pasae anano sapi moꞌane, mahaluku katolu uluno ulano nokatu mie, bhe mahaluku kafato uluno nokatu bhoa tangasano nolola.

⁸ Mahaluku fato uluno maitu sanea kopanino nomo pani seꞌulu, panindo samata-mata weta we lalo bhe we simbali. Ole-oleono koho-kohondoꞌano miina bhe kafeontoa delagu, “Nongkilo, nongkilo, nongkilo mpuu Ompu Lahataꞌala Fofoliuno Kuasa, toka ndumandoono, ndumandoono bhe so humatono.”

⁹ Taenomo mahaluku maitu defoampe lagu kapudhi, kafosibhala bhe katumpuno lalo ne Mengkohano te wawono kaengkohaꞌa kumalabhiano, dumadino ampa suhue dhamani naꞌa,

¹⁰ maka kamungkula haa fulu popaano naꞌa dosudhu defodapa ne wiseno Mengkohano te kaengkohaꞌa kumalabhiano maitu. Andoa dotaohao sombado ne Anoa dumadino ampa suhue dhamani naꞌa poowa dohunsa songko bulawando ne wiseno bhe dopugau ambado,

¹¹ “Ompu bhe Lahataꞌala mani, Hintu nopantasi tumahima sabhaha kapudhi, kafosibhala bhe kuasa, kapaꞌamo Hintumo mokonandoono sabhaha ndumandooꞌano; kosasawiꞌae maitu donandoo bhe dofokonandooda hampano kapoindalomu.”