Powoha 3 - Muna Southern Dialect

Kaowili so umati we Sardis 3:1-6

¹ “Buhie dua so malaꞌekatino umati we Sardis: pedamo aini kaowilino kofehebuaꞌaono kofitu bansaꞌae Rohino Lahataꞌala bhe fitu ulu kulipopo. Apandeꞌaane sabhaha kahadhaamiu, ambado hintimiu dadiomu, gahaꞌaitumo momateomu.

² Wanuꞌo toha, fekatangkae ndumandooꞌano tinangke miinaꞌo namate, kapaꞌamo apandeꞌaanemo miina bhe kahadhaamiu sumangkaꞌano ne wiseno Lahataꞌala.

³ Dadiꞌanomo tandaiꞌe kafoinaꞌu toka netahima bhe nefetingkemiu, angkafie bhe fetompaꞌao podiu modaimiu! Kapaꞌamo ane pae kodhagaomu, ahumato nada kasoꞌo, pae mandeꞌaaneomua tempono so kahatoꞌaku ne itu.

⁴ Tamaka we Sardis itu nandoo seemie hodua tapa pokahakuꞌaono pakeano; andoa ini daekala-kala dapoowa bhe Idi daepake pakea kapute, hampano andoa ini dopantasimo nada maitu.

⁵ Sasuka fotalono damopakeane pakea kapute pedando naꞌa; neando tibuhino weo Kitabino Mie Dumadi paemo amosaliea. Ne wiseno Amaku bhe ne wisendo dua malaꞌekatino, aꞌumakuida putae andoa maitu fehebuaꞌaku.

⁶ Kotingalano naetaa nametingke wambano Rohino Lahataꞌala ne tombudo umati.”

Kaowili so umati we Filadelfia 3:7-13

⁷ “Buhie dua so malaꞌekatino umati we Filadelfia: pedamo aini kaowili maiꞌao ne Mie Mongkilo, Mie Banara, mintahano kunsino Daud. Ane nelengka fointo, pae bhe so mooliea daꞌumontoe; pedamo dua ane neꞌonto fointo, pae bhe so mooliea dalumengkae.

⁸ Apandeꞌaane sabhaha kahadhaamiu. Ondo itu, ingka aelengkaangkomo fointo bhe naseemie pae bhe so mondoiꞌe dasumongkoe. Apandeꞌaangkoomu seendai kaowu kaꞌosamiu, tamaka angkafieꞌomu bhoasaoku bhe miina gumagaiꞌeomu neaku.

⁹ Tandaiꞌe! Ne itu nandoo mie kumonano wutondo miendo Yahudi, gahaꞌaitu suano, andoa dokopaha, sakotuꞌuno andoa maitu umatino Kafeompuꞌando seetani. Andoa naꞌa amowada damai se hintimiu, dalumongko te wisemiu maka damandeꞌaane putae hintimiu aoasiangkoomu.

¹⁰ Hampano angkafiomu pahintaku so kosabahaꞌaoꞌomu potaamiomu weo kasabha, maka Idi apobenteangkoomu nahumato tempono kasabha so kumangkanaino kosedhuniaꞌae ini. Ne tempo anaꞌa kosasawindo meateno we dhunia ini daꞌumudhida.

¹¹ Idi apikimaimo. Fintahakiomu toka netahimamiu, keana pae bhe mie so malano kawaꞌaondo fotalono so netahimamiu.

¹² Sasuka fotalono amoehee naembali kampana weo Lambuno Lahataꞌalaku bhe paemo sepaliꞌa nalumimba maiꞌao ne naꞌa. Ne mbadhano abuhiane neano Lahataꞌalaku bhe neano kotano Lahataꞌala nekonando Yerusalem buꞌou, sumampuꞌano maiꞌaono ne Lahataꞌala te surugaa, bhe abuhiane dua neaku buꞌouꞌano.

¹³ Kotingalano naetaa nametingke wambano Rohino Lahataꞌala ne tombudo umati.”

Kaowili so umati we Laodikia 3:14-22

¹⁴ “Buhie dua so malaꞌekatino umati we Laodikia: pedamo aini kaowili maiꞌaono ne koneaꞌano Amin, sakusii tiparasaeano bhe banarano, kamaiꞌaoꞌano sabhaha nefokonandoono Lahataꞌala.

¹⁵ Apandeꞌaane sabhaha kahadhaamiu, hintimiu miina mohindiomua, miina mosodoomua. Gaoku mpuu mohindiomu bhahaꞌi mosodoomu!

¹⁶ Mbaꞌinomo sapanangkukuꞌamiu, miina mohindiomu miina mosodoomu, tetewei alumuakoomu.

¹⁷ Ambamiu, ‘Idi ini ahangkaea, padamo afekahangkaea wutoku, miinamo akonikaea.’ Gahaꞌaitu miina mandeꞌaanea hintimiu itu mie ngkaasi-asi, mie timobhelaꞌaono lalo, mie mokae, mobuntono bhe melembino.

¹⁸ Dadiꞌanomo atangahikoomu meꞌoli bulawa toka nefekangkilo ne efi maiꞌao ne Idi neanomo humangkaeaꞌomu. Meꞌoli dua pakea kapute neanomo naembali makee keana notiwoha katilembimiu timoambanoꞌaono itu. Meꞌoli dua kaago so tumei ne matamiu neanomo fowohaomu.

¹⁹ Sasuka nemoasiꞌaoku atumangahie bhe ahumukumue; dadiꞌanomo fodadiomu lalomiu bhe fetompaꞌao podiu modaimiu.

²⁰ Ondo itu, aeehe-ehe ne wiseno fointo bhe afeabha. Ane bhe so metingkeno suahaku maka nalumengka kanau, Idi amesua apoꞌawaane maka aomaa apombali bhe anoa, anoa naomaa napombali bhe Idi.

²¹ Sasuka fotalono amongkohae te kaengkohaꞌaku kumalabhiano ⸤ so damahintaꞌao⸥ dapoowa bhe Idi, pedamo dua Idi padamo afotalo maka aengkoha apoowa-owa bhe Amaku te kaengkohaꞌano kumalabhiano.

²² Kotingalano naetaa nametingke wambano Rohino Lahataꞌala ne tombudo umati.”