Powoha 22 - Muna Southern Dialect

¹ Pada anaꞌa malaꞌekati amaitu nofosusu kanaumo umeleno oe meowano dadi. Umele maitu nomoinda tapedamo kristal, nomawa nomaiꞌao ne kaengkohaꞌano kumalabhiano Lahataꞌala bhe Anano Dhumba,

² noangka ne wuntano kabhongkano kota amaitu. Ne kohaawetaꞌae wiwino umele notumbu puꞌuno sau meowano dadi. Sau aitu nokobhake ompulu haa paku, sepaku sewula; hoono dopakee mbali kaefekaꞌuhiꞌa sabhaha bansano liwu.

³ Paemo bhe so nekantibhano bhatatano Lahataꞌala. Kaengkohaꞌa kumalabhiano Lahataꞌala bhe Anano Dhumba nandumandoo weo kota amaitu maka palima-limano dameompu ne Anoa.

⁴ Andoa daoha ulano Lahataꞌala bhe neano Lahataꞌala natibuhi ne kondaꞌindo.

⁵ Ne itu paemo bhe kohondoꞌa, paemo dua daefaraluu kantalea bhe tilangano oleo, kapaꞌamo Ompu Lahataꞌala somo mekantaleada. Andoa damahinta nada omputo ampa suhue dhamani.

Kahatoꞌano Ompu Yesus 22:6-17

⁶ Pada anaꞌa nopugaumo malaꞌekati amaitu ambano, “Sabhaha bhoasao aini notiparasaea bhe nobanara. Ompu Lahataꞌala maꞌaono Rohino ne ana-anabii, notudumo malaꞌekatino namotiwoha ne palima-limaꞌino o ae tetewei so kumadhadhiaꞌano mehimba.”

⁷ ⸤ Ambano Yesus⸥ “Tandaiꞌeomu! Apikimaimo. Dokodawua mpuu mie mangkafino sabhaha nekosuahaꞌaono anabii tibuhino weo kitabi aini.”

⁸ Idi, Yohanes, metingkeno bhe mohano kosasawiꞌae ini. Pada afetingke bhe awohae kosasawiꞌae ini, aefodapa ne aꞌeno ataohao sombaku ne malaꞌekati mada motiwoha kanau kosasawiꞌae maitu.

⁹ Tamaka anoa tanopugau ambano, “Koise nada itua! Idi ini palima-lima dua, nopototo bhe hintu bhe bhahitieꞌimu membalino ana-anabii bhe kosasawindo mie mangkafino sabhaha wambano kitabi aini. Taohao sombamu ne Lahataꞌala!”

¹⁰ Pada anaꞌa nopugau dua ambano, “Koe forahasiaꞌe sabhaha nekosuahaꞌaono anabii tibuhino weo kitabi aini, kapaꞌamo tempono nomaꞌomo.

¹¹ Mie humabu modaino, hunsaꞌanomo naehabu kansuhu modaiꞌano. Mie pokadengono, hunsaꞌanomo napokadengo kansuhu. Mie banara hunsaꞌanomo nahumabu kansuhu kabanara, bhe mie mongkilo hunsaꞌanomo namekangkilo kansuhu wutono.”

¹² ⸤ Ambano Yesus⸥ “Tandaiꞌeomu! Apikimaimo. Aewowoꞌo ponambo so manusia naposahataa bhe habundo seemie-seemie.

¹³ Idimo ini Alfa bhe Omega, Maꞌinduluno bhe Mbuhumaino, Kabhao-bhaono bhe Kafetompaino.

¹⁴ Dokodawua mpuu mie tumofano dhubando. Andoamo kohakuno daomaa bhakeno sau meowano dadi bhe dokohaku dua damesua damangka ne kagualino kota amaitu.

¹⁵ Tamaka sabhaha daꞌu, kowuhakeno, mie pokawite-witeno, mie fopongkono, mesombaino barahala bhe mie moindalono paha bhe kopahano, kosasawindo naꞌa daeate-ate we simbalino kota.

¹⁶ Idi Yesus, padamo atudu malaꞌekatiku ne hintimiu namohatoangkoomu kaowili aini so tombu-tombudo umati marasaeano. Idi ini tunasi bhalano omputo Daud, Kowine mentaleano.”

¹⁷ Rohino Lahataꞌala bhe loꞌia buꞌou hobhine maitu dopugau ambado, “Maimo!” Sasuka metingkeno naetaa napugau, “Maimo!” Sasuka mokekeleno wuꞌu naetaa namai, sasuka moindalono naetaa tanaealamo oe meowano dadi, pae nakoꞌolia.

Kasongkono kitabi 22:18-21

¹⁸ Ne sabhaha mie metingkeno suahano anabii tibuhino weo kitabi aini, idi ⸤ Yohanes⸥ aefeꞌulaiane, “Ane bhe mie so tumubhahino wamba tibuhino ini, Lahataꞌala natumubhahiane sabhaha balaa tibuhino weo kitabi aini.

¹⁹ Ane bhe mie so kumuhangino suahano anabii tibuhino weo kitabi aini, Lahataꞌala namala dawuno ne bhakeno sau meowano dadi bhe ne kota mongkilo, pedamo tibuhino weo kitabi aini.”

²⁰ Anoa fofohatoꞌaono bhihita aini nopugau ambano, “Uumbe, apikimaimo!” Amin, maimo Hintu Ompu Yesus!

²¹ Sio-siomo kabarakatino Ompu Yesus sadhia napobhaiangkoomu kosasawimiu! Amin.