Powoha 21 - Muna Southern Dialect

Lani bhe dhunia buꞌou 21:1-8

¹ Pada amaitu awohamo lani buꞌou bhe dhunia buꞌou, kapaꞌamo lani bhe dhunia kabhao-bhaono nopalusimo. O teꞌi nomiinaemo dua.

² Awohamo dua kota mongkilo, Yerusalem buꞌou, nosampu nomaiꞌao te surugaa, nomaiꞌao ne Lahataꞌala. Kota amaitu padamo dolegasie pasae loꞌia buꞌou hobhine napoꞌawaꞌao moꞌaneno.

³ Pada aitu afetingkemo suaha mohaaꞌi nomaiꞌao ne kaengkohaꞌano omputo ambano “Ondo kaitaomu! Aitu tenda kaeateꞌano Lahataꞌala nohatomo ne wunta-wuntando manusia, Anoa naeate napobhaianda. Manusia daembali umatino Lahataꞌala, wutono Lahataꞌala napobhaianda somo Lahataꞌalando.

⁴ Lahataꞌala namusuli luundo namopada-padae. O mate paemo nandumandooa, paemo dua bhe kaguguhu, kangkoꞌae tawa kakadee-dee, kapaꞌamo kosasawiꞌae ngkodauꞌano nopalusimo.”

⁵ Mengkohano te kaengkohaꞌano omputo nopugau ambano, “Kosasawiꞌae apahabuꞌounie!” Ambano dua, “Buhie, kapaꞌamo sabhaha bhoasao aini notiparasaea bhe nobanara!”

⁶ Nopugaumo dua ne idi, “Nopalusimo. Idimo ini Alfa bhe Omega, kabhao-bhaono bhe kafetompaino. Mie mokekeleno wuꞌu amefohoꞌutida maiꞌao ne matano oe meowano dadi, pae nakoꞌolia.

⁷ Sasuka fotalono natumahima kosasawiꞌae ini. Idi aembali Lahataꞌalano, anoa somo anaku.

⁸ Tamaka mie katehe, mie tapa marasaeano, mie timolampi, mie fopongkono, pokawite-witeno, kowuhakeno, mesombaino barahala bhe sabhaha mie kopahano, andoa maitu daꞌumawa dawundo weo efi ngkowaleha ngkalai-laino ne kantobha bhalano. Anoamo ini mate kahaa pakuno.”

Yerusalem buꞌou 21:9—22:6

⁹ Nomaimo seemie malaꞌekati nomaiꞌao ne malaꞌekati pipituno maitu. Malaꞌekati andoa ini meintahanomo mangko fitu wokano moponoꞌaono fitu honda balaa kafetompaino. Anoa nopugau ne idi ambano, “Mai se ini, amotiwohaangko loꞌia buꞌou, hobhineno Anano Dhumba.”

¹⁰ Pada anaꞌa nokabhinti kanau Rohino Lahataꞌala maka malaꞌekati maitu noowa kanau te wawono kabhawo bhalano bhe melangkeno. Ne itu nofotiwoha kanaumo kota mongkilo, kotano Yerusalem, sumampuꞌano maiꞌao te surugaa, maiꞌaono ne Lahataꞌala.

¹¹ Kota amaitu nentaleaꞌao kakalabhiano Lahataꞌala, tilangano tapedamo kontu moinda foliuno kakesa, tapedamo kontu baidhuri nohumaha pasae kristal.

¹² Benteno kota nobhala bhe nelangke, kagualino ompulu haa tibha. Setibha-setibha kaguali bhe malaꞌekatino, kabhahindo doompulu hodua. Ne kagualimo dua naꞌa notibuhi neando koompulu haa sampuꞌano miendo Israel.

¹³ Humanda mata oleo nandoo kaguali tolu tibha, humanda napa tolu tibha, humanda salata tolu tibha, humanda kansoopa tolu tibha.

¹⁴ Sandino benteno kota amaitu ompulu haa poi kontu bhalano, te wawono notibuhi neando koompulu hoduando rasuluno Anano Dhumba.

¹⁵ Malaꞌekati pugauno bhe idi maitu bhe katuko kaesukaꞌa maiꞌao ne bulawa mbali nosukapiꞌao kota amaitu, kagualino bhe benteno.

¹⁶ Kota amaitu dhadhuwali, kawantano bhe kaꞌewano nopototo. Malaꞌekati naꞌa nosukapi kota amaitu nopake katukono, haa hewu fato moꞌono kilo. Kawantano, kaꞌewano bhe kalangkeno tanopototomo.

¹⁷ Pada aitu nosukapimo benteno kota, ⸤ kakapano⸥ nomo fulu metere. Kasuka nepakeno malaꞌekati naꞌa nopototo bhe kasuka nepakendo manusia.

¹⁸ Benteno kota amaitu dohabue maiꞌao ne kontu moinda nekonando baidhuri, puuno kotano nomaiꞌao ne bulawa mpeꞌuhi, nomoinda peda paeasa.

¹⁹ Sandino benteno dolegasiane sabhaha kontu moinda. Sandi kabhao-bhaono nomaiꞌao ne kontu moinda moidho nekonando baidhuri; sandi kahaa onuno nomaiꞌao ne kontu moinda kakanda nekonando nilam; sandi katolu onuno nomaiꞌao ne kontu moinda pupuda nekonando yakut; sandi kafato onuno nomaiꞌao ne kontu moinda moidho nekonando zamrud.

²⁰ Sandi kalima onuno nomaiꞌao ne kontu moinda kadea nekonando unam; sandi kanomo onuno nomaiꞌao ne kontu moinda kadea nekonando dhalima; sandi kafitu onuno nomaiꞌao ne kontu bulawa nekonando ratna dhampaka; sandi kaalu onuno nomaiꞌao ne kontu moinda kakanda moidho nekonando pirus; sandi kasiua onuno nomaiꞌao ne kontu moinda kakuni nekonando topas; sandi kaompulu onuno nomaiꞌao ne kontu moinda moidho lalo mokuni nekonando krisopras; sandi kaompulu seꞌonuno nomaiꞌao ne kontu moinda kakanda nekonando lasuardi; bhe sandi kaompulu haa onuno nomaiꞌao ne kontu moinda wungo nekonando kecubung.

²¹ Kaguali ompulu haa tibhano maitu dohabue nomaiꞌao ne ompulu haa onu muntia, setibha-setibha seꞌonu muntia. O kabhongka weo kota amaitu dohabue nomaiꞌao ne bulawa mpeꞌuhi, nomoinda tapedamo paeasa.

²² Lambu mongkilo weo kota amaitu miina aohaea, hampano Ompu Lahataꞌala Fofoliuno Kuasa bhe Anano Dhumba maitu, andoamo lambu mongkilono.

²³ Kota amaitu miina naefaraluua wula bhe oleo so mekantaleaꞌe, kapaꞌamo nofekantaleaꞌe kakalabhiano Lahataꞌala, Anano Dhumba nembalimo kantaleano.

²⁴ Sabhaha bansano liwu daekala-kala weo tilangano, sabhaha omputo ne dhunia dawowoꞌo kahangkaeando weo kota amaitu.

²⁵ Kagualino kota pae sepaliꞌa natiꞌontoa suhue oleo, kapaꞌamo ne itu paemo bhe kohondoꞌa.

²⁶ Kahangkaea bhe kanandoo kumalabhiano sabhaha bansano liwu damowaꞌie weo kota amaitu.

²⁷ Tamaka pae bhe giu moharamu so mesuaꞌano weo kota, tawa mie mehabuno timohakuno, tawa mie kopahano, mpahinomo andoa tibuhino nea weo Kitabindo Mie Dumadi, kitabinomo Anano Dhumba.