Powoha 20 - Muna Southern Dialect

Kafopahintaꞌa sehewu taꞌu 20:1-6

¹ Pada amaitu awohamo seemie malaꞌekati nosampu nomaiꞌao te surugaa, neinta-intaha kunsino olano mate pata kotompano, ne limano nandoo dua sehonda hante bhalano.

² Malaꞌekati amaitu nohakomo naga, o ule ngkamukula, nekonando dua Kafeompuꞌando seetani bhe Kolakino rohi modai, maka nokatapue sehewu taꞌu kaomponano.

³ Pada anaꞌa noꞌohoemo weo olano mate pata kotompano maka nokunsi kasongkono bhe nokatandae ⸤ keana dolengkae⸥ . Katipedaꞌano amaitu neanomo paemo namekakolilino sabhaha bansano liwu ampa namalusi tempono sehewu taꞌuno naꞌa. Namada amaitu tabeano damolapae toha nasebantaha.

⁴ Pada anaꞌa awohamo nobhahi kaengkohaꞌano omputo bhe mie mengkohafie; andoa dowaꞌanda kuasa so dafobhotusiꞌao. Awohamo dua alusundo mie titompeꞌano wuꞌu hampano dosakusiiꞌao kaparasaendo ne Yesus bhe dofintahaki bhoasaono Lahataꞌala. Mie andoa ini miina dua dasumombai kadadi anaꞌa bhe patungno, bhe miina dua daetahima katandano ne kondaꞌindo bhe ne limando. Andoa ini suli dodadi bhe dopahinta peda omputo dopoowa-owa bhe Kristus sehewu taꞌu kaomponano.

⁵ Anoamo ini kawanuꞌando mie mate kabhao-bhaono. Tamaka mie mateno sigaoꞌano pae damanua ampa namalusi sehewu taꞌuno naꞌa.

⁶ Dokodawua bhe dongkilo mpuu meꞌawano kadawu ne kawanuꞌando mie mate kabhao-bhaono naꞌa. O mate kahaa pakuno paemo nakokuasa ne andoa, tamaka daembali imamuno Lahataꞌala bhe Kristus, bhe damahinta nada omputo nasehewu taꞌu kaomponano.

Kafeompuꞌando seetani dotaloe 20:7-10

⁷ Namalusi sehewu taꞌuno maitu, Kafeompuꞌando seetani damolapae namaiꞌao we katitohongkuꞌano.

⁸ Anoa nakumalamo toha naefekakolilino sabhaha bansano liwu ne kofatowalaꞌae dhunia, nekonando Gog bhe Magog, maka namohompuda dapopahisa. Kabhahindo mie nefohompu nadamo bhone we wiwino teꞌi.

⁹ Andoa damangka te wite modete ne kosekaꞌewaꞌae dhunia maka dalumibu kaeateꞌando tantarando umati mongkilono Lahataꞌala bhe kota nemoasiꞌaono maitu. Gahaꞌa tanasisampuꞌamo efi namaiꞌao te lani nahumampunida.

¹⁰ Kafeompuꞌando seetani mekakolilinoda daꞌumohoe weo efi ngkowaleha ne kantobha bhalano. Ne itumo dua katiꞌohoꞌando kadadi bhe mie mpahaana-anabiino, maka dasumikisaada mentae mohondo ampa suhue dhamani.

Kabhotusi kapuliaono 20:11-15

¹¹ Pada aitu awohamo dua kaengkohaꞌa kumalabhiano nopute bhe nobhala bhe Mengkohafie. O lani bhe dhunia tanosimiinaeꞌamo ne wiseno kao-kaomo dofileiane, miinamo natiwohaa.

¹² Awohamo dua mie komate-mateno nabhala nahobu deehe-ehe ne wiseno kaengkohaꞌa kumalabhiano maitu. Sabhaha kitabi dolengkaemo, maka delengkamo dua seꞌonu kitabi sigaoꞌano, Kitabindomo Mie Dumadi. Mie komate-mateno dobhitahakida noposahataa bhe habundo peda tibuhino weo kitabi maitu.

¹³ O teꞌi noowa mie komate-mateno weo teꞌi; pedamo dua o mate bhe dhuniano mate doowa miendo mateno, maka seemie-seemie dobhotusida noposahataa bhe habundo.

¹⁴ Pada aitu o mate bhe dhuniano mate doꞌohoda weo kantobhano efi bhalano. Anoamo maitu mate kahaa pakuno.

¹⁵ Sasuka mie tapa tibuhino nea weo Kitabindo Mie Dumadi maitu, doꞌohoda weo kantobhano efi bhalano.