Powoha 2 - Muna Southern Dialect

Kaowili so umati we Efesus 2:1-7

¹ “Buhie so malaꞌekatino umati we Efesus: pedamo aini kaowili maiꞌao ne Anoa meintahano kulipopo fitu uluno ne suanano bhe mekala-kalano ne wunta-wuntando kaengkohaꞌano kantalea bulawa fitu peleno.

² Apandeꞌaanemo sabhaha kahadhaamiu, kawulemiu bhe kakosabaha potaamiomu. Apandeꞌaane hintimiu miina mesabahakiomu mie modai. Padamo fesolodaomu mie kumonano wutondo rasulu, gahaꞌaitumo sakotuꞌuno suano, pandeꞌaanemoomu andoa maitu mie kopaha.

³ Hintimiu sadaa-daa sabaha potaamiomu weo kakadee-dee hampano neaku, miina mepandeꞌaoꞌomu kawule angkafi kanauꞌomu.

⁴ Tamaka nandoo dua pata nepoindaloku: hintimiu hunsamoomu kanini kaasimiu peda kabhao-bhaono.

⁵ Dadiꞌanomo tandaiꞌe notolaumo kandalono mondawuomu! Fetompaꞌao podiu modaimiu maka suli dhalangi peda nehabumiu kabhao-bhaono. Ane paise, amaiꞌikoomu maka amala kaengkohaꞌano kantaleamu itu maiꞌao ne kaeehe-eheꞌano.

⁶ Ampamo kaowu nandoo dua metaaꞌano, hintimiu bansieꞌomu sabhaha habundo mangkafino Nikolaus, pedamo dua Idi abansi habuno.

⁷ Kotingalano naetaa nametingke wambano Rohino Lahataꞌala ne tombudo umati. Sasuka fotalono amaꞌanda daomaa bhakeno sau meowano dadi weo kaendeano Lahataꞌala nekonando kaendeano Firdaus.”

Kaowili so umati we Smirna 2:8-11

⁸ “Buhie dua so malaꞌekatino umati we Smirna: pedamo aini kaowilino Kabhao-bhaono bhe Kafetompaino, mada mateno bhe sumuli dumadino.

⁹ Apandeꞌaane kasabha bhe kakaemiu, tamaka sakotuꞌuno hangkaeaꞌomu. Apandeꞌaane dua kaꞌumbundo mie kumonano wutondo miendo Yahudi, gahaꞌaitumo suano, andoa maitu umatino Kafeompuꞌando seetani.

¹⁰ Koise moteꞌia ne kakadee-dee so neꞌawamiu! Tandaiꞌe, Kafeompuꞌando seetani naꞌumohofi seemie hodua ne olotamiu itu weo katohongku patudhuno nasumobakoomu, maka meꞌawaomu kasabha naompuluꞌa. Fintahakieꞌomu mpuu kaparasaeamiu mahingga mewisekiomu mate, maka amaꞌangkoomu dadi suhue dhamani mbali kawaꞌaondo fotalono.

¹¹ Kotingalano naetaa nametingke wambano Rohino Lahataꞌala ne tombudo umati. Sasuka fotalono paise nakumadee-deeꞌao mate kahaa pakuno.”

Kaowili so umati we Pergamus 2:12-17

¹² “Buhie dua so malaꞌekatino umati we Pergamus: pedamo aini kaowilino kokampue mohoko komata haa wetano.

¹³ Apandeꞌaane ne amai kaeateꞌamu, ingka we kota kafopahintaꞌano Kafeompuꞌando seetani. Tamaka hintimiu sadaa-daa fintahakiomu kaparasaeamiu ne Idi, miina sumowoomua, mahinggamo we dhamanino Antipas sakusiiku tiparasaeano nepongkondo ne wisemiu, we kaeateꞌano Kafeompuꞌando seetani itu.

¹⁴ Tamaka nandoo sehonda haa honda pata nepoindaloku ne hintimiua: ne olotamiu itu nandoo mangkafino kafoinaꞌuno Bileam. Anoa ini notangahi Balak namekakolilino totono lalondo miendo Israel daomaa oti kapopanga so barahala bhe dapokawite-wite.

¹⁵ Pedamo dua aitu ne olotamiu nandoo mintahano ne kafoinaꞌuno Nikolaus.

¹⁶ Dadiꞌanomo fetompaꞌao podiu modaimiu. Ane paise, apikimaiꞌikoomu apoewangianda amake kampue ne olotano wiwiku ini.

¹⁷ Kotingalano naetaa nametingke wambano Rohino Lahataꞌala ne tombudo umati. Sasuka fotalono amaꞌanda daomaa manna tifebuniꞌano; pakade amaꞌanda kontu kapute katibuhiꞌanomo nea buꞌou tapa nepandeꞌaondo mie sigaoꞌano, mpahinomo tumahimae.”

Kaowili so umati we Tiatira 2:18-29

¹⁸ “Buhie dua so malaꞌekatino umati we Tiatira: pedamo aini kaowilino Anano Lahataꞌala, matano pasae hendeno efi, aꞌeno tapedamo tambaga ngkamala-mala.

¹⁹ Apandeꞌaane sabhaha kahadhaamiu, kanini kaasimiu, kaparasaeamiu, kaꞌondofaomiu bhe kakosabaha potaamiomu. Apandeꞌaane dua kahadhaamiu mbuhumai ini, nofoliuꞌe kabhahino kahadhaamiu kabhao-bhaono.

²⁰ Tamaka nandoo pata nepoindaloku: hintimiu taꞌokatahoomu hobhine koneaꞌano Isebel, nokona wutono anabii. Ingka nofoinaꞌu bhe nofokolilino palima-limaku sampe dopokawite-wite bhe dohumaa oti kapopanga so barahala.

²¹ Idi padamo awaꞌane kasalawa so nametompaꞌao podiu modaino, tamaka nokiido nametompaꞌao podiu pokawite-witeno maitu.

²² Tandaiꞌe! Hobhine amaitu amekasakie sampe pae namooli namanu ne kaodoꞌano. Mie pokawite-witeno bhe anoa amondawuanda kasabha bhalano, ane pae dametompaꞌao podiundo bhe hobhine amaitu.

²³ Mie mangkafie tetewei amongkoda maka kosasawiꞌae tombudo umati damandeꞌaane putae Idimo tumiisangino kakolalondo bhe fekihindo manusia. Idimo dua so bhoosiangkoomu seemie-seemie naposahataa bhe habumiu.

²⁴ Ampamo kaowu hintimiu miendo Tiatira sigaoꞌano itu, tapa mangkafino kafoinaꞌu bhe tapa moguhuꞌaono nekonando lofotano Kafeompuꞌando seetani maitu, amohatokoomu: paise amotongkuangkoomu wowoꞌo sigaoꞌano.

²⁵ Ampamo kaowu o ae toka netahimamiu, fintahakieꞌomu ampa ahumato.

²⁶ Sasuka fotalono bhe dhumalangino kapoindaloku ampa kapuliaono, amaꞌane kuasa namahintangi sabhaha bansano liwu.

²⁷ ‘Namahintangida naepake katuko uti, namuhokotida nada nuꞌua wite.’ Kuasa so newaꞌaoku itu pedamo dua kuasa netahimaku maiꞌao ne Amaku.

²⁸ Pakade anoa amaꞌane dua kulipopo Kowine.

²⁹ Kotingalano naetaa nametingke wambano Rohino Lahataꞌala ne tombudo umati.”