Powoha 19 - Muna Southern Dialect

Lagu-lagu mbaꞌinomo kotano Babel nohansurumo 19:1-5

¹ Pada anaꞌa afetingkemo kanggetu suahando kantawundo mie bhahi te surugaa delagu ambado, “Haleluya! Kasalamati, kakalabhia bhe kuasa nomaiꞌao ne Lahataꞌalantoomu.

² Kapaꞌamo nobanara bhe noꞌadhili kahukumuno, Anoa padamo nohukumu karambole bhalano, dumai-daino dhunia hampano dadi pokawite-witeno. Lahataꞌala padamo nobhoosianda heando palima-limano ne karambole amaitu.”

³ Dofendua toha delagu ambado, “Haleluya! Gawuno efi humampunino kota amaitu nobhombola kansuhu ampa suhue dhamani.”

⁴ Kamungkula haa fulu popaano bhe mahaluku fato uluno maitu defodapa dotaohao sombado ne Lahataꞌala mengkohano ne kaengkohaꞌa kumalabhiano bhe dopugau ambado, “Amin, Haleluya.”

⁵ Notifetingkemo dua suaha nomaiꞌao ne kaengkohaꞌa kumalabhiano maitu ambano, “Pudhi kaitaomu Lahataꞌalantoomu, kosasawimiu palima-limano, hintimiu moteꞌino ne Anoa nabhala nahobu!”

Kagaano Anano Dhumba 19:6-10

⁶ Pada amaitu afetingkemo kanggetu suahando kantawundo mie bhahi, pedamo guhuntumano luano oe bhalano, pedamo dua nduuno guntu mobhibhiisano ambado, “Haleluya! Ompu Lahataꞌalantoomu Fofoliuno Kuasa nembalimo omputo.

⁷ Fowula kaitaomu lalontoomu, moꞌia kaitaomu bhe fekakalabhia kaitaomu Lahataꞌala! Kapaꞌamo oleono kagaaꞌano Anano Dhumba nohatomo, loꞌia buꞌou hobhine notokamo kakanuno.

⁸ So pakeano dowaꞌane kai kapute moꞌalusu, nonggela bhe nokosilo.” (Kai alusu maitu kaꞌibahatino sabhaha habu metaando umati mongkilono).

⁹ Pada aitu nopugaumo ⸤ malaꞌekati naꞌa⸥ ne idi, “Buhie nada ini: dokodawua mpuu mie tibhasino ne kagaano Anano Dhumba.” Ambano dua, “Wamba aini nokotuꞌu, sanea bhoasaono Lahataꞌala.”

¹⁰ Idi lasao aefodapa ne aꞌeno ataohao sombaku tamaka tanopugau ambano, “Koise nada itua! Idi ini palima-lima dua nopototo bhe hintu bhe bhahitieꞌimu marasaeano mintahakino kafohatono Yesus. Taohao sombamu ne Lahataꞌala, kapaꞌamo o Rohi mekabhintino mie sampe dokosuaha peda anabii, nomaiꞌao ne kafohatono Yesus.”

Sumawino ne adhaha kapute 19:11-21

¹¹ Pada aitu awohamo surugaa notilengka, maka nandoo seꞌulu adhaha kapute. Mie sumawikie dokonae “Mie Tiparasaeano bhe Banarano”. Anoa noꞌadhili nofobhotusi bhe nopopahisa.

¹² Matano mie amaitu pasae hendeno efi, te fotuno noposunsu-sunsu songkono omputo. Ne uluno notibuhi neano, tamaka miina bhe mandeꞌaanea mpahinomo wutono.

¹³ Dhubano padamo dolondoane hea, neano dokonae “Bhoasaono Lahataꞌala”.

¹⁴ Anoa doangkafie kosasawindo tantarano surugaa dosawi ne adhaha kapute depake kai moꞌalusu sakapu-kapute, nonggela sepaliꞌa.

¹⁵ Nomaiꞌao ne olotano wiwino nolimba semata kampue mohoko so natumaloꞌao sabhaha bansano liwu, maka namahintangida naepake katuko uti. Andoa nameoda nada angguru ne kantobha bhalano kaefeoꞌa angguru, kaꞌibahatinomo kapontalabhi-labhino amahano Lahataꞌala Fofoliuno Kuasa.

¹⁶ Ne dhubano bhe ne faꞌano notibuhi nea peda aini, Omputo sabhaha omputo, Kafeompuꞌandomo sabhaha kafeompuꞌa.

¹⁷ Taꞌawohamo dua seemie malaꞌekati neehe-ehe te wawono oleo bhe nokei nofekahaa-haaꞌi ne kaꞌuhi melola-lolano te wuntano lani, “Maiꞌomu se ini, hompuomu so hame-hame bhalano Lahataꞌala,

¹⁸ neanomo momaaꞌomu iꞌindo omputo, iꞌindo tantara bhe neangkaꞌindo, iꞌindo adhaha bhe mie sumawikie, iꞌindo kosasawindo manusia, namie bebasi nabhatua, namie mohobu namie bhalano.”

¹⁹ Taꞌawohamo dua kadadi ⸤ kofotuꞌano fitu pongke⸥ naꞌa bhe sabhaha omputo ne dhunia dopoowa-owa bhe tantarando, dohompu dapopahisa damewangi mie sumawino ne adhaha kapute maitu bhe tantaraꞌino.

²⁰ Gahaꞌa kadadi amaitu lasao dohakoe nopoowa-owa bhe mie mpahaana-anabiino mehabuno sabhaha tanda timenteꞌaono ne wiseno kadadi anaꞌa. Tanda-tanda timenteꞌaono maitu mekakolilinono mie metahimano katandano kadadi amaitu bhe sumombaino patungno. Kohoduando maitu doꞌohoda ngkaꞌuhi-uhi weo efi ngkowaleha ngkalai-laino ne kantobha bhalano.

²¹ Kosasawindo mie sigaoꞌano dopongkoanda kampue maiꞌao ne olotano wiwino mie sumawino ne adhaha maitu, maka sabhaha kaꞌuhi lumolano doweꞌi dohumaa iꞌindo.