Powoha 18 - Muna Southern Dialect

Kahansuruꞌano Babel 18:1-20

¹ Pada amaitu awohamo dua malaꞌekati sigaoꞌano nosampu nomaiꞌao te surugaa. Anoa nobhala sepaliꞌa kuasano, dhunia tanentaleamo hampano kakalabhiano.

² Malaꞌekati amaitu nokei nefekahaaꞌi suahano ambano, “Nosansamo, nosansamo kota bhalano Babel. Kota amaitu nembalimo kaeateꞌando rohi modai, kafeoluꞌando seetani, kaꞌukoꞌando sabhaha kaꞌuhi moharamu bhe timohakuno.

³ Kanandooꞌano peda maitu hampano sabhaha bansano liwu padamo dofohoꞌu angguruno nafusuu modai pokawite-wite, sabhaha omputo ne dhunia padamo dopokawite-wite bhe anoa, sabhaha daga ne dhunia ini dohangkaeamo dhohono nafusuuno modaiꞌano pontalabhi-labhino.”

⁴ Afetingkemo dua suaha sigaoꞌano nomaiꞌao te surugaa nopugau ambano, “Umatiku, limbamoomu ⸤ maiꞌao ne kota aitu⸥ , gampianeomu, neanomo paise mealaomu dawu weo sabhaha dhosano, keana nokangkanaikoomu sabhaha balaano.

⁵ Kapaꞌamo dhosano tanekabu-kabumbumo nohatoemo lani, maka Lahataꞌala nofeꞌulaimo sabhaha podiu modaino.

⁶ Habueꞌomu peda nehabuno ne hintimiu, sabhaha nehabuno bhoosianeomu nahaa paku. Kampohoꞌuꞌano fosingiꞌianeomu kafohoꞌu nahaa paku kaꞌosano newaꞌaono ne hintimiu.

⁷ Sikisaaꞌeomu bhe fekaguguhueꞌomu ampa naposahataa bhe kafosibhala bhe dadi pontalabhi-labhi nenamisino. Kapaꞌamo anoa nokoduku lalono, ‘Inodi ini omputo hobhine mintahano pahinta. O idi suano bhihinandaa, paise sepaliꞌa aenamisi kaguguhua.’

⁸ Dadiꞌanomo sabhaha balaa nakumangkanaiꞌe seꞌoleo: o hopu, o kaguguhu, o gaba bhe dahumampuniane efi, hampano nokokuasa mpuu Ompu Lahataꞌala bhotusie.”

⁹ Sabhaha omputo ne dhunia mada pokawite-witeno bhe menamisino dadi pontalabhi-labhi bhe anoa, daoꞌae bhe daekangkoꞌae ane daoha kaowu gawuno efi humampunino ⸤ kota amaitu⸥ .

¹⁰ Andoa daeehe-ehe we mokodoꞌoꞌano hampano daoteꞌi bhahaa nakumantibhada dua balaano kasikisaano. Andoa dapugau, “Balaamo, balaamo hintu kota bhalano, hintu Babel kota moꞌosa, hampano sedhamu kaowu kahukumumu nokangkanaiko.”

¹¹ Sabhaha daga ne dhunia ini daoꞌaefie bhe daguguhu hampano miinamo bhe so umolino pahaasondo.

¹² Pahaasondo naꞌa o bulawa, salaka, kontu moinda, muntia, kai kapute moꞌalusu, kai wungo, pasele bhe kai kadea lalo moꞌito, sabhaha bansano sau mowondu, sabhaha katoka maiꞌao ne tandu mopute, sabhaha katoka maiꞌao ne sau moꞌali, tambaga, uti bhe kontu mopute,

¹³ kulino sau mowondu, sabhaha bansano kagule, mina-mina kawondu, mina-mina nekonando mur, dupa, angguru, mina, wone, gandum, sapi, dhumba, adhaha bhe kareta, bhatua sampe inawando manusia.

¹⁴ Andoa dapugau ambado, “Sabhaha kambaka nemokambaꞌaomu nomiinaemo, sabhaha kanandoomu mangaliuno bhe sabhaha kahangkaeamu pombeahino nosalimo, paemo dapoꞌawaanea.”

¹⁵ Sabhaha podagano humangkaeaꞌaono sabhaha bara amaitu, daeehe-ehe we mokodoꞌoꞌano hampano daoteꞌi bhahaa nakumantibhada dua balaano kasikisaa, daoꞌae bhe daguguhu.

¹⁶ Andoa dapugau ambado, “Balaamo, balaamo hintu kota bhalano mepakeno kai kapute moꞌalusu, kai wungo bhe kai kadea lalo moꞌito, nelegasiꞌao bulawa, kontu moinda bhe muntia,

¹⁷ kapaꞌamo sedhamu kaowu kabhahino kahangkaeano maitu nowolomo nobinasa.” Kosasawindo nakodha, sawino, mieno bhangka bhe sabhaha mie kokagiuno we teꞌi daeehe-ehe we mokodoꞌoꞌano.

¹⁸ Damoha gawuno efi humampunino kota anaꞌa dakumeimo ambado, “Kota ae dua bhahaa pototoꞌano kabhala bhe kota aini?”

¹⁹ Andoa daekambuhi bungahasi te fotundo ⸤ katandaino kaguguhundo⸥ , bhe dakumei poowa daoꞌae bhe daekangkoꞌae ambado, “Balaamo, balaamo kota bhalano! Kanandoono dohangkaeaꞌanemo sabhaha mie kokapalano we teꞌi, tamaka sedhamu kaowu nowolomo nobinasa.

²⁰ Hintu surugaa, fowula lalomu hampano kahansuruꞌano kota aitu! Fowula dua lalomiu, hintimiu umati mongkilo, rasu-rasulu bhe ana-anabii! Kapaꞌamo Lahataꞌala padamo nowaꞌane kahukumuno mbali kabhoosino sabhaha nehabuno kota amaitu ne hintimiu.”

Kotano Babel paemo namanusaoa 18:21-24

²¹ Pada aitu seemie malaꞌekati moꞌosano nesangkemo kontu peda kagili bhalano maka noꞌohoe we teꞌi bhe nopugau ambano, “Nadamo amaitu kota bhalano Babel dahumambitaꞌiane we panda maka paemo sepaliꞌa dapoꞌawaanea.

²² Suahando mebhesi-bhesino kusapi, melagu-laguno, mepunto-puntono suli bhe duhulele, paemo sepaliꞌa natifetingkea weo kotamu. Bhe naseemie tuka paemo daepoꞌawaꞌao weo kotamu, guntuno kagili kontu paemo dua natifetingkea.

²³ Tilangano kantalea paemo natiwohaa weo kotamu; suahando loꞌia buꞌou namoꞌane nahobhine paemo dua natifetingkea. Podagano meatefiko sanea kabhalano dhunia, sabhaha bansano liwu fekakolilinoanda sihirimu.”

²⁴ Ne kotamo ini kapotuhuꞌano heando ana-anabii, umati mongkilo bhe sabhaha mie nepongko ne dhunia ini.