Powoha 17 - Muna Southern Dialect

O hobhine te wawono kadadi 17:1-18

¹ Pada anaꞌa nomaimo seemie maiꞌao ne malaꞌekati pipituno meowano fitu woka mangko maitu bhe nopugau ne idi ambano, “Mai se ini, amotiwohaangko kahukumu so karambole tiende-endeno mengkohano ne tombuno koꞌoeꞌano.

² Sabhaha omputo ne dhunia padamo dopokawite-wite bhe anoa. Mie meateno we dhunia padamo dololanuꞌao podiu pokawite-witeno, tapedamo mohoꞌuno angguru.”

³ Pada anaꞌa nokabhinti kanaumo Rohino Lahataꞌala maka nowowoꞌo kanau we pandaso bhalano. Ne itu awohamo seemie hobhine nengkoha-ngkoha te wawono seꞌulu kadadi, waranaano o kadea lalo moꞌito. Uluno kadadi anaꞌa noponoꞌao nea mekaꞌaebuno Lahataꞌala; fotuno fitu pongke, tanduno ompulu pele.

⁴ Pakeano hobhine anaꞌa o wungo bhe kadea lalo moꞌito, wutono dolegasiane bulawa, kontu moinda bhe muntia. Ne limano neinta-intaha sewoka kampohoꞌuꞌa bulawa noponoꞌao sabhaha giu timolampi bhe pokahaku, pehapino dadi pokawite-witeno.

⁵ Ne kondaꞌino notibuhi nea tifebuniꞌano maꞌana, Babel bhalano, inandomo sabhaha karambole bhe kamaiꞌaoꞌano sabhaha diu timolampi ne dhunia ini.

⁶ Awohamo dua hobhine amaitu nololanuꞌao heando umati mongkilo bhe mie mateꞌaono kaparasaeando ne Yesus nesakusiiꞌaondo. Awoha hobhine amaitu taꞌapokamente-mentemo.

⁷ Nopugaumo toha malaꞌekati naꞌa ambano, “Noafa gahaꞌa menteꞌao? Amohatoangko maꞌanano tifebuniꞌano hobhine amaitu bhe kadadi kasawiꞌano, kadadi kofotuꞌano fitu pongke bhe kotanduꞌano ompulu pele.

⁸ Kadadi newohamu itu endefiꞌini nodadi, ampa aitu miinamo, tamaka mada kaowu natiumba toha namaiꞌao ne olano mate tapa kotompano naehopeki kabinasa. Mie meateno we dhunia tapa tibuhiꞌano nea weo Kitabindo Mie Dumadi mpini pakanandoono dhunia, tadamente damoha kadadi amaitu. Kapaꞌamo kadadi amaitu endefiꞌini nodadi, ampa aitu miinamo, tamaka mada kaowu natiumba toha.

⁹ Maraluuꞌano mpuu ne ini fekihi kokapandeno. Fotu fitu pongkeno naꞌa maꞌanano fitu kabhawo kaengkohaꞌano hobhine amaitu. Fitu fotuno maitu nokomaꞌanaꞌao dua omputo dopipitu:

¹⁰ lidimano dosabumo, seemie nandoo nopahinta, seemieno miinaꞌo nahumatoa, maka ane nahumato namahinta nasekabantaha kaowu.

¹¹ Kadadi dumadino endefiꞌini tamaka ampa aitu miinamo, anoamo ini omputo kaaluno. Anoa seemie dua maiꞌaono ne omputo pipituno maitu maka naehopeki kabinasa.

¹² Tandu ompulu peleno newohamu itu, maꞌanano doompulu omputo tapaꞌo mahintano. Tamaka nasedhamu kaomponano daeꞌawa dua kuasa nada omputo dapoowa-owa bhe kadadi amaitu.

¹³ Andoa maitu dosepatudhu; kaꞌosa bhe kuasando dowaꞌane kadadi amaitu.

¹⁴ Andoa dapopahisa bhe Anano Dhumba, tamaka Anano Dhumba natumaloda hampano Anoa Kafeompuꞌandomo sabhaha kafeompuꞌa bhe Omputo sabhaha omputo. Anano Dhumba naꞌa daposabhangkaane mie nesaliꞌino, nepilino bhe tiparasaeano.”

¹⁵ Nopugaumo dua malaꞌekati naꞌa ne idi ambano, “Tombuno koꞌoeꞌano kaengkohaꞌano karambole newohamu itu, maꞌanano, sabhaha bansano liwu, mie bhahi, sabhaha siwulu bhe sabhaha wamba.

¹⁶ Tandu ompulu peleno bhe kadadi newohamu itu, dabansi karambole amaitu. Andoa darumampasi sabhaha fehebuaꞌano bhe dalumembie, daomaa iꞌino maka dahumampuniane efi.

¹⁷ Lahataꞌala padamo nofodoli totono lalondo so dadhumalangiꞌao patudhuno Lahataꞌala. Nohabuda dua dosekakolalo damaꞌao kuasa kafopahintaꞌando ne kadadi amaitu, ampa sabhaha bhoasaono Lahataꞌala nakoꞌula.

¹⁸ Hobhine newohamu itu, maꞌanano kota bhalano mahintanginomo sabhaha omputo ne dhunia ini.”