Powoha 16 - Muna Southern Dialect

Balaa fitu hondano 16:1-21

¹ Afetingkemo dua suaha mohaaꞌi nomaiꞌao weo Boloku Mongkilo nopugau ne malaꞌekati pipituno naꞌa ambano, “Kalaomu maka sungkaeꞌomu kofitu wokaꞌae mangkono amahano Lahataꞌala itu we dhunia!”

² Nokalamo malaꞌekati kabhao-bhaono nosungka mangkono we dhunia maka kosasawindo mie mepakeno katandano kadadi saꞌituini bhe sumombaino patungno, notumbuida kawisu modai mokompeahaꞌino.

³ Malaꞌekati kahoduano nosungkamo mangkono we teꞌi, gahaꞌa oeno teꞌi lasao nembali hea pedamo heando mie mate sampe kosasawindo koinawano weo teꞌi dopuli domate.

⁴ Malaꞌekati katotoluno nosungka mangkono we sabhaha umele bhe matano oe, lasao kosasawiꞌae dembali hea.

⁵ Afetingkemo dua malaꞌekati kumuasaino oe nopugau ambano, “Hintu ndumandoono bhe toka ndumandoono, Hintu mongkilono, noꞌadhili mpuu kahukumu nefondawumu.

⁶ Kapaꞌamo andoamo maitu motuhuno heando umati mongkilono bhe ana-anabii. Aitu fefohoꞌutianda hea, daanumo nopantasimo so andoa.”

⁷ Afetingkemo dua suaha nomaiꞌao ne medha kaetunuꞌa dupa nopugau ambano, “Uumbe daanumo Hintu Ompu Lahataꞌala Fofoliuno Kuasa, kahukumu nefondawumu nobanara bhe noꞌadhili.”

⁸ Malaꞌekati kapopaano nosungkamo mangkono te wawono oleo, maka o oleo dowaꞌane kapooli natumunu manusia sampe daodada.

⁹ Manusia titunuꞌaono kasodono oleo mobhibhiisano naꞌa, tadobhatataꞌiao neano Lahataꞌala kokuasano ne sabhaha balaa amaitu. Andoa miina dametompaꞌao podiundo so damekakalabhiaꞌao Lahataꞌala.

¹⁰ Malaꞌekati kalidimano nosungkamo mangkono te wawono kaengkohaꞌa kumalabhiano kadadi anaꞌa, sampe liwu kafopahintaꞌano nohohondomo bhe manusia dosia lelando kaꞌosano kaleando.

¹¹ Andoa dobhatataꞌiao Lahataꞌala te surugaa, hampano kaleano bhe kawisundo, tamaka miina dametompaꞌao podiu modaindo.

¹² Malaꞌekati kanonoono nosungkamo mangkono te wawono umele bhalano koneaꞌano Efrat, lasao nokekele. Dadiꞌanomo nokantaa-ntaamo kaangkaꞌa so sabhaha omputo maiꞌaono te mata oleo.

¹³ Taꞌawohamo dua rohi modai dototolu pasaꞌida kahaka dolimba maiꞌao ne wobhano naga, ne wobhano kadadi bhe ne wobhano mpahaana-anabiino.

¹⁴ Andoamo maitu rohindo seetani mehabuno sabhaha tanda tapa mentela. Kototolundo dokalamo dofohompu sabhaha omputo ne dhunia so dapopahisaꞌao nahumato oleo bhalano, oleonomo Lahataꞌala Fofoliuno Kuasa.

¹⁵ ⸤ Ambano Ompu⸥ “Tandaiꞌeomu! Ahumato nada kasoꞌo. Nokodawua mpuu mie kodhagano bhe mohilalono pakeano, keana nokala kalembi-lembi bhe natiwoha kaambanoꞌano ne wisendo mie bhahi.”

¹⁶ Sabhaha omputo anaꞌa dofohompuda ne seꞌonu liwu, weo wamba Ibrani dokonae Harmagedon.

¹⁷ Palusi aitu malaꞌekati kapipituno nosungkamo mangkono te antara. Gahaꞌa tanotifetingkemo suaha nomaiꞌao ne kaengkohaꞌa kumalabhiano weo Boloku Mongkilo, nohaaꞌi sepaliꞌa ambano, “Nopalusimo!”

¹⁸ Tanokosilakamo dua bhibhito, pisibhela bhe guntu, tanonandoomo dua lualino wite mobhibhiisano. Luali medando anaꞌa miinaꞌo sepaliꞌa nakumadhadhia mpini pakanandoono manusia ne dhunia. Pedamo naꞌa kabhibhiisano luali amaitu.

¹⁹ Kota bhalano maitu nobhongka nofetoludawue, kotando sabhaha bansano liwu nopuli nosansa. Lahataꞌala nofeꞌulaimo Babel kota bhalano maitu, maka nowaꞌane nofohoꞌu angguru ne kampohoꞌuꞌano, kaꞌibahatino kapontalabhi-labhino amahano Lahataꞌala.

²⁰ Sabhaha liwuto nopuli nosali, sabhaha kabhawo miinamo daohaa.

²¹ Nondawumo use ngkobhatu nomaiꞌao te lani notabuhiki manusia; use ngkobhatu naꞌa pedaꞌidamo kontu sepoi-sepoi kabhieno napelima fulu kilo. Manusia dobhatataꞌiao Lahataꞌala hampano balaano use ngkobhatu amaitu notolau kabhibhiisano.