Powoha 15 - Muna Southern Dialect

Lagundo Fotalono 15:1-4

¹ Pada aitu awohamo dua tanda bhalano timenteꞌaono te lani nobhibhiisa sepaliꞌa: dopipitu malaꞌekati deowa fitu honda balaa kapuliaono, kafetompainomo amahano Lahataꞌala.

² Awoha dua teꞌi peda paeasa bhalano noposalo bhe efi. Ne wiwino teꞌi naꞌa deehe-ehemo mie tumalono kadadi saꞌituini, patungno bhe kaꞌeapino neano. Andoa deinta-intaha kusapi kawaꞌaono Lahataꞌala.

³ Andoa delagu-laguꞌao laguno Musa palima-limano Lahataꞌala bhe laguno Anano Dhumba. Ambado, “Hintu Ompu Lahataꞌala Fofoliuno Kuasa! Nobhala bhe notimenteꞌao mpuu angkaꞌano limamu. Noꞌadhili bhe nobanara mpuu sabhaha habumu. Hintu Omputo sabhaha bansano liwu!

⁴ Laꞌae bhahaa so tapa moteꞌino ne Hintu Ompu? Laꞌae bhahaa so tapa mekakalabhiano neamu? Kapaꞌamo Hintumo kaowu mongkilono. Sabhaha bansano liwu damai datumaohao sombado ne Hintu, kapaꞌamo kabhotusimu umadhilino dowohaemo sabhaha mie.”

Dopipitu malaꞌekati deowa mangkono amahano Lahataꞌala 15:5-8

⁵ Pada anaꞌa awohamo dolengka Boloku Mongkilo, tenda kaeateꞌano Lahataꞌala te surugaa.

⁶ Domaiꞌao ne boloku anaꞌa dolimbamo malaꞌekati pipituno meowano fitu honda balaa saꞌituini. Pakeando kai moꞌalusu nokosilo kaputeno, mbadhando dowaweꞌiane kagege bulawa.

⁷ Seꞌulu mahaluku maiꞌaono ne mahaluku popaano naꞌa nowaꞌao malaꞌekati pipituno maitu fitu woka mangko bulawa noponoꞌao amahano Lahataꞌala dumadino ampa suhue dhamani.

⁸ Boloku Mongkilo maitu noponoꞌao gawu hampano kakalabhia bhe kuasano Lahataꞌala. Bhe naseemie pae bhe so moolino mesuano weo Boloku Mongkilo maitu, ane paeꞌo namalusi kofitu hondaꞌae balaa neowando malaꞌekati pipituno naꞌa.