Powoha 14 - Muna Southern Dialect

Anano Dhumba bhe mie mangkafie netolosino 14:1-5

¹ Pada aitu awohamo dua Anano Dhumba neehe-ehe te kabhawono Sion. Anoa nopoowa-owa bhe mie domoꞌono fato fulu fato hewu, sanea bhe kabuhino neano Anano Dhumba bhe neano Amano ne kondaꞌindo.

² Taꞌafetingkemo dua suaha nomaiꞌao te lani pedamo guhuntumano luano oe bhalano bhe nduuno pisibhela timoteꞌiꞌano. Suaha nefetingkeku naꞌa pedamo dua kantawundo mie mekusapino dobhesi-bhesi kusapindo.

³ Andoa delagu-laguꞌao lagu buꞌou ne wiseno kaengkohaꞌa kumalabhiano bhe ne wisendo mahaluku fato uluno bhe ne wiseno kamu-kamungkulaꞌi. Bhe naseemie miina bhe membalino poguhuꞌaono lagundo, mpahinomo mie moꞌono fato fulu fato hewuno titolosino maiꞌao we dhunia.

⁴ Andoa ini mie pata pokadengoꞌaono wutondo bhe hobhine, dongkilo peda kalambe. Ne amai maka kahopeꞌano Anano Dhumba, sadhia doangkafie. Andoa ini notolosida maiꞌao ne manusia daembali kapopanga kabhao-bhaono so Lahataꞌala bhe so Anano Dhumba maitu.

⁵ Ne wiwindo miina sepaliꞌa bhe pahaa, andoa miina dakodengo-dengoa.

Tempono so kafobhotusiꞌa 14:6-13

⁶ Taꞌawohamo dua malaꞌekati sigaoꞌano nelola-lola te wuntano lani. Anoa newowoꞌo Bhihita Metaa suhue dhamani so namolele ne mie meateno we dhunia, ne sabhaha bansano liwu, sabhaha sampuꞌa, sabhaha wamba bhe sabhaha siwulu.

⁷ Anoa nokei nofekahaa-haaꞌi ambano, “Moteꞌiomu ne Lahataꞌala! Fekakalabhiaꞌomu neano! Kapaꞌamo nohatomo tempono kafobhotusiꞌano. Taohao sombamiu ne Mokonandoono lani bhe dhunia, teꞌi bhe sabhaha matano oe.”

⁸ Notuluemo dua malaꞌekati kahoduano nopugau ambano, “Nosansamo, nosansamo Babel kota bhalano maitu, mekalolanuno sabhaha bansano liwu hampano nofefohoꞌutianda angguruno nafusuu modai pokawite-wite.”

⁹ Noangkafie dua malaꞌekati katotoluno bhe nopugau nofekahaa-haaꞌi ambano, “Sasuka sumombaino kadadi amaitu bhe patungno, bhe tumahimano katandano ne kondaꞌino tawa ne limano,

¹⁰ anoa maitu naohoꞌu angguru, maꞌanano naenamisi kahukumuno Lahataꞌala. Angguru aitu dofontaa-ntaaꞌe weo kampohoꞌuꞌano amahano Lahataꞌala, miina nakosalo-saloa ⸤ daa-daaꞌe kaꞌosano⸥ . Mie medando anaꞌa dasumikisaaꞌane efi bhe waleha ne wisendo malaꞌekati mongkilono bhe ne wiseno Anano Dhumba.

¹¹ Gawuno efi sumikisaada naꞌa nakumatowo-towo kansuhu ampa suhue dhamani. Mentae mohondo pae bhe katiehea dasumikisaada, hampano dosombamo ne kadadi amaitu bhe patungno bhe dotahima katandano neano.”

¹² Maraluuꞌano ne ini kakosabahando umati mongkilo dopotaami weo kasabha, mie mangkafino pahintano Lahataꞌala bhe kumampuu-mpuuno kaparasaea ne Yesus.

¹³ Afetingkemo dua suaha nomaiꞌao te surugaa ambano, “Buhie! Dokodawua mpuu mie mateno seꞌiseno bhe Ompu notanda ampa aitu.” Ambano Rohino Lahataꞌala, “Uumbe daanumo. Andoa damewuleꞌao kahadhaa moꞌosando, hampano sabhaha podiu metaa naposabhangkaanda.”

Tobheꞌa we dhunia 14:14-20

¹⁴ Awohamo dua gahaꞌa bhe olu ngkapute, te wawono nengkoha-ngkoha seemie pasae Anano Manusia nefokana songkono omputo maiꞌao ne bulawa. Neintaha semata kapulu kokanggai so katobheꞌa, nohoko sepaliꞌa.

¹⁵ Nolimbamo seemie malaꞌekati sigaoꞌano nomaiꞌao weo Lambuno Lahataꞌala nokei nofekahaa-haaꞌi ne Mengkoha-ngkohano te olu ngkapute naꞌa ambano, “Fowawemo kapulu kokanggaimu itu, tobheemo, nohatomo tempono tobheꞌa, kapaꞌamo so netobhe we dhunia nokunimo.”

¹⁶ Dadiꞌanomo Mengkoha-ngkohano te olu ngkapute naꞌa nofowawemo kapulu kokanggaino we dhunia, maka o dhunia dotobheemo.

¹⁷ Nolimbamo dua seemie malaꞌekati sigaoꞌano maiꞌao weo Lambuno Lahataꞌala te surugaa, neintaha dua semata kapulu kokanggai mohokoꞌano.

¹⁸ Gahaꞌa nomaimo toha seemie malaꞌekati sigaoꞌano, nomaiꞌao we medha kaetunuꞌa dupa. Anoa nokuasai efi. Malaꞌekati aini nokei nofekahaa-haaꞌi ne malaꞌekati meintahano kapulu mohokoꞌano saꞌituini ambano, “Fowawe kapulu kokanggaimu mohokoꞌano itu, timpuda bhakeno angguru we dhunia, kapaꞌamo dotaꞌamo.”

¹⁹ Malaꞌekati anaꞌa nofowawe kapulu kokanggaino we dhunia netimpu bhakeno angguru maka noꞌohofie weo kantobha bhalano kaefeoꞌa angguru, kaꞌibahatino amahano Lahataꞌala.

²⁰ Bhakendo angguru maitu dofeoda we simbalino kota, maka nomaiꞌao ne kantobha kaefeoꞌa naꞌa nomawamo hea, kalangkeno ampa te kasamano adhaha ⸤ napehaa metere⸥ , kakodoꞌono nomawa napetolu moꞌono kilo.