Powoha 13 - Muna Southern Dialect

Kadadi lumimbaꞌano maiꞌaono weo teꞌi 13:1-10

¹ Pada anaꞌa awohamo kadadi nolimba maiꞌao weo teꞌi, fotuno fitu pongke, tanduno ompulu pele. Ne tanduno naꞌa nandoo ompulu woka songkono omputo. Te fotuno notibuhi sabhaha nea kafekaꞌaebu ne Lahataꞌala.

² Kadadi anaꞌa nokatu harimau, tamaka aꞌeno peda aꞌeno beruang, wobhano peda wobhano singa. Naga saꞌituini nowaꞌao kaꞌosano, kaengkohaꞌano bhe kuasano bhalano ne kadadi amaitu.

³ Fotuno sepongke wohaꞌano nobhela modato neowa mate, tamaka kabhela modato naꞌa noꞌuhimo. Kosedhuniaꞌae domente maka doangkafi kadadi amaitu.

⁴ Andoa dosombai naga anaꞌa hampano anoamo maꞌaono kuasa ne kadadi amaitu. Andoa dosombai dua kadadi amaitu bhe dopugau ambado, “Laꞌae bhahaa pototoꞌano bhe kadadi aini? Laꞌae bhahaa so mondoino poewangiane?”

⁵ Kadadi anaꞌa dowaꞌane kalalesa nakowambaꞌao kalangkeno diu bhe kafekaꞌaebu ne Lahataꞌala, dowaꞌane dua kalalesa nahumabue kansuhu ampa nafato fulu haa wula kaomponano.

⁶ Dadiꞌanomo kadadi anaꞌa nofonganga wobhano nofekaꞌaebumo Lahataꞌala, nofekandidiki neano, nofekaꞌaebu dua lambu kaeateꞌano Lahataꞌala bhe kosasawindo meateno te surugaa.

⁷ Kadadi amaitu dowaꞌane dua kapooli napoewangi bhe umati mongkilo maka natumaloda. Dowaꞌane dua kuasa ne sabhaha sampuꞌa, sabhaha siwulu, sabhaha wamba, bhe sabhaha bansano liwu.

⁸ Kosasawindo mie meateno we dhunia dasumomba ne anoa. Miemo andoa ini, mpini pakatifokonandoono dhunia, miina natibuhia neando weo Kitabindo Mie Dumadi, fehebuaꞌano Anano Dhumba toka nesumbele.

⁹ Kotingalano naetaa nametingke!

¹⁰ Mie toka nefotantu natitohongku, tetewei datumohongkue; mie toka nefotantu namateꞌao kampue, tetewei damongkoane kampue. Maraluuꞌano mpuu kakosabaha dopotaami bhe kaparasaeando umati mongkilo.

Kadadi lumimbaꞌano maiꞌaono weo wite 13:11-18

¹¹ Awohamo dua seꞌulu kadadi nolimba maiꞌao weo wite, tanduno haa pele peda tanduno anano dhumba, nokotanga peda seꞌulu naga.

¹² Kadadi anaꞌa nopake kosasawiꞌae kuasano kadadi kabhao-bhaono saꞌituini maka nodhalangie ne wiseno. Kosekaꞌewaꞌae dhunia bhe mie meateno we dhunia nofosuhuda dasumombai kadadi kabhao-bhaono kokabhela modato meowano mate naꞌa, tamaka noꞌuhimo.

¹³ ⸤ Kadadi maiꞌaono weo wite ini⸥ nefokonandoo tanda-tanda bhalano timenteꞌaono, sampe nefosampu dua efi maiꞌao te lani ne wisendo mie bhahi.

¹⁴ Mie meateno we dhunia nofekakolilinoanda tanda-tanda timenteꞌaono, nefopooliꞌao ne anoa so nahumabu ne wiseno kadadi kabhao-bhaono naꞌa. Anoa notudu dua mie meateno we dhunia daehabu patung so dasumombaiꞌao kadadi mobhelaꞌaono kampue tamaka sadaa-daa nodadi.

¹⁵ Anoa dowaꞌane dua kalalesa naefopesua inawa ne patung nehabundo amaitu, sampe patungno kadadi anaꞌa nopande nopugau bhe nofotudu sabhaha mie mongaheno sumombaiꞌe damongkoda.

¹⁶ Kosasawindo mie, namie bhalano namie mohobu, nahangkaea nangkumaasi-asi, namie bebasi nabhatua, nofosuhuda kadadi anaꞌa dakumatandada ne limano suanando tawa ne kondaꞌindo.

¹⁷ Bhe naseemie miina bhe membalino poꞌoli poasono, mpahinomo andoa mepakeno katandano, mepakeno neano kadadi amaitu tawa mepakeno kaꞌeapi komaꞌanaꞌaono neano.

¹⁸ Maraluuꞌano sepaliꞌa ne ini o kapande. Mie kokapandeno naetaa nameꞌeapi maꞌanano kaꞌeapino kadadi amaitu, kapaꞌamo kaꞌeapi amaitu neano seemie manusia. Kaꞌeapino neano nomo moꞌono nomo fulu nonoo.