Powoha 12 - Muna Southern Dialect

O hobhine bhe naga 12:1-6

¹ Tanotiwohamo tanda bhalano timenteꞌaono te lani: seemie hobhine, pakeano o oleo, o wula we pandano aꞌeno, ne fotuno nefokana songkono omputo nomaiꞌao ne ompulu haa ulu kulipopo.

² Hobhine aitu nofowoowa; hampano temponomo nakoana, anoa nofedee bhe nokeiꞌao kalea.

³ Tanotiwohamo dua tanda timenteꞌaono sigaoꞌano te lani: seꞌulu naga bhalano nodea lalo moꞌito, fotuno fitu pongke, tanduno ompulu pele, te wawono fotuno nandoo songkono omputo fitu woka.

⁴ Sekatolu dawuꞌa kulipopo te lani nosohopianda lensino maka noꞌohofida we dhunia. Naga anaꞌa neehe-ehe ne wiseno hobhine so koanano maitu, patudhuno salenteno anano nadumoꞌue.

⁵ Hobhine amaitu nokoanaꞌao seemie moꞌane somo mahintangino sabhaha bansano liwu naepake katuko uti. Tambaꞌomo anano maitu doagoiꞌe maka doowae ne Lahataꞌala, ne kaengkohaꞌano kumalabhiano.

⁶ Hobhine anaꞌa nofilei we pandaso bhalano, ne kaeateꞌa toka nefontaa-ntaano Lahataꞌala so anoa. Ne watu dadumambaꞌaane nasehewu haa moꞌono nomo fulu oleo kaomponano.

O naga dotaloe 12:7-9

⁷ Pada aitu nandoomo popahisaꞌa te surugaa. Mikael bhe malaꞌekatino dopopahisa dopoewangi bhe naga amaitu. Naga anaꞌa nopopahisa dosuhue dua bhe malaꞌekatino.

⁸ Gahaꞌa o naga dotaloe, sampe anoa bhe malaꞌekatino miinamo daꞌumundaꞌaandaa daeate te surugaa.

⁹ Naga bhalano maitu doꞌohoe we simbali! Anoamo itu ule ngkamukula, neano dokonae Kafeompuꞌando seetani tawa Kolakindo rohi modai, mekakolilinono kosedhuniaꞌae. Anoa doꞌohoe we dhunia dopoowa-owa bhe malaꞌekatino sabhangkaꞌino.

Lagu-laguno kafotalo 12:10-12

¹⁰ Afetingkemo dua suaha te surugaa nohaaꞌi ambano, “Aitu nohatomo kasalamati, kuasa Kafopahintaꞌano Lahataꞌalantoomu, bhe kuasanomo dua Mesias Omputo Fosalamatino, hampano mobhieꞌaono bhahitieꞌintoomu mentae mohondo ne wiseno Lahataꞌalantoomu padamo doꞌohoe ⸤ we simbalino surugaa⸥ .

¹¹ Anoa dotaloane heano Anano Dhumba bhe pugau nesakusiiꞌaondo. Andoa miina daooloanea inawando, dohelasi domate.

¹² Dadiꞌanomo, hintu surugaa bhe kosasawindo meatefie, fowulaomu lalomiu! Tamaka balaamoomu hintimiu wite bhe teꞌi, hampano nosampunikikoomu Kafeompuꞌando seetani weo amahano bhalano; nopandeꞌaane wakutuuno nosekemo.”

O hobhine noꞌambae naga 12:13-18

¹³ Gahaꞌa hato nopandeꞌao lalono doꞌohoemo we dhunia, o naga naꞌa lasao noꞌamba hobhine molenteno anaꞌi moꞌane saꞌituini.

¹⁴ Hobhine aitu dowaꞌane panino bhoa bhalano so nalumolaꞌao te kaeateꞌano te pandaso bhalano. Ne itu dadumambaꞌaane natolu taꞌu setanga kaomponano, nakodoꞌo bhe ule anaꞌa.

¹⁵ Ule anaꞌa nefolua oe nomaiꞌao ne wobhano tapedamo umele noangkafi kundono hobhine amaitu neanomo nawowoꞌoe mawa.

¹⁶ Tamaka hobhine maitu notulumie wite. O wite nofonganga wobhano maka nodoꞌu umele lumimbano ne wobhano naga anaꞌa.

¹⁷ Naga anaꞌa noꞌamaha ne hobhine amaitu lasao nokala nopopahisa noewangi sampuꞌano sigaoꞌano, mie mangkafino pahintano Lahataꞌala bhe mintahakino kafohatono Yesus.

¹⁸ Naga anaꞌa taneehe-ehemo we wiwino teꞌi.