Powoha 11 - Muna Southern Dialect

Dohodua sakusiino Lahataꞌala 11:1-14

¹ Pada anaꞌa dowaꞌa kanaumo wulu sepele nokatu sau kaesukaꞌa bhe dofohato kanau ambado, “Ehe maka sukapi Lambuno Lahataꞌala bhe medha kaetunuꞌa dupa, eapida dua kabhahindo mie sumambaheano ne itu.

² Tamaka kadete we simbalino Lambuno Lahataꞌala heruane ae, koemo sukapiea, hampano padamo dowaꞌandae bansano liwu sigaoꞌano. Andoa maitu daminda-mindaꞌi kota mongkilo nafato fulu haa wula kaomponano.

³ Kaowu Idi amokuasamo dahodua sakusiiku dakosuaha nada anabii bhe daepake kadu ⸤ tandano kaguguhu⸥ nasehewu haa moꞌono nomo fulu oleo kaomponano.”

⁴ Andoa maitu puꞌuno zaitun haa peleno bhe kaengkohaꞌano kantalea haa wuano meehe-eheno ne wiseno Ompuno alamu bhalano.

⁵ Ane bhe mie so mekolea-leaꞌida nalumimba efi namaiꞌao ne olotando wiwindo maka nahumampuni kaewando. Nadamo anaꞌa kotika mie so mekolea-leaꞌida tetewei datipongko.

⁶ Andoa dokokuasa daekunsi lani keana nokoꞌuse tangasano dokosuaha peda anabii. Andoa dokokuasa dua ne sabhaha oe dabhaliiꞌe naembali hea, bhe dokokuasa dua daefosampu sabhaha balaa damepeki dhunia ini nafee-fee pakumo ampa kapoindalondo.

⁷ Damalusi kaowu damodhala takando dembali sakusii, o kadadi maiꞌaono weo olano mate tapa kotompano napopahisa bhe andoa, natumaloda maka namongkoda.

⁸ Maeatindo tanaendole-ndolemo ne kabhongka we kota bhalano. Nea kaꞌibahatino kota anaꞌa Sodom bhe Mesir, kota aitumo dua katikantaiꞌano Ompundo te sau salipu.

⁹ Mie maiꞌaono ne sabhaha bansano liwu, sabhaha sampuꞌa, sabhaha wamba bhe sabhaha siwulu damoha maeatindo tolu oleo sekaꞌindotu kaomponano. Miina daꞌumundaꞌaanda maeatindo dakumobuhuda.

¹⁰ Mie meateno we dhunia daoꞌiaꞌao matendo bhe naowula sepaliꞌa lalondo sampe dohame-hame bhe dopopaka-pakatuꞌao kawaꞌao, mbaꞌinomo kohoduando anabii maitu dosikisaa mpuu mie meateno we dhunia.

¹¹ Nopalusi tolu oleo sekaꞌindotu nopesuakidamo inawa nomaiꞌao ne Lahataꞌala sampe dowanu maiꞌao ne mate lasao doehe. Kosasawindo mie mohada notolau kateꞌindo.

¹² Pada aitu anabii hoduano naꞌa dofetingkemo suaha mondii nomaiꞌao te surugaa nosaliꞌida ambano, “Fonimoomu te ini!” Andoa lasao dofoni te surugaa nokaputida olu, sabhaha kaewando dowohaꞌao wuntano matando.

¹³ Wakutuu aitu dua tambaꞌomo nandoo luali bhalano, sekaompulu dawuꞌa kota nosansamo. Dofitu hewu mateno mbaꞌinomo luali anaꞌa; mie sigaoꞌano doteꞌi sepaliꞌa sampe dofekakalabhia Lahataꞌala te surugaa.

¹⁴ Balaa kahaa iseno nolalomo, natumuluemo dua balaa katolu iseno.

Duhulele kafitu iseno bhe lagu-lagundo kamungkulaꞌi 11:15-19

¹⁵ Pada aitu malaꞌekati kapipituno nobusomo duhuleleno maka notifetingkemo suaha-suaha mohaaꞌi sepaliꞌa weo surugaa, ambado, “Kuasa kafopahintaꞌano dhunia nointahaemo Ompuntoomu bhe Mesias Omputo Fosalamatino, Anoa namahinta nada omputo ampa suhue dhamani.”

¹⁶ Kamungkula haa fulu popaano mengkohano ne wiseno Lahataꞌala te wawono kaengkohaꞌando kumalabhiano, defodapa dotaohao sombado ne Lahataꞌala.

¹⁷ Ambado, “Taefoampe katumpuno lalo ne Hintu Ompu Lahataꞌala Fofoliuno Kuasa, ndumandoono bhe toka ndumandoono, hampano Hintu pakeemo kuasamu bhalano, metandakimo pahinta peda Omputo.

¹⁸ Sabhaha bansando liwu doꞌamaha, tamaka nohatomo amahamu. Aitu nohatomo tempono mie mate dabhotusida, temponomo dua palima-limamu damaꞌanda ponambodo, pedamo dua ne ana-anabii, mie mongkilo, mie moteꞌino neamu, mie mohobu bhe mie bhalano. Temponomo dua damobinasa mie mohansuruno dhunia.”

¹⁹ Tanotilengkamo dua Lambuno Lahataꞌala te surugaa, notiwohamo dua sohongano podhandiꞌa weo Lambuno Lahataꞌala naꞌa. Gahaꞌa wakutuu aitu dua nokobhibhito, nokopisibhela, nokoguntu, nokoluali, bhe nosampu use ngkobhatu nobhie sepaliꞌa.