Powoha 10 - Muna Southern Dialect

Malaꞌekati bhe kaluluno kitabi mohobu 10:1-11

¹ Awohamo dua seemie malaꞌekati kokuasano nosampu nomaiꞌao te surugaa. Pakeano o olu, fotuno nopangalibue toꞌue, ulano tapedamo oleo, bhe aꞌeno pasae kampana ngkamala-mala.

² Ne limano neinta-intaha kaluluno kitabi mohobu padamo dolengkae. Aꞌeno suanano nofofindae we teꞌi, aꞌeno kemano nofofindae we wite.

³ Pada anaꞌa nokei nofekahaa-haaꞌi pedamo kangaano singa. Pada nokei dotobhoosie suahano guntu fitu nduu.

⁴ Sapalusino nokosuaha guntu fitu nduuno maitu, patudhuku abuhie, tamaka taꞌafetingkemo dua suaha nomaiꞌao te surugaa ambano, “Forahasiaꞌe nekosuahaꞌaono guntu fitu nduuno maitu, koise buhiea!”

⁵ Pada anaꞌa malaꞌekati newohaku neehe-ehe we teꞌi bhe we wite naꞌa notaohaomo limano te lani.

⁶ Anoa notunda nosambili Dumadino suhue dhamani, mokonandoono lani bhe sabhaha iꞌino, mokonandoono dhunia bhe sabhaha iꞌino, mokonandoono dua teꞌi bhe sabhaha iꞌino, ambano, “Paemo damodhuluea tempono.

⁷ Tamaka sanatifetingke malaꞌekati kapipituno nabuso duhuleleno, maka nohatomo tempono Lahataꞌala namekakoꞌula patudhuno tifebuniꞌano, peda toka nefohatoꞌaono ana-anabii palima-limano.”

⁸ Suaha nefetingkeku maiꞌao te lani naꞌa, nopugaumo toha ne idi ambano, “Kalamo, ala kaluluno kitabi tilengkano ne limano malaꞌekati meehe-eheno we teꞌi bhe we wite watu.”

⁹ Pada aitu akalamo ne malaꞌekati naꞌa maka aesalo namaꞌa kanau kaluluno kitabi amaitu. Ambano malaꞌekati naꞌa ne idi, “Alae maka humaaꞌe, nahumato weo handamu naopaꞌi, tamaka ne wiwimu numamisie naomeko nada golano ani.”

¹⁰ Aalamo kaluluno kitabi ne limano malaꞌekati maitu maka ahumaaꞌe, ne wiwiku anamisie nomeko peda golano ani, gahaꞌa hato weo handaku nopaꞌi namino.

¹¹ Dofohato kanaumo ambado, “Hintu tetewei kosuaha toha nada anabii, mugauꞌao so kumadhadhiano ne sabhaha bansano liwu, sabhaha siwulu, sabhaha wamba bhe sabhaha omputo.”