Powoha 1 - Muna Southern Dialect

Kafetompunaꞌino 1:1-3

¹ Kitabi aini nokowambaꞌao kafohatono Yesus Kristus nopulaoꞌao so kumadhadhiaꞌano namada kaowu. Kafohato aini nowaꞌane Lahataꞌala namotiwohae ne palima-limaꞌino Lahataꞌala o ae so tetewei kumadhadhiaꞌano mehimba. Kristus netudu malaꞌekatino ne Yohanes, o palima-limano, namosampeane sabhaha kadhadhia anaꞌa.

² Dadiꞌanomo ne ini Yohanes nosakusiiꞌaomo sabhaha newohano: bhoasaono Lahataꞌala bhe kafohatono Yesus Kristus.

³ Dokodawua mpuu mebasano wamba nekosuahaꞌaono anabii aini, dokodawua dua mie metingkeno bhe mangkafino tibuhino weo kitabi aini, kapaꞌamo tempono ⸤ nakumadhadhia⸥ nomaꞌomo.

Salam ne kofitu tombudo umati 1:4-8

⁴ Salam aini nomaiꞌao ne Yohanes so kofitu tombuꞌae umati we kadieno Asia. Sio-siomo sadhia napobhaiangkoomu kabarakati bhe katohopono dadi nomaiꞌao ne Anoa ndumandoono, toka ndumandoono bhe so humatono, bhe nomaiꞌao dua ne kofitu bansaꞌae Rohi ne wiseno kaengkohaꞌano kumalabhiano,

⁵ bhe nomaiꞌao dua ne Yesus Kristus, sakusii tiparasaeano, kabhao-bhaono manuno maiꞌao ne mate bhe kokuasano ne sabhaha omputo ne dhunia ini. Yesusmo ini moasi kaitaomu bhe noangka ne tuhuno heano padamo nofolapa kaita maiꞌao ne dhosa.

⁶ Anoamo humabu kaita mbali bansano liwundo omputo bhe imamu meompuno ne Lahataꞌala Amano. Somo Anoa kakalabhia bhe kuasa suhue dhamani. Amin.

⁷ Ondo kaitaomu, Anoa nahumato te olu kapute bhe sabhaha mie daohae, mahinggamo andoa mada kumahadae. Kosasawindo bansano liwu ne dhunia ini daoꞌaefie. Uumbe mpuu. Amin.

⁸ “Idi ini Alfa bhe Omega ⸤ maꞌanano kabhao-bhaono bhe kafetompaino⸥ ”, pedamo anaꞌa bhoasaono Ompu Lahataꞌala, ndumandoono, toka ndumandoono bhe so humatono, Fofoliuno Kuasa.

Powohano Yohanes we liwutono Patmos 1:9-20

⁹ Idi, Yohanes o bhahitiemiu; peda hintimiu aenamisi dua kasabha, aeala dua dawu weo Kafopahintaꞌano Lahataꞌala bhe akosabaha dua apotaami aantagi kahatoꞌano Yesus. Idi doꞌoho kanau ne liwutono Patmos, hampano aefolele bhoasaono Lahataꞌala bhe kafohatono Yesus.

¹⁰ Ne oleono Ompu nokabhinti kanau Rohino Lahataꞌala maka nomaiꞌao we kundoku afetingke suaha nondii sepaliꞌa tapedamo duhulele bhalano.

¹¹ Ambano suaha anaꞌa, “Newohamu ini buhie weo kitabi maka pakatuandae ne kofitu tombuꞌae umati ini: umati we Efesus, we Smirna, we Pergamus, we Tiatira, we Sardis, we Filadelfia bhe we Laodikia.”

¹² Pada anaꞌa adolimo ameꞌondo bhahaꞌi laꞌae pugauno ne idi maitu, gahaꞌa taꞌawohamo fitu pele kaengkohaꞌano kantalea nomaiꞌao ne bulawa.

¹³ Ne wunta-wuntano kaengkohaꞌano kantalea naꞌa nandoo seemie pasae Anano Manusia nedhuba kawanta ampa we wawono aꞌeno, mbadhano nowaweꞌiane kagege bulawa.

¹⁴ Fotuno bhe wuluno fotuno nopute sepaliꞌa pedamo wuluno dhumba kapute bhe kambano kapa, pakade matano pasae hendeno efi.

¹⁵ Aꞌeno nokonginda peda tambaga ngkamala-mala weo efi, suahano pasae guhuntumano luano oe bhalano.

¹⁶ Ne suanano neinta-intaha kulipopo fitu ulu, nomaiꞌao ne olotano wiwino nolimba kampue mohoko nokomata haa weta bhe ulano nokotilanga pasae oleo toho indotuno.

¹⁷ Saꞌawohae, lasao aefodapa ne aꞌeno tapedamo mie mate, tamaka Anoa tanotei limano suanano te wawoku bhe nopugau ambano, “Koise moteꞌia! Idimo ini kabhao-bhaono bhe kafetompaino.

¹⁸ Idimo dumadino, padamo amate, tamaka ondo kanau itu, ingka adadimo ampa suhue dhamani. Idimo mintahano kunsino mate bhe dhuniano mate.

¹⁹ Dadiꞌanomo buhie newohamu ini, naetaa kumadhadhiaꞌano aitu naetaa so kumadhadhiaꞌano mada kaowu.

²⁰ Rahasiano kulipopo fitu uluno newohamu kaintahaꞌaku ne suanaku, bhe rahasiano kaengkohaꞌano kantalea bulawa fitu peleno peda aini: kulipopo fitu uluno, maꞌanano o malaꞌekatindo kofitu tombudo umati; kaengkohaꞌano kantalea fitu peleno, maꞌanano wutondomo umati fitu tombuno.”