Matius 9 - Muna Southern Dialect

Yesus nefekaꞌosa kalu 9:1-8

¹ Nopalusi anaꞌa, Yesus nosawimo ne bhangka, nolimba we sewetano maka nohato toha we liwuno.

² Ne itu deowaanemo seemie kalu, nendole-ndole ne kaodoꞌano. Nowoha kabhalano kaparasaeando maitu, Yesus nopugaumo ne kalu naꞌa ambano, “Fekatangka lalomu sabhangka, dhosamu notiꞌamponimo.”

³ Dofetingke peda naꞌa pande-pande Kitabi nokodukumo we lalondo, “Mie aini nopototoꞌao wutono bhe Lahataꞌala, ingka nofekaꞌaebumo Lahataꞌala.”

⁴ Tamaka Yesus nopandeꞌaane nefekihindo, maka ambano, “Noafa kofekihi modaiꞌaoꞌomu?

⁵ Nomuda ae bhahaa, apugauꞌao, ‘Dhosamu notiꞌamponimo’ bhahaꞌi apugauꞌao ‘Wanumo maka kala’?

⁶ Amotiwohaangkoomu Anano Manusia - Idimo ini - nokokuasa neꞌamponi dhosa te dhunia ini.” Maka nopugau ne kalu naꞌa, “Wanuꞌo toha, sangke kaodoꞌamu itu maka suli se lambumu.”

⁷ Mie kalu naꞌa lasao nowanu maka nosuli se lambuno.

⁸ Mie bhahi mohano kadhadhia aitu doteꞌi bhe dopudhi Lahataꞌala maꞌaono kuasa bhalano pedando aitu ne manusia.

Matius mealano sewa noangkafi Yesus 9:9-13

⁹ Hato nokala nomaiꞌao ne itu, Yesus newohamo seemie nengkoha-ngkoha weo lambu kaesaloꞌa sewa. Neano mie anaꞌa Matius. Ambano Yesus, “Angkafi kanau.” Matius lasao noehe maka noangkafie.

¹⁰ Pada anaꞌa, tangasano Yesus nohumaa we lambuno Matius, dobhahi mealano sewa sigaoꞌano bhe mie kodhosa domaimo dua. Andoa ini dohumaa dopombali-mbali bhe Yesus bhe anaguhuꞌino.

¹¹ Dowoha peda naꞌa, miendo Farisi dopugaumo ne anaguhuꞌino ambado, “Noafa gahaꞌa gurumiu nohumaa nopombali-mbali bhe mealano sewa bhe mie kodhosa maitu?”

¹² Yesus nofetingkeda, maka ambano, “Suano mie metaano namisi mefaraluuno foagono, mpahinomo mie mosaki.

¹³ Dadiꞌanomo kalamoomu, maꞌanakiomu wambano Kitabi aini, ⸤ Ambano Lahataꞌala⸥ ‘Kapoindaloku dopomobhela-bhelaꞌao lalo, suano kapopanga’, kapaꞌamo kahatoꞌaku miina aeꞌondofi mie mongkilo, tamaka mie kodhosa.”

Dopoasa 9:14-17

¹⁴ Palusi anaꞌa domaimo anaguhuꞌino Yohanes Fokadiuno ne Yesus, bhe dopugau ambado, “Noafa gahaꞌa insaodi bhe miendo Farisi tapoasa tamaka anaguhuꞌimu ingka miina?”

¹⁵ Notobhoosi Yesus ambano, “Naembali bhahaa sabhangkaꞌino loꞌia buꞌou daguguhu tangasano nopobhaianda loꞌia buꞌou? Tantumo paise. Tamaka nahumato tempono, loꞌia buꞌou dawowoꞌoemo. Ne naꞌa kaneꞌomo damoasa.

¹⁶ Ane detabha nggasi, miina bhe mepakeno kabhini buꞌou pataꞌo mokuhuno. Kapaꞌamo kabhini medano aitu nahumela nggasi maitu, sampe nadhumulu kabhensino.

¹⁷ Pedamo dua naꞌa, miina nandumandooa mie mefosingiꞌino angguru buꞌou ne kaenteiꞌa katembuno, kapaꞌamo ane nada naꞌa so kaowu naowengkaꞌao kaenteiꞌano. Angguruno nabinasa, kaenteiꞌano nahumansuru. Tamaka angguru buꞌou tetewei datumeiꞌe dua ne kaenteiꞌa buꞌou, neanomo kohaahondaꞌae sadaa-daa kataano.”

Yesus nofodadi anano Yairus bhe nefekaꞌosa seemie hobhine 9:18-26

¹⁸ Tangasano Yesus nopuga-pugau peda naꞌa bhe andoa, nomaimo seemie mandeꞌaono lambu kasambaheaꞌa. Sahatono notaohao sombano ne Yesus bhe nopugau ambano, “Anaku hobhine kaneꞌo nobhotu, mai tei limamu te wawono neanomo sumuli nadumadi.”

¹⁹ Yesus noehe maka noangkafi mie anaꞌa, nopoowa-owa bhe anaguhuꞌino.

²⁰ Wakutuu aitu nandoo seemie hobhine ompulu haa taꞌumo nomaiꞌie kansuhu wulano miina bhe katiehea. Hobhine aini nomaꞌoti Yesus maiꞌao we kundo maka nodingku dhambe-dhambeno dhubano.

²¹ Dukuno lalono, “Sumanomo taꞌadumingku kaowu dhubano aoꞌosamo.”

²² Tamaka Yesus nodoli, nowohamo hobhine amaitu bhe nopugau ambano, “Fekatangka lalomu waꞌina, hampano kaparasaeamu ne Idi moꞌosamo.” Notanda aitu hobhine naꞌa noꞌosamo.

²³ Nohato se lambuno neangkando mandeꞌaono lambu kasambaheaꞌa saꞌituini, Yesus nowoha mie mepuntono suli ⸤ katandaino kaguguhuno lalo⸥ bhe mie sigaoꞌano dohobho sepaliꞌa.

²⁴ Ambano Yesus, “Gampiomu, kapaꞌamo anaꞌi aini miina namatea, tamaka noodo.” Tamaka tadofuta-futaaꞌi.

²⁵ Pada dogihasi mie bhahi maitu, Yesus nopesuamo nointaha limano anaꞌi anaꞌa. Anaꞌi aitu lasao nowanu.

²⁶ Bhihitano kadhadhia amaitu nokolele ne kosekaꞌewaꞌae kadie aitu.

Yesus nefowula matando kabunto dohodua

²⁷ Yesus nofopansuhumo kala-kalano, gahaꞌa doangkafie dohodua kabunto bhe dekei-kei ambado, “Mobhela kainsami lalo, sampuꞌano Daud!”

²⁸ Sanopesua ne seꞌonu lambu, kabunto hoduano maitu domaiꞌiemo. Yesus nofeenadamo ambano, “Parasaeaꞌomu bhahaa naembali amekaꞌosakoomu?” Ambado, “Taparasaea, Waompu.”

²⁹ Pada aitu Yesus nofedampamo matando bhe nopugau ambano, “Nokadhadhiaꞌo toha peda neparasaeamiu itu.”

³⁰ Matando lasao nentalea. Yesus nofodhagadamo ambano, “Posiꞌondoomu koise mekapuna ne laꞌae maka dua.”

³¹ Tamaka kohoduando dokala dofolele bhihitano Yesus ne kosekaꞌewaꞌae kadie aitu.

Yesus nefekaꞌosa seemie bhea 9:32-34

³² Dokala kaowu mie hoduano naꞌa, deowamo dua seemie bhea nepesuakino seetani ne Yesus.

³³ Pada nofolimba seetani naꞌa, bhea aitu lasao nopande nopugau. Mie bhahi tadomente, ambado, “Kadhadhia pedando ini miinaꞌo daohoohaomua ne witeno Israel inia.”

³⁴ Tamaka ambado miendo Farisi, “Anoa ini nefolimba seetani, nopake kuasano Kafeompuꞌando seetani.”

Yesus nobhela lalono ne mie bhahi 9:35-38

³⁵ Pedamo aitu, Yesus noliligi kota bhe liwu ne itu, nofofoinaꞌu weo lambu kasambaheaꞌa bhe nefolele Bhihita Metaano Kafopahintaꞌano Lahataꞌala, poowa nefekasali sabhaha saki bhe kadaino namisi.

³⁶ Nowoha mie bhahi maitu, Yesus nobhelaandamo lalono, kapaꞌamo dongawamo bhe miinamo dakototonolaloa, tapedamo dhumba tapa kodhagaꞌano.

³⁷ Nopugaumo Yesus ne anaguhuꞌino ambano, “Pehapi so netobhe nobhahi, tamaka kumahadhaano dendai.

³⁸ Dadiꞌanomo mesaloomu ne kokaampono naꞌa, naetudu mie dakumala datumobhe.”