Matius 8 - Muna Southern Dialect

Yesus nefekaꞌosa seemie kokuli modaino 8:1-4

¹ Sasampuno Yesus nomaiꞌao te kabhawo, doangkafiemo mie bhahi.

² Nomaiꞌiemo seemie kokuli modaino, maka notaohao sombano bhe nopugau ambano, “Waompu, ane umunda, tetewei naembali mekaꞌosa kanau.”

³ Yesus nofonsoho limano, nodampasi mie amaitu bhe nopugau ambano, “Aꞌunda, monggelaꞌo toha.” Mie aitu lasao noꞌosa, kulino nonggelamo.

⁴ Ambano toha Yesus, “Tandaiꞌe, koise mekapu-kapuna ne laꞌae maka dua, ampamo kaowu kalamo fotiwoha wutomu ne imamu. Namada aitu meowa kapopanga ne Lahataꞌala peda neowiliꞌaono anabii Musa, so netandaindo mie bhahi putae hintu moꞌosamo.”

Yesus nofekaꞌosa bhatuano neangkando tantara we Kapernaum 8:5-13

⁵ Hato nopesua we Kapernaum, nopoꞌawaanemo seemie neangkando tantarando Roma, nefetulumi ne Yesus.

⁶ Ambano, “Waompu, bhatuaku we lambu nokalu, sandole; nokadee-deemo sepaliꞌa.”

⁷ Ambano Yesus, “Amai amekaꞌosae.”

⁸ Tamaka ambano neangkando tantara maitu, “Waompu, miina amantasia mesuaki lambuku; tapugaumo nasewobha wamba, maka bhatuaku maitu teteweimo naoꞌosa.

⁹ Kapaꞌamo idi ini bhe neangkaku dua maka nandoo dua tantara neowaku. Ane apugau ne seemie tantara, ‘Kala!’, lasao nokala. Pedamo dua apugau, ‘Mai!’ lasao nomai, bhahaꞌi apugau ne bhatuaku, ‘Kahadhaa aini!’, lasao nokahadhaaꞌe.”

¹⁰ Nofetingke peda naꞌa, Yesus nomente sepaliꞌa, maka nopugau ne mie mangkafie ambano, “Amohatokoomu, kotu-kotuꞌu kabhalano kaparasaea medando ini miinaꞌo apoꞌawaane ne olotando miendo Israel.

¹¹ Amohatokoomu, dabhahi mie so humatono damaiꞌao te mata oleo bhe we kansoopa maka daomaa dapombali-mbali bhe Abraham, Ishak bhe Yakub weo Kafopahintaꞌano Lahataꞌala.

¹² Tamaka so talaꞌano mie membalino umatino Lahataꞌala ⸤ miendo Israel, awuaꞌino Abraham⸥ , daꞌumohofida weo doloma mposo. Ne naꞌa taꞌo kangkoꞌae bhe kuꞌino wangka.”

¹³ Pada anaꞌa nopugaumo Yesus ne meangkando tantara maitu ambano, “Nakumadhadhiamo peda kaparasaeamu itu.” Wakutuu aitu dua bhatua naꞌa lasao noꞌosa.

Yesus nofekaꞌosa inano hobhineno Petrus bhe mie sigaoꞌano dua 8:14-17

¹⁴ Nohato se lambuno Petrus, Yesus nowoha poniano Petrus nendole-ndole nosodoe.

¹⁵ Anoa nointahamo limano hobhine naꞌa, gahaꞌa sodono lasao nopada, maka nowanu noꞌondofao Yesus.

¹⁶ Nosoo kaowu oleo, Yesus deowaꞌianemo mie nepesuakino seetani. Yesus tanopugaumo kaowu sewobha wamba, seetani andoa maitu dopuli dolimba. Anoa nofekaꞌosa dua kosasawindo mie mosakino.

¹⁷ Kadhadhia aini mbalimo nokoꞌulaꞌao bhoasaono Lahataꞌala nefosampeno anabii Yesaya peda aini, “Anoamo sumodano sakintoomu, wowoꞌonomo dua kadaino namisintoomu.”

Mie so mangkafino Yesus 8:18-22

¹⁸ Nowoha mie bhahi maitu dolibu-libue, notudumo anaguhuꞌino dapolimba we sewetano teꞌi.

¹⁹ Nomaimo seemie pande Kitabi, ambano, “Guru, amangkafiko ne amai maka dua so kakalaꞌamu.”

²⁰ Yesus notobhoosimo ambano, “Daꞌu ngkahoku bhe liano, kaꞌuhi lumola bhe kaufeno, tamaka Anano Manusia - Idimo ini - miina sepaliꞌa bhe katifekalaaꞌiꞌano towuno.”

²¹ Seemie dua mangkafie nopugaumo, ambano, “Ompu, folalesa kanau asumuli kadeki akumobuhu amaku.”

²² Tamaka Yesus notobhoosi, “Angkafi kanau, hunsaꞌanomo mie mate dakumobuhu mie mate bhaindo.”

Yesus nefoonto kawea mongkolo 8:23-27

²³ Yesus nosawimo toha ne bhangka doangkafie bhe anaguhuꞌino.

²⁴ Gahaꞌa tanosihatoꞌamo kawea mongkolo, bhangkando netaa nohambi-hambitaꞌiane ewo, tamaka Yesus noodo.

²⁵ Anaguhuꞌino domaimo dofowanue, ambado, “Waompu, tulumi kainsami! Ingka dabinasamoomu.”

²⁶ Yesus tanopugau ambano, “Noafa gahaꞌa moteꞌiꞌaoꞌomu? Kakuhano maka kaparasaeamiu!” Pada anaꞌa nowanumo, nobhoohai kawea bhe oeno teꞌi maitu. O teꞌi lasao nolinto.

²⁷ Anaguhuꞌino maitu domente sepaliꞌa, ambado, “O mie ae bhahaa Anoa ini, sampe kawea bhe oe doangkafi dua pahintano?”

Yesus nefekaꞌosa dohodua mie nepesuakino seetani 8:28-34

²⁸ Sahatono we sewetano teꞌi, we liwuno miendo Gadara, domaimo dohodua mie nepesuakino seetani, dopoꞌawaꞌao Yesus. Andoa ini domaiꞌao te tombuno lia kafokobuhuꞌa. Dotimoteꞌi sepaliꞌa sampe bhe naseemie miinamo bhe mokadono namangka ne itu.

²⁹ Andoa dopokakei-kei ambado, “Anano Lahataꞌala, mai mafaꞌi kainsami gahaꞌa? Patudhumu maimo modee-dee kainsami, mahingga paeꞌo nahumato tempono?”

³⁰ Miina nakodoꞌoa bhe andoa maitu nandoo kawaindo wewi nekanea tangasano doliwu.

³¹ Seetaniꞌi maitu desalomo ne Yesus ambado, “Ane molimba kainsami, tudu kainsami tamesua weo kawaindo wewi atatu.”

³² Ambano Yesus, “Kalamoomu!” Seetaniꞌi maitu lasao dolimba maka dopesuaki kawaindo wewi naꞌa. Kosekawaindo wewi maitu dofilei we wiwino pimpi maka doꞌohofi wutondo weo teꞌi sampe dolomo.

³³ Mie dhumaganino wewi maitu lasao dofilei we liwu. Dohato ne watu, detula-tulaꞌaomo kosasawiꞌae kumadhadhiaꞌano. Detula-tulaꞌaomo dua kumadhadhiaꞌano ne mie hoduano nepesuakino seetani maitu.

³⁴ Dofetingke peda naꞌa kosasawindo mieno liwu domaiꞌimo Yesus. Hato dopoꞌawaane, desalo mpuu nakumalamo nahumunsa liwundo.