Matius 5 - Muna Southern Dialect

Kafoinaꞌu te wawono kabhawo 5:1-2

¹ Nowoha mie bhahi maitu, Yesus nofonimo te kabhawo. Nengkoha kaowu domaiꞌiemo anaguhuꞌino.

² Yesus nelengkaandamo pugau bhe nofoinaꞌuda ambano,

Wambano dawua 5:3-12

³ “Dokodawua mpuu mie ngkumaasi-asino masandeno ne Ompu, kapaꞌamo andoamo so mehapino Kafopahintaꞌano Lahataꞌala.

⁴ Dokodawua mpuu mopeano lalo, kapaꞌamo nalumawesida Lahataꞌala.

⁵ Dokodawua mpuu momaluno lalo, kapaꞌamo dhunia somo fehebuaꞌando.

⁶ Dokodawua mpuu mokambano lalo ne kabanara, kapaꞌamo Lahataꞌala namaꞌandae nemokambaꞌaondo.

⁷ Dokodawua mpuu mobhelano lalo ne manusia bhaindo, kapaꞌamo Lahataꞌala naobhelaanda dua lalo.

⁸ Dokodawua mpuu mongkilono lalo, kapaꞌamo damoha Lahataꞌala.

⁹ Dokodawua mpuu meowano pometaa, kapaꞌamo dakumonada anaꞌino Lahataꞌala.

¹⁰ Dokodawua mpuu mie nefodee-dee hampano doangkafi kapoindalono Lahataꞌala, kapaꞌamo andoamo so mehapino Kafopahintaꞌano Lahataꞌala.

¹¹ Kodawuaꞌomu, ane damewambakikoomu, damodee-deekoomu bhe daꞌumumbuangkoomu modaiꞌano hampano angkafiomu Idi.

¹² Fowula lalomiu, moꞌiaꞌomu, kapaꞌamo ponambomiu te surugaa nabhahi. Ingka pedamo dua naꞌa defodee-dee ana-anabii dumadino wawo bhe hintimiu.”

O gaha bhe kantaleano dhunia 5:13-16

¹³ “Hintimiu itu dimbano gaha we dhunia. Ane o gaha naotembe, damekakahaane dua ae? Ingka miinamo nakofahalaaꞌa, tadaꞌumoho maka dapokafindaꞌiane.

¹⁴ Hintimiu itu kantalea we dhunia. Seꞌonu kota te wawono kabhawo tetewei paise natifebunia.

¹⁵ Miina dua bhe mesulano kantalea maka dosongkowiane bhengki, tamaka tetewei dohunsae ne kangkailaoꞌano mbali dentaleaꞌane kosasawindo mie weo lambu.

¹⁶ Pedamo aitu dua tilangamiu tabeano naentalea ne wisendo mie bhaimiu, dowohaꞌao podiumiu metaaꞌano so damudhiꞌao Amamiu te surugaa.”

Yesus bhe Pahintano anabii Musa 5:17-48

¹⁷ “Koise kofekihiomu, Idi ini amai amosali tubhono agama Yahudi bhe Kitabindo ana-anabii. Idi amai paise amosaliea tamaka amosusuangkoomu maꞌanano sakotuꞌuno.

¹⁸ Amohatokoomu, kotu-kotuꞌu ane lani bhe dhunia paeꞌo naosalia, bhe nasehorofu tawa setanda tubhono agama Yahudi pae dua bhe so mosaliꞌano, ampa kosasawiꞌae nakoꞌula.

¹⁹ Dadiꞌanomo laꞌae so kumamudaino tubhono agama Yahudi mahingga pahinta foliuno kahobu, maka namoguhuandae dua bhaindo, naeꞌawa kaengkohaꞌa foliuno kapanda weo Kafopahintaꞌano Lahataꞌala. Tamaka laꞌae mangkafino bhe fofoguhuꞌaono kosasawiꞌae pahinta anaꞌa, naeꞌawa kaengkohaꞌa foliuno kalangke weo Kafopahintaꞌano Lahataꞌala.

²⁰ Amohatokoomu, kotu-kotuꞌu pae bhe kapoolia mesuaꞌomu weo Kafopahintaꞌano Lahataꞌala, simbali podiumiu poangkafiꞌano bhe kapoindalono Lahataꞌala namoliu podiundo pande-pande Kitabi bhe miendo Farisi.

²¹ Ingka fetingkeemoomu nekobhoasaꞌaono Lahataꞌala ne awuaꞌintoomua, ‘Koise fopongko, laꞌae fopongkono dahumukumue’.

²² Tamaka ambaku Idi, laꞌae umamahano ne bhahitieno tetewei dahumukumue. Laꞌae mugauno ne bhahitieno, ‘Hintu itu kaafihi!’ tetewei dabhitahakie Sahano Agama. Laꞌae mugauno, ‘Hintu itu notolau kabhohemu!’ tetewei daꞌumohoe weo efino narakaa ngkalai-laiꞌano.

²³ Dadiꞌanomo, ane moowa kapopangamu so Lahataꞌala te wawono medha kaefoampeꞌa, gahaꞌa nokofeꞌulai lalomu ingka nandoo bhe bhahitiemu moleano lalo ne hintu,

²⁴ hunsa kadeki kapopangamu ne wiseno medha kaefoampeꞌa naꞌa, maka suli pometaa bhe bhahitiemu naꞌa. Namada aitu maka suli foampe kapopangamu.

²⁵ Ane bhe so mobhieangko, lasao pometaaꞌane tinangke we laano sala, keana nosungkuangko ne pande bhitaha. Kapaꞌamo ane nahumatomo ne pande bhitaha, namowako ne limando dhagano katohongku maka damopesuako weo katohongku.

²⁶ Amohatokoomu, kotu-kotuꞌu paise sepaliꞌa damolimbakoomua ane paeꞌo momeaꞌe kosasawiꞌae dosamu.

²⁷ Ingka fetingkeemoomu dua, ‘Koise monsulea!’

²⁸ Tamaka ambaku Idi, ane seemie moꞌane nowoha hobhine maka lasao gaono napomoodofiane, ingka nomonsuleanemo weo totono lalono.

²⁹ Ane matamu suana naehabuangko dhosa, sungkie maka ohoe! Naetaa mobunto sembali bhe nasumangka mbadhamu, tamaka daꞌumohoko weo narakaa.

³⁰ Ane limamu suana naehabuangko dhosa, totoe maka ohoe! Naetaa kolima sembali bhe nasumangka mbadhamu, tamaka mesua narakaa.

³¹ Nokobhoasaane dua Lahataꞌala peda aini, ‘Ane dohunsa mieno lambudo tetewei debuhiane bhe suhano’.

³² Tamaka ambaku Idi, ane seemie moꞌane nohunsa mieno lambuno gahaꞌa mieno lambuno maitu miina namonsule, ingka nehabuanemo dhala so namonsuleꞌao ane hobhine anaꞌa nogaa toha. Laꞌae gumaano bhe hobhine nehunsa, nomonsulemo dua.

³³ Ingka fetingkeemoomu dua nekobhoasaꞌaono Lahataꞌala ne awuaꞌintoomu, ‘Koise podhandi sampe femata, tamaka o ae nepodhandiꞌaomu ne wiseno Ompu tetewei dhalangie’.

³⁴ Tamaka ambaku Idi, koise sepaliꞌa podhandi bhe femata putae nandoo bhe foꞌondo-ondono, ibahano nandoo bhe lani foꞌondo-ondono, kapaꞌamo lani kaengkohaꞌano Lahataꞌala.

³⁵ Koise dua podhandi bhe femata nandoo bhe wite fofetingkeno, kapaꞌamo wite kafindaꞌano Lahataꞌala. Koise dua podhandi bhe femata sambili kotano Yerusalem, kapaꞌamo Yerusalem kota kaeateꞌano Omputo Bhalano.

³⁶ Koise dua podhandi bhe femata sambili fotumu, kapaꞌamo miina bhe kuasamu mekapute tawa mekaꞌito wuluno fotumu mahingga nasetangke.

³⁷ Dadiꞌanomo ane patudhumu uumbe, tafokoꞌuumbemo; ane patudhumu paise, tafokopaisemo. Labhino anaꞌa, nomaiꞌao ne Kafeompuꞌando seetani.

³⁸ Fetingkeemoomu dua bhoasaono Lahataꞌala, ‘Mata dololiane mata, wangka dololiane wangka’.

³⁹ Tamaka ambaku Idi, koise bholosia ne mie humabu modaino ne hintu. Ane dotofa bhagamu we suana, fodoliane dua bhe kemamu.

⁴⁰ Ane mie nosungkuangko mbaꞌinomo nopoindalo namala bhadhumu, waꞌane dua bhe bhetamu.

⁴¹ Ane seemie kafeompuꞌa nofosuhuko tumongkuane wowoꞌono nasekilo kakodoꞌono, poangkafiane nahaa kilo.

⁴² Ane bhe konisalono, waꞌanda; koise mokiido ane dakoniada.

⁴³ Fetingkeemoomu dua bhoasaono Lahataꞌala, ‘Moasianda mie bhaimu, bansida kaewamu’.

⁴⁴ Tamaka ambaku Idi, moasianda kaewamu bhe sambaheaꞌanda mie modee-deeko.

⁴⁵ Kapaꞌamo nadamo aini so membaliꞌaoꞌomu anaꞌino Amamiu te surugaa. Anoa nofofoni oleono so mie modai bhe so mie metaa, nofosampu useno so mie banara bhe so mie pata banara.

⁴⁶ Ane moasiꞌaoꞌomu kaowu mie moasiangkoomu, so dua ae Lahataꞌala namonambokoomu? Ingka mahingga mie mesalono sewa dohabu dua peda naꞌa.

⁴⁷ Ane pofendeꞌaoꞌomu kaowu bhe bhahitieꞌimiu, o ae poꞌalaꞌano bhe habundo mie bhaimiu? Ingka mahingga mie pata mandeꞌaono Lahataꞌala dohabu dua peda naꞌa.

⁴⁸ Dadiꞌanomo tabeano nasumangka totono lalomiu, peda Amamiu te surugaa.”