Matius 4 - Muna Southern Dialect

Yesus nosobae Kafeompuꞌando seetani we pandaso bhalano 4:1-11

¹ Pada anaꞌa Yesus nowowoꞌoe Rohino Lahataꞌala we pandaso bhalano so naeꞌawaꞌao kasobano Kafeompuꞌando seetani.

² Pada nopoasa fato fuluꞌa ole-oleono koho-kohondoꞌano, panda-pandano Yesus noꞌahomo.

³ Gahaꞌa nomaimo Fosobano maitu bhe nopugau ambano, “Ane hintu ini Anano Lahataꞌala, soba tududa kontu ini daembali roti.”

⁴ Yesus tanotobhoosi, “Nandoo notibuhi weo Kitabi, ‘Suano kaowu taꞌo roti kaoꞌuhiꞌando manusia, tamaka o ae nekobhoasaono Lahataꞌala doꞌuhiane dua.’ ”

⁵ Pada aitu Kafeompuꞌando seetani noowamo Yesus we kota mongkilo, ⸤ Yerusalem,⸥ maka noampee te kabubuno Lambuno Lahataꞌala,

⁶ bhe nopugau ambano, “Ane hintu ini Anano Lahataꞌala, soba oho wutomu we panda, kapaꞌamo notibuhi, ‘Lahataꞌala natumudu malaꞌekatino dakumantafeko keana notompalo aꞌemu ne kontu.’ ”

⁷ Yesus notobhoosie ambano, “Notibuhi dua weo Kitabi, ‘Koe sobaea Ompu Lahataꞌalamu!’ ”

⁸ Pada aitu Kafeompuꞌando seetani noowamo toha Yesus ne seꞌonu kabhawo melangkeꞌano maka nofotiwohaane kosasawiꞌae kakolakiꞌano dhunia bhe sabhaha kahangkaeano,

⁹ bhe nopugau ambano, “Kosasawiꞌae maitu amaꞌangkoe, sumanomo sudhu bhe taohao sombamu ne idi.”

¹⁰ Yesus tanotobhoosi ambano, “Gampimo, seetani! Kapaꞌamo notibuhi, ‘Taohao sombamu ne Ompu Lahataꞌalamu, ampamo kaowu Anoa so nefeompuniꞌimua!’ ”

¹¹ Panda-pandano Yesus nohunsaemo Kafeompuꞌando seetani, maka dohatomo malaꞌekati doꞌondofaane.

Yesus notandakimo kahadhaano we Galilea 4:12-17

¹² Nofetingke kaowu Yohanes dotohongkue, Yesus nogampimo we kadieno Galilea.

¹³ Anoa nohunsamo Nasaret maka neate we Kapernaum, seꞌonu liwu ne wiwino teꞌino Galilea, we kadieno Zebulon bhe Naftali.

¹⁴ Aini nokadhadhia mbali nokoꞌulaꞌao nefosampeno anabii Yesaya,

¹⁵ “Miendo witeno Zebulon bhe witeno Naftali, ne kaangkaꞌa humopeꞌano we teꞌi, kadie we sewetano umeleno Yordan, o mieno Galilea, witendo mie suano Yahudi!

¹⁶ Mie dumadino weo kahohondo, dowohamo tilanga bhalano; meateno we liwu mewisekino mate, noumbatidamo tilanga.”

¹⁷ Notandamo ne naꞌa Yesus nofolelemo, “Fetompaaneomu dhosamiu, doliomu ne Lahataꞌala, kapaꞌamo Kafopahintaꞌano Lahataꞌala nomaꞌomo!”

Yesus nosaliꞌi anaguhuno kabhao-bhaono 4:18-22

¹⁸ Wakutuuno Yesus nokala nosohaki wiwino teꞌino Galilea, nowohamo mie dohodua. Andoa ini dosikakutaꞌa, neando Simon nekonando dua Petrus, bhe Andreas kakutaꞌano. Andoa ini tangasano debuani we teꞌi, hampano andoa maitu pande kenta.

¹⁹ Yesus nopugauandamo ambano, “Mai angkafi kanauꞌomu, amoguhukoomu so mebuanino manusia.”

²⁰ Buanindo tadohunsa maka doangkafi Yesus.

²¹ Yesus nofopansuhu kala-kalano maka nowohamo dua mie dohodua dosikakutaꞌa, neando Yakobus bhe Yohanes, anaꞌino Zebedeus. Dopoowa bhe Zebedeus, amando, andoa ini nandoo dofosintuwu pukando weo bhangka. Yesus nosaliꞌidamo dua.

²² Andoa lasao dohunsa bhangka bhe amando maka doangkafie.

Yesus nofofoinaꞌu bhe dobhahi mie nefekaꞌosano 4:23-25

²³ Yesus noangkai kosekaꞌewaꞌae kadieno Galilea, nofofoinaꞌu ne lambu-lambu kasambaheaꞌa. Anoa nefolele Bhihita Metaa Kafopahintaꞌano Lahataꞌala, poowa nefekaꞌosa sabhaha mie mosaki bhe modaino namisi ne liwu aitu.

²⁴ Bhihitano Yesus ini nokolelemo ne kosekaꞌewaꞌae kadieno Siria, sampe deowaꞌianemo mie menamisino sabhaha saki, kakadee-dee bhe kadaino namisi, mie nepesuakino seetani, mate manuno bhe mokaluno. Kosasawindo naꞌa nofekaꞌosada.

²⁵ Mie bhahi dosipumpu doangkafie. Nandoo maiꞌaono we kadieno Galilea bhe Dekapolis, maiꞌaono we Yerusalem bhe we Yudea bhe maiꞌaono we sewetano umeleno Yordan.