Matius 3 - Muna Southern Dialect

Yohanes Fokadiuno 3:1-12

¹ Ne wakutuu anaꞌa notiumbamo Yohanes Fokadiuno we pandaso bhalano ne kadieno Yudea. Anoa nefolele Bhihita Metaa,

² ambano, “Fetompaꞌao dhosamiu, doliomu ne Lahataꞌala, kapaꞌamo Kafopahintaꞌano Lahataꞌala nomaꞌomo.”

³ Yohanesmo ini nepulaoꞌaono anabii Yesaya ambano, “Nandoo suaha mekei-keino we pandaso bhalano, ‘Mebhongkaomu kaangkaꞌa so Ompu fekalaaꞌeomu so kaangkaꞌano.’ ”

⁴ Pakeano Yohanes wuluno unta, kagegeno o kuli. Nehumaano kapunda bhe golano kainiua.

⁵ Dobhahi mie maino ne Yohanes, maiꞌaono we Yerusalem, maiꞌaono ne kosekaꞌewaꞌae kadieno Yudea bhe maiꞌaono ne sabhaha kadie ne owano umeleno Yordan.

⁶ Mie andoa ini dekapuna domangakuꞌao dhosando maka nokadiuda Yohanes we umeleno Yordan.

⁷ Dobhahi dua miendo Farisi bhe miendo Saduki mefekadiuno. Sanowohada, Yohanes nopugaumo ambano, “Hintimiu ini sampuꞌano ule modai. Ambamo laꞌae bhahaa lumapaomu ne amahano Lahataꞌala so humatoꞌano?

⁸ Dadiꞌanomo fotiwohaeꞌomu ne podiumiu, ingka gahaꞌa fetompaanemoomu dhosamiu.

⁹ Koise nokofekihi we lalomiu, ‘Ingka insaodi ini sampuꞌano Abraham, ⸤ tetewei tasumalamati⸥ ’. Kapaꞌamo Lahataꞌala nokokuasa naefokonandoo sampuꞌano Abraham mahinggamo namaiꞌao ne kontu ini.

¹⁰ Polulu nokantaa-ntaamo ne pahakano sau. Sabhaha sau tapa mokesaꞌano bhake tetewei datumuꞌoe maka daꞌumohoe weo efi.

¹¹ Idi akadiuangkoomu oe mbali katandaino fetompaꞌao dhosamiu, tamaka so humatono mada kaowu nofoliu kanau kuasa. Mahingga alumense katapuno kaampinino pae amantasia. Anoa naꞌa nakumadiuangkoomu Rohino Lahataꞌala bhe efino.

¹² Katepi nontiintahaemo so natumepisaoꞌao gandum ampa naonggela. Onuno gandum nahumompunaane weo lambu kaenteiꞌa oti, tamaka kulino bhe kansiano laano natumunuane efi tapa mopoopeono.”

Yesus nokadiuꞌe Yohanes 3:13-17

¹³ Wakutuu anaꞌa nohatomo Yesus we umeleno Yordan nomaiꞌao we Galilea, nefekadiu ne Yohanes.

¹⁴ Tamaka Yohanes miina naꞌumundaꞌaanea ambano, “Ingka tabeano idi so nekadiumu, peda amai dua hintu maiꞌi kanau?”

¹⁵ Nopugaumo Yesus ambano, “Hunsaꞌanomo aitu, kapaꞌamo nofaraluu peda aini so damangkafiꞌao kosasawiꞌae kapoindalono Lahataꞌala.” Dadiꞌanomo Yohanes noangkafie kamesalono.

¹⁶ Pada nokadiuꞌe, Yesus lasao nolimba maiꞌao weo oe, gahaꞌa tanosimoengkaꞌamo lani maka nowoha Rohino Lahataꞌala nokatu futeꞌo, nosampu te wawono.

¹⁷ Tanotifetingkemo dua suaha nomaiꞌao te lani ambano, “Ainimo Anaku timoasiꞌaono, neposahasiꞌaono laloku.”