Matius 28 - Muna Southern Dialect

Kawanuꞌano Yesus. 28:1-10

¹ Nopalusi oleono Sabat, saowalano kamentae ne oleono Ahadhi, Maria Magdalena bhe Maria sigaoꞌano dokalamo daꞌumondo kobuhuno Yesus.

² Gahaꞌa tambaꞌomo nandoo luali moꞌosa, mbaꞌinomo seemie malaꞌekatino Ompu nosampu nomaiꞌao te surugaa, nokala nodole kontu kasongkono kobuhu maka nengkoha te wawo.

³ Ulano nokotilanga pasae bhibhito, pakeano nopute peda kambano kapa.

⁴ Tantara dhumagano ne itu nohengkuda kateꞌindo sampe dotiwata pasaꞌida mie mate.

⁵ Tamaka malaꞌekati amaitu nopugaumo ne hobhineꞌi anaꞌa ambano, “Hintimiu, koise moteꞌiomua! Ingka apandeꞌaane ondofiomu Yesus tikantaiꞌano te sau salipu.

⁶ Miinamo bhe anoa ne ini. Nowanumo maiꞌao ne mate pedamo pugauno endefiꞌini. Mai ondoeꞌomu kandoleꞌano.

⁷ Aitu lasao kalaomu maka fohatoomu anaguhuꞌino putae Yesus nowanumo maiꞌao ne mate. Anoa nopaꞌindulukikoomu we Galilea. Ne tatu mohaemoomu. Tandaiꞌeomu, ingka padamo afohatoangkoeꞌomu inia.”

⁸ Dofetingke peda naꞌa, lasao dohunsa kobuhu naꞌa bhe dotende damohato anaguhuꞌino. Ponamisindo doteꞌi tamaka doꞌia dua sepaliꞌa.

⁹ Gahaꞌa tambaꞌomo nosumpuida Yesus bhe nofeabhada ambano, “Kabarakati so hintimiu.” Lasao domaꞌotie, dosudhu dohako aꞌeno bhe dotaohao sombado.

¹⁰ Nopugaumo dua Yesus ambano, “Koise moteꞌiomua, kala fohatoomu bhahitieꞌiku dakumala we Galilea, ne tatu damoha kanaumo.”

Pahando Sahano Agama. 28:11-15

¹¹ Tangasano hobhineꞌi saꞌituini we laano sala, tantara dhumagano dosulimo we kota detula-tulaꞌao kosasawiꞌae kumadhadhiaꞌano naꞌa ne meangkaꞌindo imamu.

¹² Pada dopugau-gau bhe kamungkulaꞌi dobhotuꞌaomo tantara maitu dowaꞌanda dhoi dofekabhahie,

¹³ bhe dopugauanda ambado, “Pugauꞌomu putae anaguhuꞌino dosoꞌo maeatino Yesus tangasano moodomu.

¹⁴ Ane nametingke gubernur, madaꞌo tamohatoe insaodi so nomaluꞌao lalono, keana nokakenda-kenda handamiu.”

¹⁵ Tantara maitu doalamo dhoi anaꞌa maka defolele peda kaowilindo kamungkulaꞌi saꞌituini. Tula-tulamo anaꞌa lumeleꞌano ne miendo Yahudi taꞌampamo haꞌoleo ini.

Pahinta daefolele Bhihita Metaa 28:16-20

¹⁶ Pada aitu anaguhuꞌino ompulu seemieno dokalamo we Galilea, te kabhawo toka nefotantuno endefiꞌini.

¹⁷ Hato dowoha Yesus ne itu, dosudhumo dotaohao sombado, tamaka nandoo dua poibhahano.

¹⁸ Yesus nomaꞌotidamo bhe nopugau ambano, “Sabhaha kuasa te surugaa bhe we dhunia ini nowaꞌa kanaꞌe Amaku.

¹⁹ Dadiꞌanomo kalaomu, owadaomu sabhaha bansano liwu daembali anaguhuꞌiku. Kadiudaomu, weo neano Ama bhe Ana bhe Rohino Lahataꞌala.

²⁰ Foinaꞌudaomu damangkafi sabhaha pahinta nefohatoꞌaoku ne hintimiu. Maka tandaiꞌeomu, sadhia apobhaiangkoomu ampa kafetompaino dhamani.”