Matius 27 - Muna Southern Dialect

Yesus dowowoꞌoe ne wiseno Pilatus - Kamateꞌano Yudas 27:1-10

¹ Hato nomentae kosasawindo neangkando imamu bhe kamu-kamungkulaꞌindo Yahudi domafakamo damongko Yesus.

² Dadiꞌanomo Yesus dokatapuanemo hante maka dowowoꞌoe, dofoowae ne wiseno Pilatus, gubernur ne kadie aitu.

³ Nowoha Yesus dobhotusie damongkoe, Yudas nososomo. Anoamo ini mowano Yesus ne andoa maitu. Dadiꞌanomo dhoi tolu fulu woka perano lasao nofosulie ne meangkaꞌindo imamu bhe kamungkulaꞌi,

⁴ bhe nopugau ambano, “Ingka akodhosamo aeowangkoomu heano mie tapa kokaꞌala.” Tamaka tadotobhoosi ambado, “Ingka suano nepandeꞌao mania, nopulimo ne wutomu!”

⁵ Nofetingke peda naꞌa Yudas nokabhambi dhoi amaitu weo Lambuno Lahataꞌala, maka nokala nokantai wutono.

⁶ Neangkaꞌindo imamu dotawunaomo dhoi amaitu bhe dopugau ambado, “Dhoi aini olino hea. Weo tubhono agamantoomu dhoi aini pae naembalia damopesuaꞌe weo sohongano kapopanga.”

⁷ Dadiꞌanomo domafakamo dhoi anaꞌa deꞌoliane wite nekonando witeno pande nuꞌua. Wite anaꞌa somo katikobuhuꞌando mie mengkahato.

⁸ Dadiꞌanomo wite aitu taꞌampamo haꞌoleo ini dokonae Wite Hea.

⁹ Pedamo naꞌa nokoꞌulamo bhoasaono Lahataꞌala nefosampeno anabii Yeremia, “Andoa detahima tolu fulu woka pera, dhoi netanduaꞌaondo miendo Israel mbali olino mie kaꞌolindo.

¹⁰ Dhoi anaꞌa deꞌolianemo witeno pande nuꞌua, nopobutu bhe katuduꞌaono Ompu ne idi.”

Yesus ne wiseno Pilatus. 27:11-26

¹¹ Yesus neehe-ehemo ne wiseno gubernur. Nofeenaemo gubernur naꞌa ambano, “Nokotuꞌu hintumo ini omputo miendo Yahudi?” Ambano Yesus, “Pedamo pugaumu naꞌa.”

¹² Tamaka hato dosangkatie neangkaꞌindo imamu bhe kamu-kamungkulaꞌi, Yesus miina sepaliꞌa natumobhoosida.

¹³ Nopugaumo Pilatus ne Yesus ambano, “Miina metingkea bhahaa sabhaha nesungkuꞌaondo inia?”

¹⁴ Tamaka bhe nasewobha miina natumobhoosia sampe gubernur nopuli menteno.

¹⁵ Nembalimo dua kanea ne oleono hohaeaꞌano Paska, gubernur nefolimba seemie katohongku ampa kapoindalondo mie bhahi.

¹⁶ Wakutuu aitu nandoo seemie katohongku notiende-ende kamie modaino, neano Yesus Barabas.

¹⁷ Dadiꞌanomo hato dosihompumo mie bhahi ne itu, nofeenadamo Pilatus ambano, “Amolimbaangkoomu laꞌae bhahaa kapoindalomiu, Yesus Barabas, bhahaꞌi Yesus nekonando Kristus?”

¹⁸ Pilatus nopandeꞌaane putae kamungkulaꞌindo Yahudi doowa Yesus ne wiseno, mbaꞌinomo kakonduano lalondo.

¹⁹ Tangasano Pilatus nengkoha-ngkoha ne kaengkohaꞌa kaebhotusiꞌa parakara, nohatomo kaowili maiꞌaono ne mieno lambuno, ambano, “Fosipuli wutomu ne parakarano mie pata kokaꞌalano maitu, kapaꞌamo mohondo weo nifiku akadee-deeanemo.”

²⁰ Tamaka neangkaꞌindo imamu bhe kamu-kamungkulaꞌi dowudhu mie bhahi daesalo namolimbaanda Barabas, maka Yesus damongkoe.

²¹ Gubernur nofeenadamo dua ambano, “Mie hoduano ini amolimbaangkoomu laꞌae bhahaa kapoindalomiu?” Ambado, “Barabas!”

²² Ambano dua Pilatus, “Ane nada naꞌa, kaowu amafaꞌianemo Yesus nekonando Kristus?” Kosasawindo dokei, “Dakumantaiꞌe te sau salipu!”

²³ Ambano dua, “Tamaka podiu modai ae gahaꞌa nehabuno?” Tamaka andoa tanodhulu kaꞌosa dokei ambado, “Tetewei dakumantaiꞌe te sau salipu!”

²⁴ Pilatus nopandeꞌao lalono sabhaha dhala paemo nakofahalaaꞌa, pakade mie bhahi maitu kao-kaomo daehabumo kahungga. Dadiꞌanomo nealamo oe maka newanu ne wisendo mie bhahi bhe nopugau ambano, “Miina akokaꞌala ne heano mie aini; nopulimo ne wutomiu.”

²⁵ Kosasawindo raꞌeati dotobhoosi ambado, “Hunsaꞌanomo mateno mie aini tatumongkue insaodi bhe sampuꞌa mani.”

²⁶ Pada aitu gubernur nofolimbaandamo Barabas, tamaka Yesus dohambisiane habuta maka nowaꞌandae dakumantaiꞌe te sau salipu.

Yesus dopokafutaaꞌiane. 27:27-31

²⁷ Pada anaꞌa tantaraꞌino gubernur doowamo Yesus se kamalino kaebhotusiꞌa parakara, maka kosasawindo tantara doloꞌoida dapohompu-hompu dolibu-libu Yesus.

²⁸ Pakeano dolembie, maka dofokanaane dhuba wungo, ⸤ pakeando kolaki⸥ .

²⁹ Dekinianemo dua songkono omputo maiꞌao ne haꞌano sau kokihi, maka dofokanae ne fotuno. Dowaꞌane dua kakebhano wulu dofointahaane ne suanano, ⸤ peda tandano omputo⸥ . Pada aitu dosudhumo dopahasomba-sombaiꞌe ambado, “Somba Waompu, omputo miendo Yahudi!”

³⁰ Dokapehasie poowa doala wulu naꞌa maka dohambie ne fotuno. Pada doele-elee peda naꞌa, dhuba wungo dolembiemo maka suli dofokanaane pakeano wutono.

³¹ Palusi aitu dowowoꞌoemo we simbali, dakumalamo dakumantaiꞌe te sau salipu.

Yesus dokantaiꞌe te sau salipu 27:32-44

³² Tangasano dohope we simbalino kota, dopoꞌawaꞌaomo seemie miendo Kirene koneaꞌano Simon. Tantara dofosuhu mie aitu natumongku sau salipuno Yesus.

³³ Kaowu dohatomo te kabhawo nekonando Golgota, maꞌanano kaꞌuada.

³⁴ Ne itu Yesus dofefohoꞌutianemo angguru dosaloane bhe ufeino, tamaka pada nofenamie, nokiido naohoꞌue.

³⁵ Pada dokantai Yesus te sau salipu, tantara andoa maitu dodawu-dawumo pakeano. Mbali notipandeꞌaoane dawuno seemie-seemie, dopodaduane.

³⁶ Kaowu dengkoha-ngkoha ne itu dodhaganie.

³⁷ Te wawono fotuno defopikaane kabuhi, tingkunomo katisalipuꞌano. Wambano peda aini, “ Yesus, Omputo miendo Yahudi.”

³⁸ Nandoo dua dohodua mie modai nekantaindo te sau salipu nopoowa bhe Yesus, seemie ne suanano, seemie ne kemano.

³⁹ Mie lumalono ne itu dofekaꞌaebue bhe dofoule-ule fotundo,

⁴⁰ ambado, “Hintumo itu gahaꞌa so humunggano Lambuno Lahataꞌala maka ne katolu oleono moeheemo dua! Fosalamati wutomu ane kotu-kotuꞌu hintumo itu Anano Lahataꞌala. Sampuꞌo toha maiꞌao te sau salipu itu!”

⁴¹ Pedamo dua aitu neangkaꞌindo imamu, pande-pande Kitabi bhe kamu-kamungkulaꞌi doele-elee dua ambado,

⁴² “Mie sigaoꞌano nofosalamatida, gahaꞌaitu wutono miina namooliea. Ingka anoamo itu omputono Israel, naetaa nasumampu maiꞌao te sau salipu tamarasaeaꞌao dua bhe insaodi.

⁴³ Ingka noposahunaꞌao ne Lahataꞌala. Ane namoindaloe, naetaamo Lahataꞌala so mosalamatie. Kapaꞌamo padamo nopugau, ‘Idi ini Anano Lahataꞌala.’ ”

⁴⁴ Mahingga mie modai hoduano tisalipuno ne sohihino dowambakie dua.

Kamateꞌano Yesus 27:45-56

⁴⁵ Hambi ompulu haa mata pana oleo kosekadieꞌae naꞌa nodapoe kahohondo, ampa hambi tolu mata maꞌoleo.

⁴⁶ Hambi-hambi tolu mata Yesus noloꞌoimo nofekandii-ndii ambano, “ Eli, Eli, lama sabaktani?” Maꞌanano, Lahataꞌalaku, Lahataꞌalaku, noafa hunsa kanauꞌao?

⁴⁷ Dofetingke peda naꞌa seemie hodua meehe-eheno ne itu dopugaumo ambado, “Ingka noloꞌoi anabii Elia.”

⁴⁸ Seemie lasao notende neala kapa maka nolondoe weo angguru mokolo, pada aitu noteiꞌe ne wulu maka nofefohoꞌuti Yesus.

⁴⁹ Tamaka mie sigaoꞌano dopugau ambado, “Koise, ondo-ondo kaitaeꞌomu bhahaꞌi kaowu anabii Elia namai namosalamatie.”

⁵⁰ Yesus nokei toha nofekandii-ndii maka nofosipuli inawano.

⁵¹ Gahaꞌa tambaꞌomo kai bhalano mbali kahondomi weo Lambuno Lahataꞌala nopobhensi maiꞌao te wawo ampa we panda. Tanonandoomo dua lualino wite, nokosaka-saka bhe kabhawondo kontu.

⁵² Nandoo dua lia kafokobuhuꞌa tilengkaꞌano bhe dobhahi mie mongkilono dowanu maiꞌao ne mate.

⁵³ Hato kawanuꞌano Yesus nomaiꞌao ne mate, andoa ini dolimbamo dua maiꞌao weo kobuhundo maka dopesua we kota mongkilo. Ne itu dofotiwoha wutondo bhe dobhahi mie mohada.

⁵⁴ Neangkando tantara bhe tantara dhumaganino Yesus doteꞌi sepaliꞌa dowoha lualino wite bhe sabhaha kumadhadhiaꞌano sampe dopugau ambado, “Kotu-kotuꞌu mie aini Anano Lahataꞌala.”

⁵⁵ Ne itu dobhahi dua hobhine umondono se kodoꞌono. Andoa ini mangkafino Yesus domaiꞌao we Galilea mbali umondofaono kafaraluuno.

⁵⁶ Ne olotando andoa maitu nandoo Maria Magdalena, Maria inando Yakobus bhe Yusuf, bhe inando anaꞌino Zebedeus.

Yesus dokobuhue 27:57-61

⁵⁷ Nohondo oleo nomaimo seemie hangkaea maiꞌao ne liwuno Arimatea, neano Yusuf. Anoa ini nembalimo dua mangkafino Yesus.

⁵⁸ Nokalamo ne Pilatus nesalo maeatino Yesus. Dadiꞌanomo Pilatus notududamo damaꞌane.

⁵⁹ Doꞌundaꞌaane kaowu, Yusuf noalamo maeatino Yesus maka nowaluane bhalatu monggelaꞌano.

⁶⁰ Pada aitu nofondoleemo weo kobuhu buꞌou fehebuaꞌano wutono. Kobuhu anaꞌa dopatotae ne kabhawono kontu, ⸤ dohabue peda katuno lia⸥ . Anoa nedole kontu bhalano mbali kasongkono wobhano lia maka nokala.

⁶¹ Maria Magdalena bhe Maria sigaoꞌano tadengkoha-ngkohamo ne itu, ne wiseno kobuhu naꞌa.

Kobuhuno Yesus dodhaganie 27:62-66

⁶² Hato nomentae, oleonomo Sabat. Gahaꞌa neangkaꞌindo imamu bhe miendo Farisi dosikala-kalaꞌa dopoꞌawaꞌao Pilatus.

⁶³ Ambado, “Waompu, tafeꞌulai pugauno fobhohe-bhoheꞌino maitu wakutuu nandoo nodadi. Ambano ne katolu oleono namanumo maiꞌao ne mate.

⁶⁴ Dadiꞌanomo fotudumo dadhumagani metaaꞌe kobuhuno ampa tolu oleo ini. Ane paise bhahasaa domai anaguhuꞌino dambolaku maeatino maka damugau ne raꞌeati putae Yesus maitu nowanumo maiꞌao ne mate. Ane nada naꞌa, kabhohe-bhoheꞌi mbuhumaino ini nasedhuluꞌa dua kadahasino bhe maꞌinduluꞌano.”

⁶⁵ Ambano Pilatus, “Ainiꞌadamo so dhumagano. Kalamoomu maka dhagani metaaꞌeomu kobuhu anaꞌa.”

⁶⁶ Pada peda naꞌa dokalamo dotandai kasongkono kobuhu naꞌa keana dodiu-diuꞌe, maka detudu tantara dodhaganie.