Matius 26 - Muna Southern Dialect

Patudhu damongko Yesus 26:1-5

¹ Palusi nofofoinaꞌuꞌao kosasawiꞌae naꞌa, Yesus nopugaumo ne anaguhuꞌino ambano,

² “Ingka pandeꞌaaneomu hohaeaꞌano Paska tanaefua. Ne naꞌa Anano Manusia damowae ne kokuasano maka dakumantaiꞌe te sau salipu.”

³ Wakutuu aitu neangkaꞌindo imamu bhe kamungkulaꞌindo Yahudi dopohompu-hompu we lambuno Imamu Bhalano koneaꞌano Kayafas.

⁴ Andoa dopokana-kanagau deꞌondofi akala dahumako Yesus maka damongkoe.

⁵ Tamaka ambado, “Koise dohakoe ne matano hohaeaꞌa, bhahaa tadohialele raꞌeati.”

Yesus nominakie seemie hobhine 26:6-13

⁶ Yesus nohato we liwuno Betania, ne lambuno Simon kokuli modaino ⸤ endefiꞌini⸥ .

⁷ Gahaꞌa tanosihatoꞌamo seemie hobhine neowa kabuto-butolo kani noponoꞌao mina-mina kawondu moꞌaliꞌano sepaliꞌa. Sahatono mina-mina kawondu naꞌa nosungkae ne fotuno Yesus. Wakutuu anaꞌa Yesus tangasano nohumaa.

⁸ Dowoha peda maitu anaguhuꞌino nohehewu lalondo sampe dopugau ambado, “So ae gahaꞌa mina-mina aitu dopokadai-daiane?

⁹ Kapaꞌamo mina-mina aitu noꞌali sepaliꞌa, feꞌemo naembali damasoe maka olino damaꞌandae mie mokae.”

¹⁰ Tamaka Yesus nopandeꞌaane fekihindo sampe nopugau ambano, “Noafa gahaꞌa hobhine aini fekasabhaaneomu? Ingka anoa ini nohabu metaa ne Idi.

¹¹ Mie mokae sadhia dapobhai bhe hintimiu, tamaka Idi ini pae aeate kansuhu bhe hintimiua.

¹² Hobhine aini nominakiemo wawo mbadhaku ini, somo katokano humato dakumobuhu kanau.

¹³ Amohatokoomu, kotu-kotuꞌu ne amai maka dua so katifoleleꞌano Bhihita Metaa ne kosekaꞌewaꞌae dhunia ini, habuno hobhine ini dasumambilie dua somo kafeꞌulaino.”

Isikadhi modaino Yudas 26:14-16

¹⁴ Pada anaꞌa seemie maiꞌao ne anaguhuno ompulu hoduano koneaꞌano Yudas Iskariot, nokalamo ne meangkaꞌindo imamu.

¹⁵ Nopugaumo, “Maꞌa kanauꞌomu ae ane aowaangkoomu Yesus?” Lasao deꞌeapiane tolu fulu woka pera maka dowaꞌane.

¹⁶ Notandamo ne naꞌa Yudas neꞌondofi katolala metaa so namowaꞌao Yesus ne andoa.

Yesus nopoharoaꞌao Paska bhe anaguhuꞌino 26:17-25

¹⁷ Nohatomo oleo katandaꞌano hohaeaꞌano Roti Pata Koragiꞌano. Domaimo anaguhuꞌino dofeena ambado, “Taefotoka ne amai bhahaa gaomua so dapoharoaꞌaoꞌomu Paska?”

¹⁸ Notobhoosimo Yesus ambano, “Kalaomu we kota maka fohatoomu mie popandeꞌaku, putae ambano guru, ‘Tempoku nomaꞌomo nahumatoa, gaoku apoharoaꞌao Paska bhe anaguhuꞌiku we lambumu.’ ”

¹⁹ Pada aitu anaguhuꞌino dokalamo doangkafi katuduꞌaono Yesus, defotoka haroano Paska.

²⁰ Nohondo oleo Yesus nengkohamo nohumaa nopombali-mbali bhe anaguhuno ompulu hoduano.

²¹ Tangasano dohumaa nopugaumo ambano, “Amohatokoomu, kotu-kotuꞌu seemie ne olotamiu ini namowa kanau ne limando kaewa.”

²² Nokompeaha sepaliꞌa lalondo sampe seemie-seemie dofeenamo ambado, “O idi bhahaa Waompu?”

²³ Ambano Yesus, “Metandano roti weo pihi poowa bhe Idi, anoamo itu so mowa kanau ne limando kaewa.

²⁴ Daanumo Anano Manusia - Idimo ini - tetewei namate peda tibuhino weo Kitabino anabii. Tamaka nobalaamo mie so mowano Anano Manusia ne limando kaewa. Mie anaꞌa netaamo koemo nolentea.”

²⁵ Yudas so mowano Yesus ne kaewa nofeenamo dua, “O idi bhahaa Guru?” Ambano Yesus, “Pedamo pugaumu itu.”

Haroano Ompu 26:26-29

²⁶ Tangasano dohumaa, Yesus nealamo roti maka nefoampe katumpuno lalo ne Lahataꞌala. Roti anaꞌa nobhebhehaemo maka nowaꞌandae anaguhuꞌino bhe nopugau ambano, “Alaeꞌomu maka humaaꞌeomu, mbadhakumo inia.”

²⁷ Palusi anaꞌa nealamo dua kampohoꞌuꞌa, nefoampe dua katumpuno lalo ne Lahataꞌala maka nowaꞌandae anaguhuꞌino. Ambano, “Fohoꞌuomu kosasawimiu maiꞌao ne kampohoꞌuꞌa aini.

²⁸ Heakumo inia. Heaku ini damotuhue so mie bhahi, somo mekatangkano podhandino Lahataꞌala bhe manusia, somo dua katiꞌamponiꞌano dhosando.

²⁹ Amohatokoomu, notanda aitu paemo aohoꞌua angguru ampa oleono aohoꞌu angguru buꞌou, apoowa-owa bhe hintimiu weo Kafopahintaꞌano Amaku.”

Petrus nagumaga miina dapopandeꞌao bhe Yesus 26:30-35

³⁰ Pada delagu-lagu dopudhi Lahataꞌala, dokalamo te kabhawono Zaitun.

³¹ Nopugaumo Yesus ne anaguhuꞌino ambano, “Alo aini naohungga kaparasaeamiu mbaꞌinomo Idi, sampe humunsa kanauꞌomu. Kapaꞌamo nandoo tibuhino weo Kitabino anabii, ‘Dhagano dhumba amongkoe, gulumano dhumbano datigasa.’

³² Tamaka amanu kaowu maiꞌao ne mate amaꞌindulukikoomu we Galilea.”

³³ Petrus notobhoosimo ambano, “Mahinggamo kosasawindo naohungga kaparasaendo mbaꞌinomo Hintu sampe dahumunsako, o idi paise.”

³⁴ Ambano Yesus, “Amohatoko, kotu-kotuꞌu alo aini dua paeꞌo nakumakuhua manu, natolu pakumo gumaga miina mandeꞌa kanau.”

³⁵ Ambano dua Petrus, “Mahinggamo amate bhe Hintu, pae sepaliꞌa agumagaa.” Anaguhuꞌino sigaoꞌano sanea dua dopugau peda naꞌa.

Yesus nosambahea te kaendeano Getsemani 26:36-46

³⁶ Yesus bhe anaguhuꞌino dohatomo te kaendea koneaꞌano Getsemani. Nofohatomo anaguhuꞌino ambano, “Mengkoha-ngkohaomu ne ini nandoo akumala asumambahea ne tatu.”

³⁷ Petrus bhe kohoduaꞌindo anano Zebedeus, nowowoꞌoda. Notandamo ne itu nokompeaha sepaliꞌa lalono bhe nokakenda-kenda handano.

³⁸ Nopugau ne anaguhuꞌino totoluno maitu, “Nokompeaha sepaliꞌa laloku, kao-kaomo amatemo. Mengkoha-ngkohaomu ne ini, mekambotoomu bhe kodhagaomu pobhai kanauꞌomu.”

³⁹ Yesus nopansuhu seendai te wise maka nolongko ne wite nosambahea ambano, “Ama, ane naembali fogampi kanaꞌe kasabha so netompaloiku itu, ampamo kaowu koise angkafi kapoindaloku tamaka taꞌampamo kapoindalomu.”

⁴⁰ Pada anaꞌa nosulimo se anaguhuꞌino, gahaꞌa nohatofida doodomo. Nopugaumo ne Petrus ambano, “Pae tumahaomu bhahaa mekambotoomu nasedhamu pobhai kanauꞌomu?

⁴¹ Mekambotoomu bhe sambaheaꞌomu, keana nokantibhakoomu kasoba. Daanumo totono lalo neangka, tamaka o mbadha nonale.”

⁴² Fendua toha nokala nosambahea ambano, “Ama, ane kasabha aini pae naembali mogampie, tamaka tetewei atumompaloiꞌe, taꞌampamo kapoindalomu so kumadhadhiaꞌano.”

⁴³ Nosuli se anaguhuꞌino nohatofida toha doodo mbaꞌinomo dempaumo sepaliꞌa.

⁴⁴ Miinamo nadumiu-diuda, tanokalamo toha nosambahea, kakapono tolu paku. Sambaheano nopototo bhe saꞌituini.

⁴⁵ Pada anaꞌa nosulikimo anaguhuꞌino maka nopugauanda, “Nandoo dua moodoomu bhe mewuleomu bhahaa? Ingka nohatomo tempono Anano Manusia daowae ne limando mie kodhosa.

⁴⁶ Wanumoomu dokalaanaomu! Woha itu, mie so mowa kanau nomaꞌomo.”

Yesus dohakoe 26:47-56

⁴⁷ Tangasano Yesus nopugau, nohatomo Yudas, seemie maiꞌaono ne anaguhuno ompulu hoduano. Yudas maitu nohato nopoowa bhe mie bhahi metaguno kampue bhe kawangku. Mie bhahi naꞌa dotududa neangkaꞌindo imamu bhe kamungkulaꞌindo Yahudi.

⁴⁸ Yudas padamo nofohatoanda tanda peda aini, “Mie so newonoku, anoamo itu. Hakomoomu.”

⁴⁹ Yudas lasao nomaꞌoti Yesus bhe nopugau ambano, “Peda ae itua guru?” poowa nowonoe.

⁵⁰ Yesus nofeenamo ambano, “Sabhangka, aituꞌaemo kahatoꞌamu?” Mie bhahi lasao dodhulupi Yesus maka dohakoe.

⁵¹ Gahaꞌa seemie pobhaiꞌano Yesus nokoalemo limano nobuna kampueno maka notowe bhatuano Imamu Bhalano, nondawu bhe tingalano.

⁵² Ambano Yesus ne mie anaꞌa, “Pusoloe kampuemu itu, kapaꞌamo kotika mepakeno kampue namateꞌao dua kampue.

⁵³ Ingka naembali aetondala ne Amaku naetudu malaꞌekati datumulumi kanau, mahingga nakolabhi naompulu haa tagua.

⁵⁴ Taꞌampamo kaowu ane nada naꞌa, ingka pae nakoꞌulaa tibuhiꞌano weo Kitabindo anabii putae tetewei nakumadhadhia peda aini.”

⁵⁵ Pada aitu Yesus nopugau ne mie bhahi ambano, “Kona kanauꞌomu mie modai gahaꞌa sampe metaguomu kampue bhe kawangku maka humako kanauꞌomua? Ingka seꞌo-seꞌoleo aengkoha-ngkoha afofoinaꞌu weo Lambuno Lahataꞌala, tamaka miina humako kanauꞌomu.

⁵⁶ Ampamo kaowu kosasawiꞌae ini nokadhadhia so nokoꞌulaꞌao tibuhiꞌano weo Kitabindo ana-anabii.” Pada aitu kosasawindo anaguhuꞌino dofileimo tadohunsae nomoisa.

Yesus ne wisendo Sahano Agama 26:57-68

⁵⁷ Pada dohakoe, Yesus dowowoꞌoemo te wiseno Imamu Bhalano koneaꞌano Kayafas. Ne itu dohompumo pande-pande Kitabi bhe kamu-kamungkulaꞌi miendo Yahudi.

⁵⁸ Petrus noangka-angkae we kodoꞌono sampe nohato we kadeteno lambuno Imamu Bhalano. Hato nopesua nengkohamo bhe dhumagano, patudhuno naꞌumondo-ondo kapalusiꞌaono kosasawiꞌae maitu.

⁵⁹ Neangkaꞌindo imamu bhe kosasawindo Sahano Agama deꞌondofi tingku pata kumotuꞌu, nomudaꞌao dabhotusi damongko Yesus.

⁶⁰ Tamaka miina daeꞌawaa, mahingga dobhahi sakusii mepaha-pahano. Panda-pandano doehemo dohodua,

⁶¹ ambado, “Mie aini nopugau namondoiꞌe nahumungga Lambuno Lahataꞌala, maka ne katolu oleono namooliemo dua namoehee.”

⁶² Imamu Bhalano noehemo maka nopugau ne Yesus, ambano, “Pae tumobhoosiea gahaꞌa kasangkatindo ne hintu ini?”

⁶³ Tamaka Yesus miina nakodiua. Nopugaumo dua Imamu Bhalano ne Yesus ambano, “Aitu bhe Lahataꞌala foꞌondo-ondono, fohato kainsami, hintumo ini Omputo Fosalamatino Anano Lahataꞌala bhahaꞌi suano!”

⁶⁴ Ambano Yesus, “Ingka pedamo pugaumu itu. Ampamo kaowu amohatoko, notanda aitu mohaomu Anano Manusia naengkoha ne suanano Lahataꞌala kokuasano, mohaeꞌomu namai te wunta-wuntano olu te lani.”

⁶⁵ Nofetingke peda naꞌa Imamu Bhalano lasao nopobhensiꞌao pakeano bhe nopugau ambano, “Aitumaka! Mie aini ingka nofekaꞌaebumo Lahataꞌala, nopototoꞌao wutono bhe Lahataꞌala! So dua ae gahaꞌa daeꞌondofi sakusii? Ingka fetingkeemoomu naꞌa.

⁶⁶ Peda amai fekihimiu?” Dotobhoosimo ambado, “Anoa ini nokokaꞌala, tetewei damongkoe!”

⁶⁷ Pada aitu dokapehasi ulano bhe dotumbusie; sigaoꞌano dohambisie, bhe dopugau ambado,

⁶⁸ “Alee Omputo Fosalamatino, soba bhoto, nohambisiko laꞌae itua?”

Petrus nogagaiꞌe miina namandeꞌao Yesus 26:69-75

⁶⁹ Tangasano Petrus nengkoha-ngkoha we kadete, nomaimo seemie bhatua hobhine ambano, “Ingka hintu ini dua sadhia pobhai bhe Yesus, mieno Galilea maitu.”

⁷⁰ Tamaka Petrus nogaga ne wisendo kosasawindo maitu ambano, “Miina amandeꞌaanea maꞌanano pugaumu naꞌa.”

⁷¹ Hato nokala se fointono kadete, nowohaemo dua bhatua hobhine sigaoꞌano. Bhatua naꞌa nopugaumo ne mie meehe-eheno ne itu ambano, “Mie aini nopobhai bhe Yesus miendo Nasaret maitu.”

⁷² Petrus nopugaumo toha bhe nofemata, “Mie amaitu miina amandeꞌaanea.”

⁷³ Miina naompona domaimo dua mie meehe-eheno ne itu dopugau ne Petrus, ambado, “Teteweimo hintu ini seemie dua sabhangkaꞌindo, notipandeꞌao ne wambamu.”

⁷⁴ Petrus nofemata bhe nobhatataꞌiao wutono, “Miina amandeꞌaanea mie anaꞌa!” Gahaꞌa nopobutu nokakuhuamo manu.

⁷⁵ Petrus nofeꞌulaimo pugauno Yesus, “Paeꞌo nakumakuhua manua, natolu pakumo gumaga miina mandeꞌa kanau.” Pada anaꞌa nolimbamo bhe noꞌae, nokompeaha sepaliꞌa lalono.