Matius 25 - Muna Southern Dialect

Kapalendano doompulu kalambe 25:1-13

¹ “Nahumato wakutuu anaꞌa, Kafopahintaꞌano Lahataꞌala tapedamo doompulu kalambe, deala bhe kantaleando maka dokala dosumpui loꞌia buꞌou.

² Lidimano dokabhohe-bhohe, lidimano dopande.

³ Kalambeꞌi kabhohe-bhoheno naꞌa dewowoꞌo kantalea tamaka miina daewowoꞌo bhe minando so katubhano.

⁴ Kalambeꞌi mandeno dewowoꞌo kantalea pakade dewowoꞌo dua bhe minando ne kaenteiꞌa sigaoꞌano.

⁵ Gahaꞌa loꞌia buꞌou miina napikihatoa, tadempau sampe dofisiodo-odoꞌamo.

⁶ Nofewuntaꞌi alo notifetingkemo suaha nekei-kei ambano, ‘Aituꞌaemo! Loꞌia buꞌou nohatomo! Sumpuiꞌeomu!’

⁷ Kalambe ompuluno naꞌa lasao dowanu maka dofekataaꞌi kantaleando.

⁸ Kalambeꞌi kabhohe-bhoheno naꞌa dopugaumo ne kalambe mandeno ambado, ‘Waꞌa kainsamiomu bhe insaodi minamiu itu naseendai, ingka kantalea mani maꞌomo naopeo.’

⁹ Tamaka kalambe mandeno tadotobhoosi, ‘Paise, bhahaa pae nakumapo so wuto mani bhe so hintimiu. Labhiꞌano kala meꞌoliomu we mahaasono.’

¹⁰ Nandoo tangasano dokala deꞌoli mina, loꞌia buꞌou nohatomo. Toka mantaa-ntaano lasao dopesua weo lambu kahame-hameꞌa, dopoowa-owa bhe loꞌia buꞌou naꞌa. Pada aitu fointo doꞌontoemo.

¹¹ Gahaꞌa domaimo dua kalambeꞌi kabhohe-bhoheno saꞌituini, dofeabha ambado, ‘Waompu, lengka kainsami fointo!’

¹² Tamaka loꞌia buꞌou naꞌa tanopugau ambano, ‘Amohatokoomu, kotu-kotuꞌu miina amandeꞌaangkoomua.’

¹³ Dadiꞌanomo kodhagaomu, kapaꞌamo miina mandeꞌaaneomua oleono bhe tempono.”

Kapalendano dototolu bhatua 25:14-30

¹⁴ “Kafopahintaꞌano Lahataꞌala tapedamo seemie kafeompuꞌa so kumalano we koliwuno. Nakumala kaowu nosaliꞌimo bhatuaꞌino maka noposahunaꞌaanda daꞌumondofao kanandoono.

¹⁵ Seemieno nowaꞌane lima kakadu dhoi bulawa, seemieno nowaꞌane haa kakadu bhe seemieno nowaꞌane sekakadu, noposahataa bhe nepoo-poolindo seemie-seemie. Pada anaꞌa nokalamo.

¹⁶ Bhatua metahimano dhoi lima kakadu naꞌa lasao nokala nopodagaane sampe nokolabaꞌao dua lima kakadu dhoi bulawa.

¹⁷ Bhatua metahimano haa kakadu nehabu dua peda naꞌa sampe nokolaba dua haa kakadu.

¹⁸ Tamaka bhatua metahimano sekakadu kaowu lasao nokala neseli wite maka nokantano dhoino kafeompuꞌano maitu.

¹⁹ Nompona pada anaꞌa, kafeompuꞌando nosulimo nopolentu bhe bhatuaꞌino.

²⁰ Nomaimo bhatua metahimano lima kakadu naꞌa nowowoꞌo dua bhe labano lima kakaduno. Nopugaumo ne kafeompuꞌano ambano ‘Waompu, lima kakadu waꞌa kanau. Aini akolabaanemo dua lima kakadu.’

²¹ Ambano kafeompuꞌa naꞌa, ‘Nokesa sepaliꞌa itua, hintu bhatua metaano bhe tumuhuno lalo. Notuhu lalomu ne taka mohobu, maka amosahunaꞌaangkomo taka bhalano. Pesuamo weo hame-hameku, pehapiꞌo dua bhe hintu kaꞌiaku ini.’

²² Nomaimo dua bhatua metahimano haa kakadu, ambano, ‘Waompu, haa kakadu waꞌa kanau. Aini akolabaanemo dua haa kakadu.’

²³ Ambano kafeompuꞌa naꞌa, ‘Nokesa sepaliꞌa itua, hintu bhatua metaano bhe tumuhuno lalo. Notuhu lalomu ne taka mohobu, maka amosahunaꞌaangkomo taka bhalano. Pesuamo weo hame-hameku, pehapiꞌo dua bhe hintu kaꞌiaku ini.’

²⁴ Kaowu nomaimo bhatua metahimano sekakadu bhe nopugau ne kafeompuꞌano, ‘Waompu, apandeꞌaane hintu mie moꞌosano lalo. Otobhe ne kaampo pata kaeꞌewiꞌamu, okape ne kaampo pata kamontisaꞌamu.

²⁵ Dadiꞌanomo aoteꞌi sampe dhoimu sekakaduno ini akantanoe. Aini sulimo alaꞌao wutomu.’

²⁶ Nopugaumo kafeompuꞌa naꞌa, ‘Hintu ini bhatua modai bhe mantawano! Ingka pandeꞌaanemo atobhe ne kaampo pata kaeꞌewiꞌaku, akape ne kaampo pata kamontisaꞌaku.

²⁷ Feꞌemo dhoiku itu moadae ne mie so mefowaweno dhoi, neanomo sasuliku, atumahimae bhe oeno.

²⁸ Dadiꞌanomo alaeꞌomu dhoi sekakaduno maitu maka waꞌaneomu kodhoino ompulu kakaduno saꞌituini.

²⁹ Kapaꞌamo kokanandoono datumubhahiane ampa napontalabhi-labhi, tamaka tapa kokanandoono, o ae maka dua kanandoono damadae damalaꞌie.

³⁰ Bhatua tapa kofahalaa itu, ohoeꞌomu we simbali, weo doloma mposo. Ne naꞌa taꞌo kangkoꞌae bhe kuꞌino wangka.’ ”

Kabhotusi ne Oleono Kiama 25:31-46

³¹ “Ane namai kaowu Anano Manusia weo kakalabhiano napoowa-owa bhe kosasawindo malaꞌekatino, maka naengkoha-ngkoha te kaengkohaꞌano kumalabhiano.

³² Kosasawindo bansano liwu datihompu te wiseno maka napofelesaanda, pedamo dhagano dhumba nopogaatiꞌao dhumba bhe membe.

³³ O dhumba ⸤ kaꞌibahatino mie dhumalangino kapoindalono Lahataꞌala⸥ namowada ne suanano; o membe ⸤ kaꞌibahatino mie sigaoꞌano⸥ namowada ne kemano.

³⁴ Omputo anaꞌa napugau ne mie we suanano ambano, ‘Maimoomu, hintimiu nebarakatino Amaku, tahimamoomu Kafopahintaꞌa toka nefontaa-ntaano so hintimiu mpini pakatifokonandoono dhunia.

³⁵ Kapaꞌamo wakutuuno aoꞌaho pakande kanauꞌomu, wakutuuno nokekele wuꞌuku fefohoꞌuti kanauꞌomu, aembali mie humampe we liwumiu fobutu kanauꞌomu ne lambumiu.

³⁶ Wakutuuno miina akopakea fepakeani kanauꞌomu, aosaki feꞌondo kanauꞌomu, atitohongku mai umbati kanauꞌomu.’

³⁷ Mie banara naꞌa datumobhoosi ambado, ‘Waompu, saneafa bhahaa tawohako moꞌaho maka tapakandeko tawa nokekele wuꞌumu maka tafefohoꞌutiko?

³⁸ Saneafa bhahaa tawohako membali mie humampe ne liwu mani, maka tafobutuko we lambu mani, tawa miina kopakea maka tafepakeaniko?

³⁹ Saneafa bhahaa mosaki tawa titohongku maka tamai taumbatiko?’

⁴⁰ Omputo anaꞌa natumobhoosi ambano, ‘Amohatokoomu, kotu-kotuꞌu sabhaha nehabumiu ne bhahitieku foliuno kandidiki ini, ingka nopototomo habueꞌomu ne Idi.’

⁴¹ Pada anaꞌa napugaumo dua ne mie we kemano, ‘Gampiomu maiꞌao ne wiseku ini, hintimiu mie nekangkanaino balaa! Pesuaꞌomu weo efino narakaa tapa mopoopeono ampa suhue dhamani, toka nefontaa-ntaa so Kafeompuꞌando seetani bhe malaꞌekati sabhangkaꞌino.

⁴² Kapaꞌamo aoꞌaho miina makande kanauꞌomu, nokekele wuꞌuku miina mefohoꞌuti kanauꞌomu.

⁴³ Wakutuuno aembali mie humampe we liwumiu miina mobutu kanauꞌomu ne lambumiu, wakutuuno miina akopakeaꞌa miina mepakeani kanauꞌomu, aosaki bhe atitohongku miina mai umbati kanauꞌomu.’

⁴⁴ Andoa naꞌa datumobhoosi, ambado, ‘Waompu, saneafa bhahaa tawohako moꞌaho tawa nokekele wuꞌumu, membali mie humampe tawa miina kopakeaꞌa tawa mosaki bhahaꞌi titohongku maka miina taꞌumondofaangkoa?’

⁴⁵ Ambano dua omputo naꞌa, ‘Amohatokoomu, kotu-kotuꞌu taenomo mokiidoomu metulumiomu seemie foliuno kandidiki ini, nopototomo mokiidoomu tumulumiomu Idi.’

⁴⁶ Andoa ini damesua weo kakadee-dee suhue dhamani, tamaka mie banara daeꞌawa dadi suhue dhamani.”