Matius 24 - Muna Southern Dialect

Lambuno Lahataꞌala damohansurue 24:1-2

¹ Pada peda maitu Yesus nolimbamo maiꞌao weo Lambuno Lahataꞌala maka nokala. Domaiꞌiemo anaguhuꞌino bhe dosusupiane lambu weo kadeteno Lambuno Lahataꞌala.

² Nopugaumo Yesus ambano, “Ingka wohaeꞌomu itua? Amohatokoomu, kotu-kotuꞌu bhe nasepoi kontu pae bhe so tumapiꞌano te wawono kontu bhaino, kosasawiꞌae damadae damohansurue.”

Katandaꞌano kakadee-dee 24:3-14

³ Dohato te kabhawono Zaitun Yesus nengkohamo ne itu. Domaimo anaguhuꞌino dopuga-pugau domoisa kaowu. Ambado, “Fohato kainsami bhahaꞌi naefie nakumadhadhia naꞌa? O ae bhahaa katandaino so kahatoꞌamu bhe tandano pandano dhamani?”

⁴ Yesus notobhoosida ambano, “Kodhagaomu, bhahaa dofokolilino totono lalomiu!

⁵ Kapaꞌamo dabhahi mie so maino damake neaku bhe dapugau ambado, ‘Idimo ini Mesias’, maka dabhahi mie so tibhohe-bhoheꞌino.

⁶ Ane metingkeomu nduuno popahisaꞌa bhahaꞌi meꞌawaomu bhihitano popahisaꞌa, koemo notikenda handamiu. Ingka kosasawiꞌae maitu tetewei nakumadhadhia, tamaka suanoꞌo kafetompaino dhamani.

⁷ Liwu dapoewangi bhe liwu, kakolakiꞌa dapoewangi bhe kakolakiꞌa. Neꞌamai-neꞌamai nandumandoo gaba bhe luali.

⁸ Ampamo kaowu kosasawiꞌae naꞌa kafetompunaꞌino dhamani buꞌou, nopototo bhe kaleano so koanano.

⁹ Humato anaꞌa dahumakokoomu, maka damowakoomu ne limando mie so modee-deekoomu maka damongkokoomu. Kosasawindo bansano liwu dabansikoomu mbaꞌinomo membaliomu anaguhuꞌiku.

¹⁰ Dabhahi so humunsano kaparasaeando, daposungku-sungkuꞌao ne kokuasano bhe dapobansi-bansi.

¹¹ Dabhahi mpahaana-anabiino sampe dabhahi mie so mokolilinono totono lalo.

¹² Kadaino diundo manusia sadhulu-dhulumo sampe dabhahi mie mosalino kanini kaasi ne mie bhaindo.

¹³ Tamaka andoa kosabahano dopotaami sampe namalusi, dasumalamati.

¹⁴ Bhihita Metaano Kafopahintaꞌano Lahataꞌala ini damolelee ne kosekaꞌewaꞌae dhunia, neanomo sabhaha bansano liwu dametingkee. Mada anaꞌa kaneꞌomo nahumato kafetompaino dhamani.”

Fofekabinasano Timohakuno 24:15-28

¹⁵ “Weo kasabha maitu mohaomu Fofekabinasano Timohakuno naeehe-ehe ne Lambuno Lahataꞌala peda bhoasaono Lahataꞌala nefosampeno anabii Daniel. (Hintimiu mebasano tabeano motindaeꞌomu maꞌanano!)

¹⁶ Maka mie we kadieno Yudea tabeano damilei te kokabhawoꞌano so dasumalamatiꞌao.

¹⁷ Mie we tambi koemo dopesua dakoniala weo lambu.

¹⁸ Mie te kaampo koemo dosuliki pakeando we liwu.

¹⁹ Kadaino maka kolaundo hobhine fowoowano tawa fofotitino ne wakutuu anaꞌa.

²⁰ Sambaheaꞌomu tempono so kafileiꞌamiu naꞌa koe nokantibha wulano use tawa oleono Sabat.

²¹ Wakutuu anaꞌa nandumandoo kasabha foliuno kabhibhiisa. Kasabha pedando anaꞌa miinaꞌo nakopototoꞌa mpini pakatandano dhunia ampa haꞌoleo ini, pakade paemo dua namendua nakumadhadhia.

²² Ane ibahano Ompu pae nakumuhangi tempono, kotika dumadino pae bhe so sumalamatino. Tamaka mbaꞌinomo nandoo umati tipilino, Ompu nakumuhangi tempono.

²³ Wakutuu anaꞌa ane bhe so mugauangko, ‘Ondoe, ainiꞌae Mesias, Omputo Fosalamatino’ tawa, ‘Ondoe, atatuꞌae Mesias’, koe parasaeaꞌomua.

²⁴ Kapaꞌamo dabhahimo mabhino wutono Mesias, gahaꞌaitu suano. Dabhahi dua mpahaana-anabiino. Andoa naꞌa daehabu tanda-tanda tapa mentela bhe giu timenteꞌaono, patudhundo ane naembali damokolilino dua totono lalondo umati tipilino.

²⁵ Tandaiꞌeomu! Kosasawiꞌae padamo afohatoangkoeꞌomu wawo inia.

²⁶ Dadiꞌanomo ane mie dapugau ne hintimiu, ‘Bhe Mesias Omputo Fosalamatino te pandaso bhalano’, koe kalaomua; tawa, ‘Mesias nekaꞌuko weo boloku’, koise parasaeaꞌomua.

²⁷ Kapaꞌamo kahatoꞌano Anano Manusia - Idimo ini - napototo bhe bhibhito, nakosilaka te mata oleo nasumela ampa we kansoopa.

²⁸ Ne amai kobhangkeꞌano ne itumo kaefoꞌonuꞌano kaa.”

So kahatoꞌano Anano Manusia bhe kapalendano puꞌuno ara 24:29-36

²⁹ “Sapalusino kasabha anaꞌa oleo nahohondomo, wula paemo nakotilangaa, kulipopo dapondawuti damaiꞌao te lani bhe kosasawiꞌae waweno alamu naohungga.

³⁰ Wakutuu anaꞌa natiwohamo katandaino Anano Manusia te lani bhe sabhaha bansano liwu te dhunia ini daekangkoꞌae bhe daguguhu. Andoa daoha Anano Manusia te olu natiwoha weo kakalabhiano bhe kuasa bhalano.

³¹ Duhulele bhalano nakondii. Anano Manusia natumudumo malaꞌekatino dalumimba dahumompunao umati tipilino namaiꞌao ne kofatowalaꞌae alamu, maiꞌao we tompano lani sewetano ampa we sewetano.

³² Soba poguhuomu ne puꞌuno wohaꞌa. Ane haꞌaꞌino notawomo ingka pandeꞌaaneomu nomaꞌomo nakoꞌoleo.

³³ Pedamo anaꞌa ane mohaemoomu kosasawiꞌae kadhadhia nepulaoꞌaoku saꞌituini pandeꞌaanemoomu, nomaꞌomo sepaliꞌa tempono, ingka te wisenomo fointo.

³⁴ Amohatokoomu! Kotu-kotuꞌu mie dhamani aini paeꞌo daopulia damate, nakumadhadhiamo kosasawiꞌae naꞌa.

³⁵ O lani bhe dhunia naosali, tamaka wambaku ini pae bhe kasalia.

³⁶ Ampamo kaowu oleono bhe tempono bhe seemie miina bhe mandeꞌaanea. O malaꞌekati te surugaa miina, Anano Manusia miina dua, mpahinomo wutono Amaku mandeꞌaane.”

Katangahi so dakodhagaꞌao 24:37-44

³⁷ “Peda koeatendo manusia ne dhamanino anabii Nuh, namedamo dua anaꞌa ne oleo kahatoꞌano Anano Manusia.

³⁸ Ne dhamani anaꞌa, miinaꞌo nahumatoda luano oe bhalano, o mie dohumaa dofohoꞌu, dogaa bhe dofofogaa sampe ne oleono anabii Nuh nopesua weo bhangka bhalano.

³⁹ Andoa miina sepaliꞌa damandeꞌaanea o ae so kumadhadhiano, sampe nofonisidamo luano oe bhalano naꞌa. Nadamo dua anaꞌa ne oleono so kahatoꞌano Anano Manusia.

⁴⁰ Wakutuu anaꞌa ane dahodua mie kumahadhaano te kaampo, seemie dawowoꞌoe, seemie dahumunsae.

⁴¹ Ane dahodua hobhine tangasano megilino kahitela, seemie dawowoꞌoe, seemie dahumunsae.

⁴² Dadiꞌanomo kodhagaomu, kapaꞌamo miina mandeꞌaaneomua oleo so kahatoꞌano Ompumiu.

⁴³ Tandaiꞌeomu! Ane kolambuno namandeꞌaane naafaꞌi alo nahumatoe kasoꞌo teteweimo nakodhaga, pae tanakumatahomoa lambuno dalumeloe.

⁴⁴ Dadiꞌanomo mantaa-ntaaꞌomu, kapaꞌamo Anano Manusia nahumato ne wakutuu tapa nepotu-potuluꞌao.”

Kapalendano bhatua motuhuno lalo bhe modaino isikadhi 24:45-51

⁴⁵ “Laꞌae bhahaa bhatua motuhuno lalo bhe mandeno maitu? Anoamo maitu nesangkeno kafeompuꞌano so neangkando bhatua bhaino, naetaganaanda daomaa napobutu bhe tempono.

⁴⁶ Nokodawua mpuu bhatua naꞌa ane nohatofie kafeompuꞌano tangasano noalaꞌi gunano.

⁴⁷ Amohatokoomu, kotu-kotuꞌu kafeompuꞌa naꞌa nasumangke bhatua aitu somo mandeꞌaono sabhaha fehebuaꞌano.

⁴⁸ Tamaka ane bhatua naꞌa mie modai sampe nakoduku we lalono,

⁴⁹ ‘Ingka kafeompuꞌaku nandoo naompona maka nasumuli’, maka namepeki bhatua bhaino bhe naomaa naohoꞌu napoowa bhe mie mololanuno.

⁵⁰ Gahaꞌa kafeompuꞌano tambaꞌomo nahumato, ne oleo tapa nepotu-potuluꞌao, ne tempo tapa nenamu-namu.

⁵¹ Bhatua anaꞌa namehaakebhae, kahukumuno napototoane bhe mie mehaaꞌulano. Ne naꞌamo taꞌo kangkoꞌae bhe kuꞌino wangka.”