Matius 23 - Muna Southern Dialect

Yesus nofodhaga pande-pande Kitabi bhe miendo Farisi 23:1-36

¹ Nopugaumo Yesus ne mie bhahi bhe anaguhuꞌino ambano,

² “Pande-pande Kitabi bhe miendo Farisi dengkoha ne kaengkohaꞌano anabii Musa, dokokuasa damaꞌanaki pahintano.

³ Dadiꞌanomo angkafieꞌomu bhe dhalangieꞌomu kosasawiꞌae nefoinaꞌuꞌaondo, tamaka koise sandahaomu podiundo, kapaꞌamo andoa itu miina dadhumalangiea nefoinaꞌuꞌaondo.

⁴ Sabhaha tubho nehabundo tapedamo wowoꞌo mobhie, dotapue maka dofewowoꞌonie ne mie bhaindo, tamaka wutondo dongahe bhe dadumingkue.

⁵ Kosasawiꞌae kahadhaa nehabundo patudhundo so kaowu daoha mie bhaindo. Kawawe kasambaheaꞌando dofekawahe-waheꞌie, dhambe-dhambeno dhubando dofekawanta-wantaꞌie.

⁶ Weo kahame doasiane dengkoha ne kaengkohaꞌando kabhala, weo lambu kasambaheaꞌa dengkoha te wise-wise.

⁷ Doasiane dua dofosibhalada we wuntano daoa bhe dokonada guru.

⁸ Tamaka hintimiu koise undaomu dakumonakoomu guru, kapaꞌamo seemie kaowu gurumiu; kosasawimiu itu sebhahi-bhahitieꞌomu.

⁹ Koise fokoamaomu ne laꞌae maka dua ne dhunia ini, kapaꞌamo seemie kaowu Amamiu, Amamiu te surugaa.

¹⁰ Koise undaomu dakumonakoomu neangka, kapaꞌamo seemie kaowu neangkamiu, Mesias Omputo Fosalamatino.

¹¹ Laꞌae moindalono nafoliu kabhalano soda ne olotamiu itu, tabeano naꞌumondofao kafaraluundo mie bhaindo.

¹² Kotika mekalangkeno wutono namekapandae Ompu, kotika mekapandano wutono namekalangkee.

¹³ Balaamoomu, pande-pande Kitabi bhe miendo Farisi, hintimiu mie mehaaꞌulano, kapaꞌamo songkoemoomu fointono Kafopahintaꞌano Lahataꞌala ne wisendo mie bhaimu. Hintimiu mokiidoomu mesuaꞌomu pakade meꞌontomiomu mie so mesuano.

¹⁴ [Balaamoomu, pande-pande Kitabi bhe miendo Farisi, hintimiu mie mehaaꞌulano, kapaꞌamo mebhohe-bhoheꞌiomu bhihinanda maka rampasiomu lambudo. Sambaheamiu fekawanta-wantaeꞌomu mbali kaowu powohando mie. Dadiꞌanomo nasedhuluꞌa dua kabhie kahukumu so neꞌawamiu.]

¹⁵ Balaamoomu, pande-pande Kitabi bhe miendo Farisi, hintimiu mie mehaaꞌulano, kapaꞌamo mebhosekiomu teꞌi bhe mepalintangianeomu wite so kaowu mefopesuaꞌaoꞌomu naseemie weo agamamiu; tamaka sapesuano habuemoomu so mieno narakaa, kadaino podiuno sangke haa paku bhe podiumiu.

¹⁶ Balaamoomu, hintimiu kabunto fotondano. Ambamiu, ‘Ane dopodhandi bhe dofemata dosambili Lambuno Lahataꞌala, podhandi maitu miina nakoꞌuluꞌa. Tamaka ane dopodhandi bhe dofemata dosambili bulawano Lambuno Lahataꞌala, podhandi maitu tabeano tetewei dadhumalangie.’

¹⁷ Hintimiu mie bhohe bhe kabunto! Ingka noliuꞌe Lambuno Lahataꞌala bhe bulawa, kapaꞌamo katifekangkiloꞌano bulawa hampano neate weo Lambuno Lahataꞌala.

¹⁸ Ambamiu, ‘Ane dopodhandi bhe dofemata dosambili medha kaetunuꞌa kapopanga, podhandi maitu miina nakoꞌuluꞌa. Tamaka ane dopodhandi bhe dofemata dosambili kapopanga te wawono medha maitu, podhandi maitu tabeano tetewei dadhumalangie.’

¹⁹ Hintimiu mie kabunto! Ingka noliuꞌe medha aitu bhe kapopangano, kapaꞌamo katifekangkiloꞌano kapopanga hampano neate te wawono medha aitu.

²⁰ Dadiꞌanomo ane dopodhandi bhe dofemata dosambili medha kaetunuꞌa kapopanga, ingka dosambilimo medha anaꞌa bhe kosasawiꞌae kapopanga netei te wawono medha aitu.

²¹ Ane dopodhandi bhe dofemata dosambili Lambuno Lahataꞌala, ingka dosambilimo Lambu anaꞌa bhe Lahataꞌala meateno ne itu.

²² Ane dopodhandi bhe dofemata dosambili surugaa, ingka dosambilimo dua kaengkohaꞌano Lahataꞌala bhe Wutono mengkohano ne kaengkohaꞌa aitu.

²³ Balaamoomu, pande-pande Kitabi bhe miendo Farisi, hintimiu mie mehaaꞌulano! Kapaꞌamo taꞌolentu-lentuomu pehapimiu mohobuꞌino peda sabhaha kagule. Feompulu dawueꞌomu maka sedawu gaatiemoomu so kapopanga ne Lahataꞌala. Gahaꞌa fofoliuꞌano kafaraluu weo tubhono agama miina konamianeomu. Foliuꞌano kafaraluu anaꞌa peda kaꞌadhili, pomobhe-mobhelaꞌao lalo bhe kataino lalo. Tolu hondano aini tetewei dhalangieꞌomu, tamaka sehondano saꞌituini koise dua molimpuꞌaneomua.

²⁴ Hintimiu kabunto fotondano! Konunu weo kafohoꞌumiu tiisangieꞌomu, tamaka ane o kahumbau taꞌotolomoomu.

²⁵ Balaamoomu, hintimiu pande-pande Kitabi bhe miendo Farisi, mie mehaaꞌulano! Kapaꞌamo kampohoꞌuꞌa bhe kampomaaꞌa fewaniuꞌeomu kundono, tamaka we lalo nohaku, noponoꞌao hasilino karampasiꞌa bhe kakadau-daumiu.

²⁶ Miendo Farisi mobuntono, fewaniuꞌomu kadeki we lalono kampohoꞌuꞌa itu maka we kundono naonggelamo dua.

²⁷ Balaamoomu, pande-pande Kitabi bhe miendo Farisi, mie mehaaꞌulano! Kapaꞌamo hintimiu itu tapedamo kobuhu neꞌefii, we simbali nokesa wohaꞌano, gahaꞌaitumo we lalo sanea buku bhe sabhaha giu mohaku sigaoꞌano.

²⁸ Pedamo dua hintimiu itu, ne pomatando mie wohaꞌamiu mie banara, gahaꞌaitumo we lalomiu sanea fekihi mehaaꞌulano bhe isikadhi modai.

²⁹ Balaamoomu, pande-pande Kitabi bhe miendo Farisi, hintimiu mie mehaaꞌulano! Kapaꞌamo mehabuomu kobuhu mokesaꞌano so ana-anabii bhe mefekakesaꞌiomu bhata kafeꞌulaindo mie lumebeno.

³⁰ Ambamiu, ‘Ane tadumadi ne dhamanindo awuaꞌi mani, tetewei paise tamangkafi habundo tamongko anabii andoa maitu.’

³¹ Tamaka hampano pugaumiu naꞌa, ingka akuiꞌemoomu hintimiu itu sampuꞌando mongkono ana-anabii.

³² Dadiꞌanomo fopansuhumoomu, fosangkaeꞌomu dhosa-dhosando awuaꞌimiu, fopono kasukando!

³³ Hintimiu ule, sampuꞌando ule modai! Koe fehoo-hooꞌomu lumapaomu ne kahukumuno narakaa.

³⁴ Dadiꞌanomo, amohatokoomu: mada kaowu aetuduangkoomu ana-anabii, mie kotimbangi bhe pande-pande Kitabi. Andoa maitu sigaꞌa mongkodaomu bhe kumantaidaomu te sau salipu, sigaꞌa humambisiandaomu habuta weo lambu kasambaheaꞌa, maka umamba-ambadaomu dapontaala-ala ne amai kota.

³⁵ Pedamo anaꞌa tumongkuomu dhosano limbano heando mie nepongko tapa kokaꞌala, notanda ne Habel ampa ne Zakaria anano Berekya. Habel ini mie banara; Zakaria pongkoeꞌomu ne kadeteno Lambuno Lahataꞌala, ne olotano boloku mongkilo bhe medha kaefoampeꞌa.

³⁶ Amohatokoomu, kotu-kotuꞌu kahukumuno kosasawiꞌae dhosa aini damotongkuandae mie dhamani aini!”

Yesus nofedeeꞌao kotano Yerusalem 23:37-39

³⁷ “Yerusalem, Yerusalem! Hintumo mongkono ana-anabii bhe bhatumbulino mie netudu ne hintu. Nentuhumo nokamba laloku ne hintu, amohompu raꞌeatimu, kanggetu inano manu nofohompu anano we towawano panino, tamaka hintimiu mokiidoomu.

³⁸ Dadiꞌanomo lambumu ini natihunsamo bhe naolino.

³⁹ Amohatokoomu, notanda aitu paemo moha kanauꞌomu, ampa mugauꞌomu, ‘Notibarakati maino weo neano Ompu.’ ”