Matius 22 - Muna Southern Dialect

Kapalendano hame-hameno kakawi 22:1-14

¹ Pada anaꞌa Yesus nopugau toha nepakeanda kapalenda.

² Ambano, “Kafopahintaꞌano Lahataꞌala tapedamo seemie omputo nehabu hame-hame kakawino anano.

³ Netudumo bhatuano dasumunsumi mie nebhasino so maino se hame-hameno naꞌa, tamaka mie andoa naꞌa dokiido damai.

⁴ Fendua toha netudu bhatua sigaoꞌano bhe nopugauanda ambano, ‘Fohatodaomu mie nebhasi naꞌa, ‘Ingka oti padamo ataganae, sapiku moꞌane bhe anano sapi kampuhobuku padamo dosumbeleda. Kosasawiꞌae notokamo, maimoomu se hame-hameku ini.’ ’

⁵ Tamaka mie nebhasi naꞌa miina daoheruanda, tadokala. Nandoo kumalano te kaampono, nandoo kumalano gumiuno.

⁶ Nandoo dua sigaoꞌano dohako bhatuano, dofodee-deeda maka dopongkoda.

⁷ Omputo anaꞌa noꞌamaha sepaliꞌa, maka notudumo tantarano dakumala damobinasa fopongkono naꞌa, dasumulae bhe liwundo.

⁸ Pada anaꞌa nopugaumo ne bhatuano ambano, ‘Hame-hameno kakawi notokamo, tamaka mie nebhasi miina damantasia.

⁹ Dadiꞌanomo kalaomu ne amai sala bhalano saliꞌidaomu kotika mie nepoꞌawaꞌaomiu damai se hame-hameku ini.’

¹⁰ Bhatuano naꞌa dokalamo maka sabhaha mie nepoꞌawaꞌaondo we sala dopadada dofohompuda, namie modai namie metaa. Mie andoa itu dowowoꞌoda sampe boloku kahame-hameꞌa naꞌa noponoꞌao mie humato.

¹¹ Pada anaꞌa nopesuamo omputo napoꞌawaꞌao mie humatono maitu. Gahaꞌa nowohamo seemie tapa mepakeno pakeano hame-hame.

¹² Nopugaumo ambano, ‘Sabhangka, peda ae dua tapesuamo ne ini miina mepake pakeano hame-hame?’ Tamaka mie anaꞌa miina nakodiua.

¹³ Nopugaumo omputo anaꞌa ne mieno ambano, ‘Tapuomu limano bhe aꞌeno maka ohoeꞌomu we simbali, weo doloma mposo. Ne naꞌa taꞌo kangkoꞌae bhe kuꞌino wangka.

¹⁴ Kapaꞌamo nobhahi tibhasino tamaka seendai kaowu tipilino.’ ”

Tanduaꞌano sewa ne Omputo Kaisar 22:15-22

¹⁵ Pada anaꞌa miendo Farisi dokalamo dopugau-gau bhahaꞌi nada amai dameena ne Yesus so dametandoꞌao alano wambano.

¹⁶ Dotudumo anaguhuꞌindo dapoowa-owa bhe mieno kolaki Herodes dofeena ne Yesus ambado, “Guru, tapandeꞌaane nelaa lalomu. Weo kalaano lalomu fofoinaꞌuꞌao sala metaano Lahataꞌala so manusia. Miina koniengatia, hampano miina poꞌala-alaanda manusia.

¹⁷ Soba fohato kainsami, peda ae fekihimu, weo tubhono agamantoomu, naembali bhahaa datumanduao sewa ne Omputo Kaisar kaa paise?”

¹⁸ Tamaka Yesus nopandeꞌaane kadaino isikadhindo, dadiꞌanomo nopugaumo ambano, “Mie mehaaꞌulano, noafa solo-solo kanauꞌomu?

¹⁹ Fotiwoha kanauꞌomu kupa so sumewaꞌaoꞌomu itu.” Deowaanemo sewoka dhoi pera.

²⁰ Nofeenadamo ambano, “Gambarano ula bhe nea laꞌae gahaꞌa inia?”

²¹ Dotobhoosi ambado, “Ula bhe neano Omputo Kaisar.” Ambano toha Yesus, “Bahangka peda naꞌa, fehebuaꞌano Omputo Kaisar waꞌaneomu Omputo Kaisar, fehebuaꞌano Lahataꞌala waꞌaneomu Lahataꞌala.”

²² Dofetingke peda naꞌa, tadomente. Lasao dokukundo Yesus kokala-kalando.

Miendo Saduki dofeenaꞌao kawanuꞌando mie mate 22:23-33

²³ Ne oleo anaꞌa domaimo dua miendo Saduki. Andoa ini miina damarasaeaꞌa kawanuꞌando mie mate. Andoa dofeenamo ne Yesus ambado,

²⁴ “Guru, ambano anabii Musa, ane o moꞌane nomate tamaka hobhineno miinaꞌo nakoanaa, maka kakutano moꞌane tetewei nagumaa bhe bhihinandano naꞌa, neanomo anano dakumonae sampuꞌano mateno maitu.

²⁵ Ne olota mani nandoo dopipitu dosekakutaꞌa sanea moꞌane. Titiisa nogaa tamaka nomate miinaꞌo nakoanaa. Mbaꞌinomo miinaꞌo nakosampuꞌa katuluno nogaa bhe bhihinandano.

²⁶ Gahaꞌa nomate dua miinaꞌo nakoanaa. Pedamo dua aitu aino tuluꞌano. Pedamo anaꞌa kansuhu sampe kopipitundo domate, sanea tapa koanano.

²⁷ Panda-pandano nomate dua hobhine naꞌa.

²⁸ Nahumato oleo kawanuꞌando mie mate, so mieno lambu laꞌae hobhine amaitua? Ingka kopipitundo sanea gumaaꞌane.”

²⁹ Yesus notobhoosida ambano, “Ingka noꞌala fekihimiua, mbaꞌinomo miina mandeꞌaaneomua wambano Kitabi, miina dua mandeꞌaaneomu kuasano Lahataꞌala.

³⁰ Kapaꞌamo nahumato kawanuꞌando mie mate, andoa dadumadi nada malaꞌekati te surugaa: paemo dagumaa, paemo dua damogaada.

³¹ Ane kawanuꞌando mie mate, miinaꞌo basaeꞌomua bhahaa bhoasaono Lahataꞌala peda aini,

³² ‘Idimo ini Lahataꞌalano Abraham, Lahataꞌalano Ishak bhe Lahataꞌalano Yakub.’ Maꞌanano Ompu Lahataꞌala suano Lahataꞌalando mie mate tamaka Lahataꞌalando mie dumadi.”

³³ Dofetingke kafoinaꞌuno naꞌa, mie bhahi tadomente.

Pahinta fofoliuno kabhala 22:34-40

³⁴ Miendo Farisi dofetingke putae miendo Saduki miinamo dakowobhaa dowiseki Yesus. Dadiꞌanomo dopofoꞌo-foꞌonumo.

³⁵ Seemie pande Kitabi ne olotando naꞌa nofeenamo nomansoꞌalai Yesus.

³⁶ Ambano, “Guru, pahinta medando amai gahaꞌa fofoliuno kabhala weo Kitabino Musa?”

³⁷ Ambano Yesus, “Moasiane Ompu Lahataꞌalamu sampuu-mpuuno lalomu, sampuu-mpuuno alusumu, sampuu-mpuuno fekihimu.

³⁸ Ainiꞌaemo pahinta kabhao-bhaono bhe fofoliuno kabhala.

³⁹ Pahinta katuluno nopototo bhe anaꞌa: moasiꞌao manusia bhaimu peda kaasimu ne wutomu.

⁴⁰ Kosasawiꞌae pahinta weo Kitabino Musa bhe Kitabindo ana-anabii nengkohamo ne pahinta haa hondano ini.”

Pokaiꞌano Yesus bhe Daud 22:41-46

⁴¹ Tangasano miendo Farisi dopohompu-hompu, Yesus nofeenadamo ambano,

⁴² “Peda amai fekihimiua ne Mesias Omputo Fosalamatino maitu? Sampuꞌa laꞌae bhahaa?” Ambado, “Sampuꞌano Daud.”

⁴³ Ambano Yesus, “Ane peda naꞌa noafa gahaꞌa Daud weo kuasano Rohino Lahataꞌala, nokona Omputo Fosalamatino maitu Ompuno? Ingka nopugau peda aini,

⁴⁴ ‘Ompu Lahataꞌala nokowambamo ne Ompuku, Mengkoha ne suanaku sampe kaewamu amolongkoda ne wawono aꞌemu.’

⁴⁵ Dadiꞌanomo ane nokonae Ompuno, noafaꞌao dua nembali sampuꞌano?”

⁴⁶ Bhe naseemie miina bhe mandeno tumobhoosie; notanda oleo aitu bhe seemie miinamo dua bhe mokadono so meenae.