Matius 21 - Muna Southern Dialect

Yesus doꞌia-iaꞌe we kota Yerusalem 21:1-11

¹ Yesus bhe anaguhuꞌino domaꞌomo we Yerusalem. Dohato we liwuno Betfage te kabhawono Zaitun, Yesus notudumo anaguhuno dohodua damaꞌindulu.

² Nofohatoda ambano, “Kalaomu we liwu te wise watu, ne itu lasao mohaomu seꞌulu keledai hobhine dotapue bhe anano ne owano. Lenseomu katapuno maka tonda kanaꞌeomu se ini.

³ Ane bhe so meenano, tatobhoosimoomu putae nofaraluuꞌe Ompu, ingka pae naomponaa namosuliemo dua.”

⁴ Aini nokadhadhia mbali nokoꞌulaꞌao bhoasaono Lahataꞌala nefosampeno anabii peda aini,

⁵ “Fohatodaomu mieno kotano Sion, ‘Ondoeꞌomu! Omputomiu nomaiꞌikoomu. Nomalu lalono, nosawi ne keledai, anano keledai meangkuno wowoꞌo.’ ”

⁶ Anaguhuꞌino maitu dokalamo, doangkafi peda netuduꞌaono Yesus.

⁷ Hato dosuli detondamo keledai hobhine bhe anano. Pada aitu towuno keledai naꞌa dolempesianemo pakeando maka Yesus nengkoha te wawono.

⁸ Dobhahi sepaliꞌa mie dotalesao pakeando ne kaangkaꞌa. Nandoo dua mekapesino haꞌando sau maka dotalesaane ne kaangkaꞌa.

⁹ Mie bhahi maꞌinduluno bhe mangkano kundo doꞌia-iaꞌe ambado, “Hosana, sampuꞌano Daud! Notibarakati humatono weo neano Ompu. Hosana, pudhi kaitaomu Ompu Lahataꞌala te wawono wawo!”

¹⁰ Sanopesua weo kotano Yerusalem, mieno kota tadohialelemo ambado, “Laꞌae bhahaa mie aini?”

¹¹ Mie bhahi maitu dotobhoosi ambado, “Ainiꞌaemo anabii Yesus maiꞌaono we liwuno Nasaret, we kadieno Galilea.”

Yesus nogihasi podaoano weo Lambuno Lahataꞌala 21:12-17

¹² Pada anaꞌa Yesus nopesuamo weo kadeteno Lambuno Lahataꞌala, maka nogihasi sabhaha mie podaoano ne itu. Medhando mebhase-bhaseno dhoi bhe bhangko-bhangkondo mahaasono dhaadhaha nobhansualeda.

¹³ Yesus nofohatoda ambano, “Nandoo tibuhino weo Kitabi peda aini, ‘Lambuku dakumonae lambu kasambaheaꞌa, tamaka hintimiu habueꞌomu mbali lia kaꞌonuꞌando mie modai.’ ”

¹⁴ Pada aitu domaimo mie kabunto bhe kakempa ne Yesus weo Lambuno Lahataꞌala naꞌa, maka nofekaꞌosada.

¹⁵ Tamaka neangkando imamu bhe pande-pande Kitabi nohehewu sepaliꞌa lalondo dowoha sabhaha giu timenteꞌaono nehabuno Yesus maitu. Sedhuluꞌa dua kahehewuno lalondo mbaꞌinomo kaana-anaꞌi weo Lambuno Lahataꞌala dopokakei-kei ambado, “Hosana, sampuꞌano Daud!”

¹⁶ Dopugaumo ne Yesus ambado, “Fetingkee bhahaa pugaundo kaana-anaꞌi ini?” Ambano Yesus, “Afetingkee. Miinaꞌo basaeꞌomua gahaꞌa aeati peda aini, ‘Padamo mefontaa-ntaa kaana-anaꞌi bhe anaꞌi nandoo tumitino so mefoampeno lagu-lagu kapudhi.’ ”

¹⁷ Pada nopugau peda aitu, Yesus nohunsadamo, nokala te liwuno Betania maka noodo ne itu.

Yesus nebhatataꞌiao puꞌuno ara 21:18-22

¹⁸ Nandoo hangko-hangkowine Yesus nosulimo toha we kota, gahaꞌa noꞌahomo.

¹⁹ Ne wiwino kaangkaꞌa naꞌa Yesus nowohamo puꞌuno ara. Nokalamo nofeꞌondoe, gahaꞌa miina nakobhakea, taꞌo hoo. Nopugaumo ne sau maitu ambano, “Hintu ini paemo kobhakea suhue dhamani.” Puꞌuno ara aitu lasao nokekele.

²⁰ Dowoha kadhadhia aitu anaguhuꞌino tadomente bhe dopugau ambado, “Peda ae puꞌuno ara maitu tadua nokekelemo?”

²¹ Ambano Yesus, “Amohatokoomu, kotu-kotuꞌu ane marasaeaꞌomu bhe paise poibhahaomu, tetewei mooliomu dua mehabuomu peda nehabuku ne puꞌuno ara maitu. Bhahamoa suano kaowu taꞌo anaꞌa, tamaka mahingga pugauꞌomu ne kabhawo aini, ‘Sangke wutomu maka oho wutomu we teꞌi’, tetewei nakumadhadhia.

²² O ae maka dua nemesalomiu weo sambaheamiu, tetewei umawaeꞌomu, sumanomo kotu-kotuꞌu parasaeaꞌomu.”

Dofeenaꞌao kuasano Yesus 21:23-27

²³ Yesus nopesuamo toha weo Lambuno Lahataꞌala. Tangasano nofofoinaꞌu ne itu domaimo neangkaꞌindo imamu bhe kamu-kamungkulaꞌindo Yahudi dofeena ambado, “O ae gahaꞌa kaengkohaꞌano kuasa mehabu sabhaha timenteꞌaono maitu? Nofopooliko laꞌae bhahaa?”

²⁴ Yesus tanotobhoosida ambano, “O Idi ameena dua. Ane tumobhoosi kanauꞌomu, amohatoangkoeꞌomu dua kaengkohaꞌano kuasaku.

²⁵ Nomaiꞌao ne amai bhahaa kuasano Yohanes nofokadiu? Nomaiꞌao ne Lahataꞌala bhahaa nomaiꞌao ne manusia?” Pada aitu dopuga-pugaumo sapada-pada andoa, ambado, “Ane damugauꞌomu nomaiꞌao ne Lahataꞌala tetewei namugau, ‘Noafa gahaꞌa miina marasaeaꞌaneomua?’

²⁶ Tamaka ane damugauꞌomu nomaiꞌao ne manusia, beano daoteꞌiomu mie bhahi, kapaꞌamo kosasawindo mie doabhi Yohanes maitu seemie anabii.”

²⁷ Pada aitu dotobhoosimo ne Yesus ambado, “Miina tamandeꞌaanea.” Ambano dua Yesus, “Ane peda itu, paise dua amohatokoomua kaengkohaꞌano kuasaku aehabu sabhaha timenteꞌaono maitu.”

Kapalendano dohodua anaꞌi 21:28-32

²⁸ Ambano toha Yesus, “Peda amai fekihimiu ane peda aini? Nandoo seemie ama bhe ana moꞌaneno dohodua. Nokalamo ne anano titiisa maka nopugau ambano, ‘Anaku, seꞌoleo itu kala kahadhaa kaita te kaampono angguru.’

²⁹ Anano naꞌa notobhoosi, ‘Uumbe ama’, tamaka miina nakumalaa.

³⁰ Pada aitu amando naꞌa nopugaumo dua ne aino peda pugauno ne isano saꞌituini. Anano naꞌa tanotobhoosi, ‘Akiido akumalaa’, tamaka gahaꞌa nososo lasao nokala.

³¹ Laꞌae bhahaa anaꞌi hoduano maitu mangkafino kapoindalono amando?” Dotobhoosimo mie andoa naꞌa ambado, “Membalino ai.” Ambano Yesus, “Amohatokoomu, kotu-kotuꞌu mealaꞌino sewa bhe karambole damaꞌindulu damesua weo Kafopahintaꞌano Lahataꞌala bhe hintimiu ini.

³² Kapaꞌamo Yohanes nomai nofotiwohaangkoomu kaangkaꞌano dadi metaa, tamaka miina marasaeaꞌeomua, gahaꞌa mealaꞌino sewa bhe karambole doparasaeaꞌe. Tamaka hintimiu, mahinggamo wohaeꞌomu peda maitu, miina sumosoomua, miina dua marasaeaꞌomua.”

Kapalendano kumahadhaano te kaampono angguru 21:33-46

³³ “Fetingkeomu dua kapalenda aini. Nandoo seemie kafeompuꞌa nelengka kaampo, nokantisaane angguru maka nopagalae fato-fatowalaꞌae. Neseliane dua bhe kantobha kaefeoꞌano angguru bhe nefoeheane kapala kaedhaganiꞌa. Pada aitu neponambomo mie so kumahadhaano kaampo naꞌa, maka nokala we koliwuno.

³⁴ Nomaꞌo tempono foꞌonuꞌano pehapi, netudumo bhatuano dokala te kumahadhaano naꞌa damala dawuno kafeompuꞌando.

³⁵ Tamaka kumahadhaano maitu tadohako bhatuano naꞌa; sigaꞌa dopepekida, sigaꞌa dopongkoda, sigaoꞌano dobhatumbulianda kontu.

³⁶ Pada aitu kafeompuꞌa naꞌa notudumo dua bhatuano sigaoꞌano, sedhuluꞌa dua kabhahindo. Tamaka andoa ini dohabuda dua peda sabhangkaꞌindo maꞌinduluꞌano.

³⁷ Panda-pandano kafeompuꞌa naꞌa notudumo anano. Weo fekihino, ‘Anaku ini daengatie.’

³⁸ Tamaka gahaꞌa sadowoha anano kafeompuꞌando, kumahadhaano maitu dopugaumo sapada-pada andoa, ambado, ‘Ananomo ini so kohakuꞌaono kahunsaꞌaono. Dopongkoeꞌanaomu, neanomo kahunsaꞌaono somo intaodiomu.’

³⁹ Lasao dohakoe, doꞌohoe we kundo ala maka dopongkoe.

⁴⁰ Nahumato kokaampono naꞌa, namafaꞌianda bhahaa kumahadhaano maitu?”

⁴¹ Dotobhoosie ambado, “Mie modai naꞌa namongkoda. Kaampono naeponamboane dua mie sigaoꞌano so maꞌane dawuno nahumato tempono foꞌonuꞌano pehapi.”

⁴² Ambano Yesus, “Miinaꞌo basaeꞌomua gahaꞌa tibuhino weo Kitabino anabii peda aini, ‘Kontu neꞌohondo mefelambuno, gahaꞌa nembalimo sandi bhalano. Kapedaꞌano naꞌa hampano kuasano Ompu, wohaꞌano giu timenteꞌaono.’

⁴³ Dadiꞌanomo, amohatokoomu, hakumiu weo Kafopahintaꞌano Lahataꞌala namalae Lahataꞌala, maka namaꞌandae bansano liwu sigaoꞌano so dhumalangino pahintano.

⁴⁴ [Mondawuno te wawono kontu aitu naowita, nendawutino kontu aitu naopuho.]”

⁴⁵ Dofetingke sabhaha kapalendano Yesus naꞌa, neangkaꞌindo imamu bhe miendo Farisi dolosangie, ingka andoamo nepulaoꞌaono maitu.

⁴⁶ Dadiꞌanomo dokopatudhu dahumakoe tamaka doteꞌi mie bhahi, kapaꞌamo mie bhahi maitu doabhi Yesus seemie anabii.