Matius 18 - Muna Southern Dialect

Foliuno kabhala weo Kafopahintaꞌano Lahataꞌala 18:1-5

¹ Wakutuu anaꞌa anaguhuꞌino domaimo ne Yesus dofeena ambado, “Laꞌae bhahaa foliuno kabhala weo Kafopahintaꞌano Lahataꞌala?”

² Yesus nesaliꞌimo seemie anaꞌi maka nofoehe-ehee ne wunta-wuntando,

³ bhe nopugau ambano, “Amohatokoomu, kotu-kotuꞌu ane pae bhaliiꞌomu fekihimiu maka membaliomu nada anaꞌi, pae mesuaꞌomua weo Kafopahintaꞌano Lahataꞌala.

⁴ Laꞌae mekapandano wutono peda anaꞌi aini, anoamo itu foliuno kabhala weo Kafopahintaꞌano Lahataꞌala.

⁵ Laꞌae tumahimano anaꞌi kahobu medando ini weo neaku, anoa notahimamo Idi.”

Mie mehabuno tingkuno dhosa so manusia bhaindo 18:6-11

⁶ “Tamaka laꞌae mehabuno tingkuno dhosa so mie mepandano kaengkohaꞌa peda anaꞌi aini, sampe miinamo namarasaea ne Idi, naetaa dakumantaiane kagili kontu ne wuꞌuno maka damotondue weo ndalo.

⁷ Nobalaamo mieno dhunia mehabuno tingkuno dhosa. Daanumo tingkuno dhosa sadhia nonandoo, tamaka nobalaamo mie humabue.

⁸ Ane limamu tawa aꞌemu naehabuangko dhosa, totoe maka ohoe, kapaꞌamo naetaa mesua weo dadi suhue dhamani nasedhodho limamu tawa mokempa, bhe mesua weo efino narakaa kohaambaliꞌae limamu bhe aꞌemu.

⁹ Ane matamu naehabuangko dhosa, sungkie maka ohoe, naetaa mesua surugaa komata sembali, bhe komata haa mbali maka daꞌumohoko we efino narakaa.

¹⁰ Tandaiꞌeomu, koe pisakidaa mie mohobu pedando ini, kapaꞌamo malaꞌekati dhumaganida sadhia dopowise bhe Amaku te surugaa.

¹¹ [Kapaꞌamo Anano Manusia nomai namosalamati kolilinono totono lalo].”

Kapalendano dhumba miinaeꞌano 18:12-14

¹² “Peda amai fekihimu? Ane seemie nokodhumba moꞌono ulu, maka nomiinae seꞌulu, naeafamo bhahaa? Ingka tetewei tanahumunsada te kabhawo siua fulu siua uluno, maka naꞌumondofi miinaeꞌano naꞌa.

¹³ Amohatokoomu, kotu-kotuꞌu ane nopoꞌawaane kaowu, nobhalamo kaꞌiano ne dhumba seꞌuluno maitu bhe ne dhumba siua fulu siua uluno tapa miinaeꞌano.

¹⁴ Pedamo dua aitu Amamu te surugaa nokiido namoha seemie mohobu pedando ini namiinae.”

Dopotanga-tangahi 18:15-20

¹⁵ “Ane bhahitiemu nakokaꞌala, tangahie hoduaꞌomu kaowu; ane nametingke katangahimu, ingka pooliemo, sulimo nembali bhahitiemu.

¹⁶ Ane paise nametingkeko, mewowoꞌo bhe sabhangkamu naseemie bhahaꞌi dahodua. ⸤ Kapaꞌamo notibuhi weo Kitabi⸥ , ‘Sehonda parakara kaneꞌomo notiangga ane bhe sakusiino dohodua tawa dototolu.’

¹⁷ Ane nandoo dua nokiido natumahimae, fohatoandae umati. Ane umati pae dua nametingkeda, abhieꞌomu mie aitu mie tapa mandeꞌaono Lahataꞌala tawa mie kodhosano peda mesalo-salono sewa.

¹⁸ Amohatokoomu, kotu-kotuꞌu: o ae neꞌeleaꞌaomu we dhunia ini, natiꞌeleaꞌao dua te surugaa; o ae neꞌundaꞌaomu we dhunia ini, natiꞌundaꞌao dua te surugaa.

¹⁹ Amohatokoomu dua, ane ne dhunia ini dohodua ne olotamiu itu doseꞌise desalo weo sambaheando, o ae maka dua kamesalondo naꞌa, namekakoꞌulae Amaku te surugaa.

²⁰ Kapaꞌamo ane dohodua tawa dototolu dopohompu-hompu weo neaku, bhemo dua Idi ne itu.”

Kapalendano pomaꞌa-maꞌafuꞌao 18:21-35

²¹ Pada anaꞌa nomaimo Petrus maka nofeena ne Yesus ambano, “Ompu, ane bhahitieku nokokaꞌala ne idi, ampa fee paku bhahaa amaꞌafuane? Ampa fitu paku bhahaa?”

²² Ambano Yesus, “Paise! Amohatokoomu, suano fitu paku, tamaka fitu fulu fitu paku.

²³ Kapaꞌamo Kafopahintaꞌano Lahataꞌala tapedamo seemie kolaki so polentuno bhe bhatuaꞌino.

²⁴ Netandaki kaowu, deowaanemo kodosano ompulu hewu bhoka.

²⁵ Tamaka dosano maitu miinamo namoolie nopomeaꞌea, dadiꞌanomo kolaki naꞌa netudumo mie damaso bhatua aitu bhe anano bhe hobhineno bhe sabhaha fehebuaꞌano so kapomeano dosano.

²⁶ Gahaꞌa bhatua anaꞌa nosudhumo bhe notaohao sombano ambano, ‘Sabaha kanau kadeki waompu, kosasawiꞌae dosaku itu amomeaꞌe.’

²⁷ Kolaki anaꞌa nobhelamo dua lalono ne bhatuano maitu, sampe nofolapae bhe kosasawiꞌae dosano nofosaliemo.

²⁸ Tamaka hato nolimba bhatua anaꞌa, nopoꞌawa bhe sabhangkano kodosano ne anoa moꞌono dhoi pera. Kodosano naꞌa lasao nohakoe bhe nogonso wuꞌuno, ambano, ‘Pomea dosamu!’

²⁹ Gahaꞌa sabhangkano naꞌa nosudhumo bhe notaohao sombano ambano, ‘Sabaha kanau kaꞌasi, dosaku itu tetewei amomeaꞌe.’

³⁰ Tamaka bhatua naꞌa nokiido, sampe nofopesua sabhangkano weo katohongku ampa nopomea dosano.

³¹ Dowoha peda maitu sabhangkaꞌino sigaoꞌano nokompeaha sepaliꞌa lalondo sampe dokala dofohato kafeompuꞌando.

³² Kolaki anaꞌa nofotudumo dalumoꞌoi bhatua saꞌituini. Sahatono nopugaumo ambano, ‘Hintu bhatua modai! Kosasawiꞌae dosamu afosaliangkoe hampano kamesalomu.

³³ Ingka tabeano nobhela dua lalomu ne bhatua bhaimu, peda dua kabhelano laloku ne hintu.’

³⁴ Kolaki anaꞌa noꞌamaha sepaliꞌa sampe nofotudumo damopesuaꞌe weo katohongku bhe damodee-deeꞌe, ampa natipomea kosasawiꞌae dosano.

³⁵ Pedamo anaꞌa Amaku te surugaa nahumabukoomu, ane paise maꞌafuꞌaoꞌomu bhahitiemiu weo kawolono lalomiu.”