Matius 17 - Muna Southern Dialect

Anaguhuꞌino dowoha kakalabhiano Yesus te kabhawo 17:1-13

¹ Nopalusi nomo oleo, Yesus nowowoꞌomo Petrus, Yakobus bhe Yohanes kakutaꞌano Yakobus, dofoni te kabhawo melangkeꞌano. Ne itu domoisa kaowu.

² Gahaꞌa Yesus tanotibhaliimo ulano ne wisendo. Wohaꞌano nokotilanga peda oleo, pakeano kapute kosilo.

³ Pada anaꞌa dowohamo anabii Musa bhe anabii Elia dopuga-pugau bhe Yesus.

⁴ Gahaꞌa nopugaumo Petrus ambano, “Ompu, ingka netaa domaiꞌomu ne ini. Ane moindalo naetaa aefoehe natolu onu bhantea ne ini. Seꞌonu so Hintu, seꞌonu so anabii Musa bhe seꞌonu so anabii Elia.”

⁵ Tangasano Petrus nopugau, tanosikaolumidamo olu nentalea sepaliꞌa. Nomaiꞌao weo olu naꞌa notifetingkemo suaha ambano, “Ainimo Anaku timoasiꞌaono, neposahasiꞌaono laloku, fetingkeeꞌomu pugauno.”

⁶ Dofetingke peda naꞌa, anaguhuꞌino defodapa ne wite, doteꞌi sepaliꞌa.

⁷ Yesus nomaiꞌidamo, nodingkuda bhe nopugau ambano, “Eheomu, koise moteꞌiomua!”

⁸ Hato dofowanu fotundo miinamo dakoniwohaa, tamo Yesus nomoisa.

⁹ Wakutuuno dosampu domaiꞌao te kabhawo naꞌa, Yesus nopugauandamo ambano, “Koise mekapunaꞌaoꞌomu newohamiu saꞌituini ne laꞌae maka dua. Simbali Anano Manusia - Idimo ini - namanumo namaiꞌao ne mate, maka naembali mekapunaomu ne mie sigaoꞌano.”

¹⁰ Anaguhuꞌino dofeenamo ambado, “Ane peda naꞌa, noafa gahaꞌa ambado pande-pande Kitabi putae tetewei anabii Elia so maino wawo?”

¹¹ Ambano Yesus, “Daanumo anabii Elia so maino wawo, namosintuwu bhahi-bhahiꞌae.

¹² Amohatokoomu, sakotuꞌuno anabii Elia padamo nomai, tamaka mie miina damandeꞌaanea, tadohabumo ampa kapoindalondo. Nadamo dua anaꞌa Anano Manusia - Idimo ini - damodee-deeꞌe.”

¹³ Wakutuu aitu anaguhuꞌino dolosangiemo ingka Yesus nopulaoꞌao Yohanes Fokadiuno.

Yesus nefekaꞌosa seemie anaꞌi moꞌane mate manuno 17:14-21

¹⁴ Yesus bhe anaguhuꞌino dosulimo se mie bhahi. Dohato ne itu, nomaimo seemie notaohao sombano ne Yesus.

¹⁵ Ambano mie anaꞌa, “Ompu, aesalo kabhelano lalomu ne anaku. Anaku nomate manu, nokadee-dee sepaliꞌa. Nentelamo nondawu weo efi, nentelamo dua weo oe.

¹⁶ Ingka padamo aowandae anaguhuꞌimu, tamaka miina damondoiꞌea dofekaꞌosae.”

¹⁷ Nopugaumo Yesus ambano, “Pahasili hintimiu, mie tapa marasaeano bhe kolilinono totono lalo! Tana seꞌae gahaꞌa beano so kaomponano aeate bhe hintimiu? Tana seꞌae bhahaa so sabahaku? Owaeꞌomu se ini anaꞌi itu!”

¹⁸ Dohatoane kaowu, Yesus nohandapimo seetani ⸤ mesuakino anaꞌi⸥ aitu, gahaꞌa lasao nolimba maiꞌao ne anaꞌi maitu, koꞌosa-osano.

¹⁹ Pada aitu anaguhuꞌino domaimo ne Yesus. Hato tadomoisa, dofeenaemo ambado, “Noafa bhahaa ingka insaodi miina tamooliea tafolimba seetani saꞌituinia?”

²⁰ Ambano Yesus, “Mbaꞌinomo nokuha kaparasaeamiu. Dadiꞌanomo amohatokoomu, kotu-kotuꞌu ane kaparasaeamiu namooli nada onuno sau wonoita, naembali pugauꞌomu ne kabhawo aini, ‘Gampi maiꞌao ne ini’, maka kabhawo aitu tetewei nagumampi. Pakade, paemo dua bhe so tapa nepoolimiu.

²¹ [Tamaka seetani pedando aini miina natifolimba, simbali dosambahea bhe dopoasaane.]

Yesus nopugauꞌao toha so kamateꞌano 17:22-23

²² Wakutuuno Yesus bhe anaguhuꞌino dopohompu-hompu we Galilea, nofohatodamo ambano, “Paemo naomponaa, Anano Manusia - Idimo ini - damowae ne limando mie kokuasano.

²³ Andoa maitu damongkoe tamaka ne katolu oleono namanu maiꞌao ne mate.” Dofetingke peda naꞌa anaguhuꞌino nokompeaha sepaliꞌa lalondo.

Yesus notanduao sewa so Lambuno Lahataꞌala 17:24-27

²⁴ Wakutuuno Yesus bhe anaguhuꞌino dohato we Kapernaum, domaimo mealano sewano Lambuno Lahataꞌala ne Petrus bhe dopugau ambado, “Bhahaa gurumu miina natumanduaoa sewano haa woka perano so Lambuno Lahataꞌala?”

²⁵ Ambano Petrus, “Ingka notanduao dua.” Hato nopesua Petrus weo lambu, Yesus nosumpuianemo kafeena. Ambano, “Peda ae fekihimu Simon? Deala sewa ne laꞌae bhahaa kolakindo dhunia ini? Doalae ne raꞌeati bhahaa ne mie humato?”

²⁶ Ambano Petrus, “Ingka doalae ne mie humato.” Ambano toha Yesus, “Ane peda anaꞌa, raꞌeatindo dobebasimo, koemo dosewaa.

²⁷ Tamaka koemo dofekalea lalondo. Dadiꞌanomo kala mekabua kaita we teꞌi. Kenta kabhao-bhaono so nepoolimu, hakoe maka weo wobhano mewoha dhoi pera nakumapomo so sewanto dahodua. Ala dhoi aitu maka tanduao kaita sewano Lambuno Lahataꞌala ne andoa maitu.”