Matius 15 - Muna Southern Dialect

Pahintano Lahataꞌala bhe adhatino miendo Yahudi 15:1-20

¹ Pada anaꞌa dohatomo miendo Farisi bhe pande-pande Kitabi maiꞌaono we Yerusalem. Andoa domai ne Yesus bhe dofeena ambado,

² “Noafa gahaꞌa anaguhuꞌimu maitu dokangkalaꞌi adhatino awuaꞌintoomu, ingka tadohumaamo miina daewanua peda atorano agamantoomu?”

³ Tamaka Yesus tanotobhoosida ambano, “Noafa ingka hintimiu dua kangkalaꞌiomu pahintano Lahataꞌala maka fosibhalaomu adhatino awuaꞌimiu?

⁴ Kapaꞌamo Lahataꞌala nokowamba, ‘Fosibhalae inamu bhe amamu; mie meꞌawutino inano bhe amano tabeano damekamatee.’

⁵ Tamaka ambamiu peda aini: ane o mie nopugau ne inano bhe ne amano ‘Kanandooku so atumanggoꞌao hintimiu, nembalimo kapopanga so Lahataꞌala’,

⁶ maka mie aitu paemo naoafaa ane paemo namosibhala inano bhe amano. Peda kaowu anaꞌa ingka pisakieꞌomu bhoasaono Lahataꞌala maka fosibhala adhatimiu wutomiu.

⁷ Mie mehaaꞌulano! Nokotuꞌumo nekosuahaꞌaono anabii Yesaya nopulaoꞌao hintimiu,

⁸ ‘Mie andoa ini dosombai kanau kaowu ne wiwindo, tamaka totono lalondo nokodoꞌo bhe Idi.

⁹ Miina nakoꞌuluꞌa dosombai kanau, kapaꞌamo kafoinaꞌu nefoguhuꞌaondo pahintano manusia.’ ”

¹⁰ Pada anaꞌa Yesus nosaliꞌi mie bhahi maitu maka nofohatoda ambano,

¹¹ “Fetingke bhe tandaiꞌeomu! Suano mesuaꞌano ne wobhano manusia fofekaharamuno, tamaka lumimbaꞌano ne wobhano aituꞌaemo fofekaharamuno.”

¹² Kaowu domaiꞌiemo anaguhuꞌino maka dofeena ambado, “Pandeꞌaane bhahaa wambamu saꞌituinia noleaꞌane lalondo miendo Farisi?”

¹³ Yesus tanotobhoosida ambano, “Kotika kantisa tapa netisano Amaku te surugaa, tetewei damadae dabunatie.

¹⁴ Koemo heruandaomua. Andoa itu kabunto metondano dua kabunto. Ane kabunto netonda kabunto, kohoduando tetewei daondawu weo ola.”

¹⁵ Nopugaumo Petrus, ambano, “Fohato kainsamie maꞌanano kapalenda saꞌituini.”

¹⁶ Ambano Yesus, “Gahaꞌa miina dua lumosangieꞌomua?

¹⁷ Miina mandeꞌaaneomua gahaꞌa sabhaha mesuaꞌano ne wobhano manusia nosampu we handa maka doꞌohoe ne dhamba?

¹⁸ Tamaka lumimbaꞌano ne wobha nomaiꞌao we totono lalo, aituꞌaemo fofekaharamuno.

¹⁹ Kapaꞌamo nomaiꞌao we totono lalo nolimba sabhaha fekihi modai, dofopongko, domonsule, dopokawite-wite, dosibu, degau-gau bhe dofoꞌumbu.

²⁰ Medandomo naꞌa fofekaharamuno. Tamaka dohumaaꞌao lima pata nefewaniu, miina nafofekaharamua.”

Seemie hobhine miendo Kanaan noparasaea 15:21-28

²¹ Pada peda naꞌa Yesus nokalamo, nogampi we kadieno Tirus bhe Sidon.

²² Ne itu nomaimo hobhine miendo Kanaan ⸤ suano miendo Yahudi⸥ meateno ne itu bhe nokei ambano, “Mobhela kanau lalo, Ompu sampuꞌano Daud, anaku hobhine nopesuakie seetani nokadee-deemo sepaliꞌa.”

²³ Tamaka Yesus miina sepaliꞌa natumobhoosia. Dadiꞌanomo domaimo anaguhuꞌino desalo ambado, “Tuduemo nakumala, ingka nofoangkafi kansuhu bhe nopokakei-kei.”

²⁴ Ambano Yesus, “Idi ini dotudu kanau aꞌumondofi kaowu umatino Israel kolilinono, andoa maitu tapedaꞌidamo dhumba miinaeꞌano.”

²⁵ Tamaka hobhine anaꞌa nomaꞌotie, notaohao sombano ne Yesus bhe nopugau, “Waompu, tulumi kanau.”

²⁶ Yesus tanotobhoosi ambano, “Ingka pae namantasia daeala rotindo anaꞌi maka daꞌumohoane daꞌu.”

²⁷ Ambano dua hobhine aitu, “Anoamo naꞌa Waompu, ampamo kaowu daꞌu ⸤ peda insaodi ini⸥ nohumaa dua kapondawu maiꞌaono ne medhano ompuno.”

²⁸ Yesus notobhoosi ambano, “Waꞌina, nobhala mpuu kaparasaeamu, dadiꞌanomo nokadhadhiaꞌo toha peda kapoindalomu itu.” Gahaꞌa anano lasao dua noꞌosa.

Dobhahi mie mosakino nefekaꞌosano Yesus 15:29-31

²⁹ Nohunsa kaowu kadie aitu, Yesus nosohakimo wiwino teꞌino Galilea maka nofoni nengkoha-ngkoha te kabhawo.

³⁰ Gahaꞌa mie bhahi dosipumpumo toha domaiꞌie bhe deowaꞌiane mie kalu, kakempa, kabunto, bhea bhe nobhahi dua mosakino sigaoꞌano. Andoa maitu doowada ne wiseno Yesus maka kosasawindo nofekaꞌosada.

³¹ Mie bhahi maitu tadomente dowoha bhea nopugau, kakempa noꞌosa, kalu nekala-kala, bhe kabunto nofowoha. Dadiꞌanomo kosasawindo dopudhimo Lahataꞌalando miendo Israel.

Yesus nepakande mie dofato hewu 15:32-39

³² Yesus nosaliꞌimo anaguhuꞌino maka nopugau ambano, “Nobhelaanda laloku mie bhahi inia. Tolu oleomo dopobhai kanau bhe miinamo dakoꞌotia. Akiido dasumuliꞌao kulino handado bhahaa dokamposola we sala.”

³³ Ambado anaguhuꞌino, “Nada amai daeꞌawa roti ne kalino aini so damakandeꞌao mie bhahi peda aini ampa daoweꞌi?”

³⁴ Ambano Yesus, “Fee onu gahaꞌa rotimiua?” Ambado, “Fitu onu bhe nandoo dua kakenta-kenta mohobu.”

³⁵ Pada nofeena, Yesus notudumo mie bhahi maitu dengkoha ne wite.

³⁶ Pada anaꞌa noalamo roti fitu onuno naꞌa bhe kakenta-kentano, nefoampe katumpuno lalo ne Lahataꞌala, nobhebhehae maka nowaꞌandae anaguhuꞌino dodawu-dawuandae mie bhahi.

³⁷ Kosasawindo naꞌa dohumaa ampa doweꞌi. Pada dohumaa kabhilaꞌando dofoꞌonue nopono fitu kalangka.

³⁸ Mie momaano, moꞌane kaowu dofato hewu miina datilentua hobhine bhe anaꞌi.

³⁹ Pada peda naꞌa Yesus notudumo mie bhahi maitu dasumuli. Anoa nosawi ne bhangka maka nopolimba we kadieno Magadan.