Matius 13 - Muna Southern Dialect

Kapalendano mie meꞌewino wine 13:1-23

¹ Ne oleo anaꞌa Yesus nolimba we simbalino lambu maka nokala nengkoha we wiwino teꞌi.

² Mie bhahi dopohato-hatomo toha dolibu-libue, sampe nosawimo ne bhangka maka nengkoha. Mie bhahi tadeehe-ehe te wite.

³ Nobhahi kafoinaꞌuno Yesus nepakeanda kapalenda. Ambano, “Nandoo seemie mekaampono nokala neꞌewi wine.

⁴ Tangasano neꞌewi, nandoo wine mondawuꞌano ne kaangkaꞌa. Gahaꞌa dohatomo kaꞌuhi lumola, dopadae dohumaaꞌe.

⁵ Nandoo dua mondawuꞌano ne kamoꞌali, witeno miina naokapaa. Wine aitu nopikitumbu mbaꞌinomo nonifi witeno.

⁶ Tamaka hato nopana oleo, tumbuno noleleumo maka nomate mbaꞌinomo pahakano miina nakumamaa.

⁷ Nandoo dua wine mondawuꞌano we wuntano kahoku kokihi. Kahoku aitu nodhulu kabhala, maka noꞌontiꞌi kantisa naꞌa ampa nomate.

⁸ Sigaoꞌano nondawu ne wite menowu, sampe nokobhake. Bhakeno nandoo moꞌono onu sewili, nandoo nomo fulu, nandoo dua tolu fulu onu.

⁹ Ane dokotingala beano dametingke.”

¹⁰ Pada aitu domaimo anaguhuꞌino, dofeenae ambado, “Noafa gahaꞌa ingka fofoinaꞌuꞌao mepake kapalenda?”

¹¹ Notobhoosimo Yesus ambano, “Hintimiu nowaꞌangkoomu kadawu Lahataꞌala pandeꞌaanemoomu rahasiano Kafopahintaꞌano, tamaka mie sigaoꞌano miina.

¹² Kapaꞌamo kokanandoono datumubhahiane ampa napontalabhi-labhi, tamaka tapa kokanandoono, o ae maka dua kanandoono damadae damalaꞌie.

¹³ Pedamo anaꞌa kaepakeꞌaku kapalenda ne andoa, hampano mahingga daꞌumondo paise dakoniwoha, mahingga dametingke paise dakonilosangi.

¹⁴ Aini noposahataamo bhe nekosuahaꞌaono anabii Yesaya peda aini, ‘Hintimiu safeti-fetingke tamaka pae melosangieomu, sawoha-woha tamaka pae konipandeꞌaoꞌomua.

¹⁵ Kapaꞌamo totono lalondo mie andoa ini nofekontumo, tingalando nopoꞌopimo, matando nopilomo. Kanandooꞌano peda anaꞌa keana dofowohaꞌao matando, keana dofofetingkeꞌao tingalando, keana dua dolosangiꞌao totono lalondo, bhaha sala dodoli se idi maka amekaꞌosada.’

¹⁶ Tamaka kakodawuamiu, matamiu nofowoha, tingalamiu nofofetingke.

¹⁷ Amohatokoomu, kotu-kotuꞌu dobhahi anabii bhe mie lumebe endefiꞌini, gaondo damoha newohamiu aitu, tamaka miina daohaea; gaondo dametingke nefetingkemiu aitu tamaka miina dametingkeea.

¹⁸ Dadiꞌanomo fetingkeomu maꞌanano kapalenda meꞌewino wine saꞌituini.

¹⁹ Kotika mie metingkeno bhoasao Kafopahintaꞌano Lahataꞌala tamaka miina nalumosangiea, nomaiꞌie Kafeompuꞌando seetani norampasi bhoasao kaneꞌo neꞌewi weo totono lalondo maitu. Aitumo maꞌanano wine mondawuꞌano ne kaangkaꞌa.

²⁰ Wine neꞌewi ne kamoꞌali, maꞌanano mie metingkeno bhoasaono Lahataꞌala, lasao dotahimae bhe doꞌiaꞌane.

²¹ Ampamo kaowu bhoasao aitu miina nakopahakaa weo totono lalondo sampe miina natumahaa. Sadeꞌawa kasabhano tawa kakadee-dee mbaꞌinomo doangkafi bhoasao maitu, lasao dohunsa kaparasaeando.

²² Wine mondawuꞌano weo kahoku kokihi, maꞌanano mie metingkeno bhoasaono Lahataꞌala, tamaka nobhahi dofekihi so kadadiꞌando bhe nobhohe-bhoheꞌida kahangkaeano dhunia. Kosasawiꞌae naꞌa nopesua weo totono lalondo noꞌontiꞌi bhoasaono Lahataꞌala sampe miina nakohasilia.

²³ Wine mondawuꞌano ne wite menowu, maꞌanano mie metingkeno bhoasaono Lahataꞌala bhe dolosangie. Dadiꞌanomo nokobhake, nandoo moꞌono lentuꞌa, nandoo nomo fulu lentuꞌa, nandoo dua tolu fulu lentuꞌa hasilino.”

Kapalendano dana ne wuntano gandum 13:24-30

²⁴ Yesus nefohatoandamo dua kapalenda sigaoꞌano. Ambano, “Kafopahintaꞌano Lahataꞌala tapedamo seemie meꞌewino wine metaa te kaampono.

²⁵ Gahaꞌa sealo, tangasano doodo mie, nomaimo kaewano lasao neꞌewiane dana ne olotano gandum naꞌa maka nokala.

²⁶ Hato notumbu bhe nokowunamo gandum naꞌa, notiwohamo dua dana saꞌituini.

²⁷ Bhatuano lasao domai ne kafeompuꞌando, ambado, ‘Waompu, ingka wine metaa neꞌewimu te kaampo, tamaka nomaiꞌao ne amai bhahaa dana tatua?’

²⁸ Ambano kafeompuꞌando, ‘Kahadhaano kaewa itua.’ Ambado dua bhatua naꞌa, ‘Bhahaa gaomu tabunatiemo dana maitu?’

²⁹ Tamaka ambano kafeompuꞌando, ‘Koise, kapaꞌamo ane bunatieꞌomu dana itu, kunanomo gandum natibunati dua.

³⁰ Hunsaꞌanomo kohaahondaꞌae daꞌumende ampa metobheꞌa. Nahumato metobheꞌa, amugaumo ne tumobheno, ‘Foꞌonuomu kadeki dana itu, obho-obhoeꞌomu maka tawueꞌomu. Mada aitu foꞌonuomu gandum weo lambu kaenteiꞌano otiku.’ ’ ”

Kapalendano onuno wonoita bhe ragi 13:31-35

³¹ Pada anaꞌa nefohatoandamo dua kapalenda sigaoꞌano, ambano, “Kafopahintaꞌano Lahataꞌala tapedamo dua onuno sau wonoita seꞌonu noalae seemie maka nohooꞌe te kaampono.

³² Onuno sau wonoita ini foliuno kahobu ne olotano sabhaha wine, tamaka ane notumbu kaowu, noꞌende noliuda sabhaha kantisa. Nembali puꞌuno sau bhalano, sampe kaꞌuhi lumola domai dofekaufe ne haꞌano” .

³³ Nosunsumiane dua kapalenda aini. “Kafopahintaꞌano Lahataꞌala tapedamo ragi nealano seemie hobhine mbali kaefoꞌendeꞌano roti. Ragi aini nokunsaloe bhe tariguno fato fulu baa ampa noꞌende kosasawiꞌae.”

³⁴ Yesus nofohatoanda kosasawiꞌae naꞌa ne mie bhahi, nepakeanda kapalenda. Anoa miina sepaliꞌa namoinaꞌuda ane miina naepalendaanda.

³⁵ Aini mbali nokoꞌulaꞌao bhoasaono Lahataꞌala nefosampeno anabii, “Abhoka wambaku aepalenda, amohatoanda tifebuniꞌano mpini pakatandano dhunia.”

Maꞌanano kapalendano dana ne olotano gandum 13:36-43

³⁶ Pada anaꞌa Yesus nohunsamo mie bhahi, nopesuamo weo lambu. Domaimo anaguhuꞌino maka ambado, “Fohato kainsami maꞌanano kapalendano dana te kaampo saꞌituini.”

³⁷ Notobhoosidamo ambano, “Mie meꞌewino wine metaa, maꞌanano Anano Manusia - Idimo ini.

³⁸ Kaampono, maꞌanano dhunia ini. Wine metaa, maꞌanano umatino Kafopahintaꞌano Lahataꞌala; dana nokomaꞌanaꞌao mie tumaino ne Kafeompuꞌando seetani.

³⁹ Kaewa meꞌewino dana, maꞌanano Kafeompuꞌando seetani. Tempono metobheꞌa nokomaꞌanaꞌao kafetompaino dhamani bhe tumobheno naꞌa o malaꞌekati.

⁴⁰ Peda dana dofoꞌonue maka dotawue ne efi, namedamo dua naꞌa nahumato kafetompaino dhamani.

⁴¹ Anano Manusia natumudu malaꞌekatino damoꞌonu sabhaha mie mekakodhosano manusia bhaindo bhe mie humabu modaino weo Kafopahintaꞌano.

⁴² Kosasawindo naꞌa daꞌumohofida weo efino narakaa; ne naꞌa taꞌo kangkoꞌae bhe kuꞌino wangka.

⁴³ Wakutuu anaꞌa mie mongkilo dakotilanga nada oleo weo Kafopahintaꞌano Amando. Ane dokotingala, beano dametingke!”

Kapalendano arataa tikantanono bhe muntia moꞌali 13:44-46

⁴⁴ “Kafopahintaꞌano Lahataꞌala tapedamo dua arataa tikantanono te kaampo. Gahaꞌa nandoo seemie umawae, maka suli nokantanoe. Kaꞌosano kaꞌiano nokalamo noasopi kosasawiꞌae kanandoono maka noꞌoli kaampo anaꞌa.

⁴⁵ Pedamo dua anaꞌa, Kafopahintaꞌano Lahataꞌala peda seemie daga meꞌondofino muntia mokesa.

⁴⁶ Nopoꞌawaꞌao kaowu muntia foliuno kakesa bhe kaꞌali, nokalamo noasopi kosasawiꞌae kahangkaeano maka nosuli noꞌoli muntia naꞌa.”

Kapalendano puka 13:47-52

⁴⁷ “Kafopahintaꞌano Lahataꞌala tapedamo dua puka nelabu we teꞌi, notikaiane sabhaha kenta.

⁴⁸ Kentano notahusu, domaimo mie dohelae te kaꞌotiꞌa maka dengkoha dofepili kenta naꞌa. Metaaꞌano doteiꞌe weo kaenteiꞌa, tapa metaaꞌano doꞌohofie.

⁴⁹ Namedamo anaꞌa nahumato kafetompaino dhamani; malaꞌekati damai dapogaatiꞌao mie modai bhe mie metaa.

⁵⁰ Mie modai daꞌumohofida weo efino narakaa, ne naꞌa taꞌo kangkoꞌae bhe kuꞌino wangka.”

⁵¹ Nofeenamo Yesus ambano, “Losangieꞌomu bhahaa kosasawiꞌae ini?” Anaguhuꞌino dotobhoosi ambado, “Uumbe.”

⁵² Ambano toha Yesus, “Dadiꞌanomo kotika pande Kitabi metahimano kafoinaꞌuno Kafopahintaꞌano Lahataꞌala, tapedamo kolambuno molimbano kahangkaeano maiꞌao ne kaenteiꞌano, nabuꞌou nangkodau.”

Yesus dobansie we Nasaret 13:53-58

⁵³ Nopalusi nofohatoanda sabhaha kapalenda naꞌa, Yesus nokalamo.

⁵⁴ Sahatono we liwu kamaiꞌaoꞌano, nofofoinaꞌumo weo lambu kasambaheaꞌa. O mie tadomente bhe dopugau ambado, “Nomaiane ne amai bhahaa sabhaha kapande bhe kuasano nehabu giu timenteꞌaono maitu?

⁵⁵ Ingka anoa ini anano tuka. Inano ingka Maria bhe bhahitieꞌino ndo Yakobus, Yusuf, Simon bhe Yudas.

⁵⁶ Ingka bhahitieꞌino hobhine deate dua bhe intaodiomu. Kaowu ne amai noalae sabhaha kapande bhe kuasano maitu?”

⁵⁷ Mie andoa naꞌa nondidiki lalondo sampe dokiidoemo. Gahaꞌa nopugaumo Yesus ne andoa maitu ambano, “Seemie anabii dofosibhalae ne amai liwu. Ampamo kaowu ne liwu kamaiꞌaoꞌano bhe ne lambuno wutono miina damosibhalaea.”

⁵⁸ Dadiꞌanomo Yesus miina nabhahia nehabu giu timenteꞌaono ne itu, mbaꞌinomo miina damarasaeaꞌa.