Matius 11 - Muna Southern Dialect

¹ Nopalusi nofohato anaguhuꞌino ompulu hoduano naꞌa, Yesus nohunsamo liwu aitu maka nokala nofofoinaꞌu bhe nefolele Bhihita Metaa ne liwu-liwu momaꞌoꞌano ne itu.

Yesus bhe Yohanes Fokadiuno 11:2-19

² Weo katohongku Yohanes nofetingke dua nehabuno Kristus.

³ Dadiꞌanomo notudu anaguhuꞌino dameena ne Yesus ambado, “Hintumo bhahaa so humatono peda nedhandiꞌaono Lahataꞌala itu, kaa taeantagi dua mie sigaoꞌano?”

⁴ Yesus notobhoosida ambano, “Sulimoomu, fohatoaneomu Yohanes o ae nefetingkemiu bhe newohamiu.

⁵ Kabunto suli dofowoha, mie kalu dekala-kala, kokuli modaino donggela, kapongke dofofetingke, mie mate suli dodadi bhe mie ngkumaasi-asi defebhihitaianda Bhihita Metaa.

⁶ Dokodawua mpuu mie tapa mongaheꞌi kanau hampano kandidikino lalo.”

⁷ Dokundo kaowu anaguhuꞌino Yohanes, Yesus nopugaumo ne mie bhahi, nopulaoꞌao Yohanes ambano, “Kala meꞌondoomu ae gahaꞌa we pandaso bhalano endefiꞌini? Meꞌondoomu wulu neangko-angkono kawea bhahaa?

⁸ Bhahaa kala meꞌondoomu ae we pandaso bhalano? Meꞌondoomu mie kopakea alusuno? Ingka mie kopakea alusuno deate weo kamali.

⁹ Kaowu kala meꞌondoomu ae we pandaso bhalano? Meꞌondoomu seemie anabii? Ingka anoamo, bhahamoa noliuꞌe anoa bhe seemie anabii.

¹⁰ Kapaꞌamo Yohanes ini nepulaoꞌaono wambano Kitabi peda aini, ⸤ Ambano Lahataꞌala⸥ ‘Anoamo ini katuduku, atudue namaꞌinduluangko, naebhongkaangko kaangkaꞌa te wisemu.’

¹¹ Amohatokoomu, kotu-kotuꞌu ne olotando manusia lumenteno ne dhunia ini miina bhe moliuno Yohanes Fokadiuno; tamaka foliuno kahobu weo Kafopahintaꞌano Lahataꞌala nofoliuꞌe kabhala.

¹² Notanda Yohanes notiumba taꞌampa aitu, Kafopahintaꞌano Lahataꞌala doewangie, mewangie naꞌa dokopatudhu dasumaohi bukue.

¹³ Kapaꞌamo kosasawindo anabii bhe Kitabino Musa dofofohatoanemo so kumadhadhiaꞌano ampa katiumbaꞌano Yohanes.

¹⁴ Maka ane tumahimaeꞌomu, Yohanesmo ini anabii Elia so humatono itu.

¹⁵ Ane dokotingala, beano dametingke!

¹⁶ Apototoane bhe ae bhahaa mie ne dhamani aini? Andoa tapedamo kaana-anaꞌi we daoa, dopoloꞌo-loꞌoi bhe sabhangkaꞌindo, ambado,

¹⁷ ‘Ingka taetempaangkoomu ganda, tamaka miina lumindaomu; taelagu-laguangkoomu kapea, ingka miina moguguhuomua.’

¹⁸ Kapaꞌamo Yohanes nohato, miina naomaaꞌa miina naohoꞌua, ambado mie, ‘Anoa maitu nopesuakie seetani.’

¹⁹ Pada anaꞌa Anano Manusia - Idimo ini - nohato nohumaa nofohoꞌu, ambado mie, ‘Soba ondoomu, mie kumadau-dau bhe pande fohoꞌu, sabhangkando mealaꞌino sewa bhe mie kodhosa.’ Tamaka kakotimbangino Lahataꞌala notipandeꞌao kakotuꞌuno ne hasilino.”

Liwu-liwu tapa marasaeano 11:20-24

²⁰ Pada aitu Yesus nofeꞌalamo liwu-liwu kaehabuꞌano tanda tapa mentela, kapaꞌamo miina dametompaꞌao dhosando bhe dadumoli ne Lahataꞌala mahinggamo ne itu foliuꞌanomo kabhahi tanda nehabuno.

²¹ Ambano, “Balaamo hintu liwuno Korasim! Balaamo dua hintu liwuno Betsaida! Ane endefiꞌini we kotano Tirus bhe Sidon nakumadhadhia tanda-tanda tapa mentela newohamiu ini, tetewei nomponamo dadumoli ne Lahataꞌala, daepake bhida bhe daetei abu te fotundo ⸤ peda katandaino dososoꞌao dhosando⸥ .

²² Tamaka amohatokoomu, nahumato Oleono Kiama, naosape kahukumuno miendo Tirus bhe Sidon bhe kahukumu so neꞌawamiu.

²³ Hintu liwuno Kapernaum, kunaꞌemu dasumangkeko te lani? Paise, hintu daꞌumohoko we narakaa, kapaꞌamo ane endefiꞌini we Sodom nakumadhadhia tanda-tanda tapa mentela newohamiu ini, tetewei liwu aitu nandumandooꞌe ampa seꞌoleo itu.

²⁴ Tamaka amohatokoomu, nahumato Oleono Kiama, naosape kahukumuno miendo Sodom bhe kahukumu so neꞌawamiu.”

Kasaliꞌino Omputo Fosalamatino 11:25-30

²⁵ Wakutuu anaꞌa Yesus nosambaheamo ambano, “Notumpu laloku, Ama, Ompuno lani bhe dhunia, kapaꞌamo kosasawiꞌae ini febunie ne mie kotimbangi bhe mie mande, tamaka fotiwohae ne mie mepandano kaengkohaꞌa pata kokasikolano.

²⁶ Daanumo Ama, pedamo aitu kaposahasiꞌanomo lalomu.

²⁷ Kosasawiꞌae padamo nowaꞌa kanaꞌe Amaku. Miina bhe mandeꞌaono Anano Lahataꞌala mpahinomo Amano. Miina dua bhe mandeꞌaono Amano mpahinomo Anano, bhe kosasawindo mie neꞌundaꞌaono Anano Lahataꞌala damandeꞌao Amano.

²⁸ Maiꞌomu ne idi, hintimiu mowuleno bhe kowowoꞌo mobhieno, maka amaꞌangkoomu kalalesano lalo.

²⁹ Tongkuomu wowoꞌoku ⸤ maꞌanano angkafi pahintaku⸥ bhe poguhuomu ne Idi, kapaꞌamo Idi ini netaa laloku bhe afekapanda Wutoku. Tetewei meꞌawaomu kalalesano lalo.

³⁰ Kapaꞌamo pahinta newaꞌaoku nomuda, wowoꞌo nefotongkuꞌaoku nosape.”