Matius 10 - Muna Southern Dialect

Yesus nebhasi anaguhuꞌi doompulu hodua 10:1-4

¹ Yesus nebhasi anaguhuꞌino doompulu hodua maka nowaꞌanda kuasa daefolimba seetani, daefekasali sabhaha saki bhe kadaino namisi.

² Pedamo aini neando rasulu ompulu hoduano naꞌa. Kabhao-bhaono Simon nekonando Petrus bhe Andreas kakutaꞌano. Pada anaꞌa Yakobus anano Zebedeus bhe Yohanes kakutaꞌano.

³ Maka Filipus bhe Bartolomeus, Tomas bhe Matius mealano sewa, Yakobus anano Alfeus bhe Tadeus.

⁴ Simon miendo Zelot bhe Yudas Iskariot. Anoamo ini mowano Yesus ne limano kaewando.

Takando rasuluꞌi ompulu hoduano 10:5-15

⁵ Yesus notudumo anaguhuno ompulu hoduano naꞌa dakumala bhe nofohatoda ambano, “Koise angkafiomu kampuna humopeꞌano we liwundo mie suano Yahudi tawa mesuaꞌano weo kotando miendo Samaria.

⁶ Tamaka kalaomu ne umatino Israel kolilinono tapedamo dhumba.

⁷ Kalaomu bhe foleleomu, ‘Kafopahintaꞌano Lahataꞌala nomaꞌomo.’

⁸ Fekaꞌosadaomu mie mosaki, fowanudaomu mie mate, fekaꞌuhidaomo mie kokuli modaino, folimbadaomu seetani. Kosasawiꞌae ini awaeꞌomu miina umolieꞌomua, dadiꞌanomo tafowaꞌaomoomu dua.

⁹ Koise mewowoꞌoomu bulawa, tawa salaka bhahaꞌi dhoi tambaga ne kawawemiu.

¹⁰ Koise dua mewowoꞌoomu bhaku so we laano sala, koise mewowoꞌoomu bhadhu nahaa tuwu, koise mepakeomu kaampini tawa katuko, kapaꞌamo mie kumahadhaa nopantasi naꞌumawa ponambono.

¹¹ Ane mesuaꞌomu ne kota tawa ne liwu, meꞌondoomu mie mantasino so kabutuꞌamiu, meate-ateomu ne itu ampa kumalaomu toha.

¹² Ane mesuaꞌomu ne lambudo mie feabhadaomu putae, ‘Kabarakatino Ompu so polambu aini.’

¹³ Ane damantasi, kabarakatino kafeabhamiu naeatemo ne andoa. Tamaka ane paise, kabarakatino nasumuli ne wutomiu.

¹⁴ Ane nandumandoo mie tapa tumahimakoomu tawa dokiido dametingkekoomu, limba bhe hunsaomu lambu tawa kota aitu; tantaeꞌomu bhe bungahasino aꞌemiu.

¹⁵ Amohatokoomu kotu-kotuꞌu, nahumato Oleono Kiama kahukumu neꞌawano witeno Sodom bhe Gomora nandoo naosape ane dapototoane bhe so neꞌawano liwu aitu.”

Kakadee-dee so netompaloi 10:16-33

¹⁶ “Tandaiꞌeomu! Atumudukoomu kumalaomu nada dhumba monaleno damesua ne wunta-wuntando daꞌu ngkahoku. Dadiꞌanomo tabeano mengkowaweomu nada ule bhe naelaa lalomiu nada dhaadhaha.

¹⁷ Ampamo kaowu kodhagaomu ne mie, kapaꞌamo dahumakokoomu bhe damowakoomu ne Sahano Agama. Dahumambisiangkoomu habuta weo lambu kasambaheaꞌando.

¹⁸ Hintimiu datumondakoomu ne wiseno kabhalano liwu bhe kafeompuꞌa mbaꞌinomo kaparasaeamiu ne Idi. Aini somo katolalamiu membaliomu sakusiiku ne andoa bhe mie tapaꞌo mandeꞌaono Lahataꞌala.

¹⁹ Ane damowakoomu ne fobhitahakino, koe nekenda-kenda handamiu nada amai tawa o ae so pugaumiu. Kapaꞌamo so pugaumiu itu damaꞌangkoeꞌomu wakutuu aitu dua.

²⁰ Suanomo hintimiu so mugauno, tamaka Rohino Amamiu te surugaa so kosuahano namangka ne hintimiu.

²¹ O mie damowa kakutando ne kokuasano damongkoeꞌao, pedamo dua o ama damowa anando damongkoeꞌao.

²² Hintimiu ini dabansikoomu sabhaha mie mbaꞌinomo neaku. Tamaka so kosabahano napotaami ampa namalusi, damosalamatida.

²³ Ane damodee-deekoomu ne seꞌonu liwu, fileiꞌomu ne liwu sigaoꞌano. Amohatokoomu, kotu-kotuꞌu paeꞌo madaeꞌomu liwu-liwuno Israel mangkaiꞌeomua, Anano Manusia - Idimo ini - nahumatomo.

²⁴ Seemie anaguhu pae nalumiu guruno, tawa seemie bhatua pae nalumalo kafeompuꞌanoa.

²⁵ Naetaamo seemie anaguhu napototo bhe guruno, bhe seemie bhatua napototo bhe kafeompuꞌano. Ane kolambuno dakumonaemo Beelsebul ⸤ maꞌanano Kafeompuꞌando seetani⸥ , bhemo toha mie weo lambuno; ingka dawambakianda sabhaha modaiꞌano.

²⁶ Dadiꞌanomo koe moteꞌiomua; kapaꞌamo kosasawiꞌae tifebuniꞌano damotiumbae; sabhaha rahasia damekantaleaꞌie.

²⁷ O ae nepugauꞌaoku weo kahohondo, pugauaneomu ne mentaleaꞌano. O ae nekamuntui ne tingalamiu, foniomu te melangkeꞌano maka foleleomu ne mie bhahi.

²⁸ Koise moteꞌiomu ne mie mepongkono mbadha tamaka miina dakokuasa daepongko alusu. Ampamo kaowu moteꞌiomu ne Anoa kokuasano fofobinasano naetaa alusu naetaa mbadha weo narakaa.

²⁹ Ingka dopandeꞌaanemo o rone doasoe haa ulu sedhoi. Tamaka bhe naseꞌulu miina bhe mondawuꞌano we wite ane pae namoindalo Amamu te surugaa.

³⁰ Hintimiu itu bhemo wuluno fotumiu dopadae doꞌeapie.

³¹ Dadiꞌanomo koise moteꞌiomua, noliuꞌe hintimiu itu bhe kawaindo rone.

³² Laꞌae mangakuno ne wisendo manusia putae anoa noangkafi Idi, aꞌumakuiꞌe dua te wiseno Amaku te surugaa.

³³ Tamaka laꞌae gumagano ne wiseno manusia putae anoa miina namangkafi Idi, agumagaiꞌe dua ne wiseno Amaku te surugaa.

Yesus neowa powengke-wengkeꞌa 10:34—11:1

³⁴ Koise kofekihiomu hatoku ini aeowa pometaa te dhunia. Ahato miina aeowa pometaa, tamaka o kampue ⸤ maꞌanano powengke-wengkeꞌa⸥ .

³⁵ Kapaꞌamo maiku ini aepogaatiꞌao amano bhe anano, anaꞌi hobhine bhe inano, seemie hobhine bhe ponia hobhineno.

³⁶ Tangkanomo kaewando mie sanea mie weo lambu.

³⁷ Laꞌae so moasiꞌaono inano bhe amano nalumiuꞌe kaasino ne Idi, pae namantasia namangkafi kanau. Laꞌae moasiꞌaono anano moꞌane tawa hobhine nalumiuꞌe kaasino ne Idi pae namantasia namangkafi kanau.

³⁸ Laꞌae so pata tumongkuno sau salipuno maka namangkafi kanau, pae namantasia so Idi.

³⁹ Laꞌae so potaamiꞌano inawano, namiinae inawano. Tamaka laꞌae miinaeno inawa mbaꞌinomo noangkafi Idi, tetewei namehapi dadi mpuuno.

⁴⁰ Laꞌae tumahimakoomu, notahimamo dua Idi; maka laꞌae tumahimano Idi, notahimamo Anoa tumudu kanau.

⁴¹ Laꞌae metahimano seemie anabii weo lambuno mbaꞌinomo mie aitu o anabii, naeꞌawa ponambono anabii; laꞌae metahimano mie banara mbaꞌinomo mie aitu nobanara, naetahima ponambono mie banara.

⁴² Laꞌae fowaꞌaono oe kafohoꞌu mahingga nasekampohoꞌuꞌa kaowu so mie mepandano kaengkohaꞌa ini mbaꞌinomo mie aitu anaguhuku, kotu-kotuꞌu pae namiinaea ponambonoa.”