Markus 9 - Muna Southern Dialect

¹ Ambano toha, “Amohatokoomu, kotu-kotuꞌu ne olotamiu ini nandoo so pataꞌo mateno, ane pae kadeki daoha Kafopahintaꞌano Lahataꞌala nahumato bhe kuasano.”

Anaguhuꞌino dowoha kakalabhiano Yesus te kabhawo 9:2-13

² Nopalusi nomo oleo, Yesus noowamo Petrus, Yakobus bhe Yohanes dofoni te kabhawo melangkeꞌano. Ne itu domoisa kaowu. Gahaꞌa Yesus notibhaliimo wohaꞌano ne wisendo.

³ Pakeano nopupute sepaliꞌa bhe nokosilo. Pae nandumandooa bhe naseemie te dhunia ini so mandeno metofano ampa naopute peda amaitu.

⁴ Pada aitu tadowohamo dua anabii Elia bhe anabii Musa dopuga-pugau bhe Yesus.

⁵ Nopugaumo Petrus ne Yesus ambano, “Guru, ingka netaa domaiꞌomu ne ini. Naetaamo taefongkoha bhantea natolu onu, seꞌonu so Hintu, seꞌonu so anabii Musa bhe seꞌonunoa so anabii Elia.”

⁶ Kapugauꞌano peda maitu, mbaꞌinomo miina namandeꞌaane bhahaꞌi napugauꞌao ae, kaꞌosano kateꞌindo.

⁷ Gahaꞌa nokaolumidamo olu, maka nomaiꞌao weo olu maitu notifetingkemo suaha ambano, “Ainiꞌaemo anaku nemoasiꞌaoku. Fetingkeeꞌomu pugauno.”

⁸ Setolindaꞌa, dofolili matando miinamo dakoniwohaa, tamo Yesus nomoisa.

⁹ Wakutuuno dosampu maiꞌao te kabhawo Yesus nofohatodamo ambano, “Koise mekapunaomu ne mie sigaoꞌano newohamiu saꞌituini. Sembali Anano Manusia - Idimo ini - namanumo namaiꞌao ne mate maka naembali mekapunaomu ne mie sigaoꞌano.”

¹⁰ Andoa doangkafie pugauno, tamaka tadopofee-feenamo ambado, “O ae bhahaa maꞌanano namanu maiꞌao ne mate?”

¹¹ Pada anaꞌa dofeenamo ne Yesus ambado, “Noafa gahaꞌa ambado pande-pande Kitabi, anabii Elia so maino wawo?”

¹² Notobhoosimo Yesus, “Uumbe daanumo, Elia so maino wawo, namosintuwuꞌao sabhaha giu. Ampamo kaowu nada amai Anano Manusia, Idi ini? Ingka weo Kitabino anabii notibuhi nabhahi naenamisi kakadee-dee, pae dakumonaꞌie mie.

¹³ Tamaka amohatokoomu, sakotuꞌuno Elia padamo nomai, tamaka mie bhahi miina dakumonaꞌie mie, dohabue ampa kapoindalondo. Nopobutu peda tibuhino weo Kitabino anabii.”

Yesus nefekaꞌosa anaꞌi nepesuakino seetani 9:14-29

¹⁴ Yesus bhe anaguhuꞌino totoluno maitu dosulimo toha we anaguhuꞌino sigaoꞌano, gahaꞌa dowohadamo nandoo dolibu-libuda mie bhahi. Nandoo dua pande-pande Kitabi tangasano dopotaga-tagali bhe andoa.

¹⁵ Nelaa dowoha Yesus, mie bhahi naꞌa domente, lasao dotende dosumpuiꞌe.

¹⁶ Yesus nofeenadamo, “O ae gahaꞌa nepotaga-tagaliꞌaomiu bhe pande-pande Kitabi maitu?”

¹⁷ Notobhoosimo seemie ne olotando mie bhahi maitu ambano, “Guru, aowaangko anaku ini. Miinamo namandea nopugau mbaꞌinomo nopesuakie seetani.

¹⁸ Taenomo nohatoe seetani maitu, lasao notihambitao ne wite; nokida koseꞌulu-uluno, wobhano tanokobuha-buhamo, nokuꞌi bhe wangkano. Padamo dua aesalo ne anaguhuꞌimu damolimbaeꞌao, tamaka miina damooliea.”

¹⁹ Maka Yesus nopugaumo ambano, “Pahasili hintimiu ini, mie pata marasaeano! Tana seꞌae gahaꞌa beano so kaomponano aeate bhe hintimiu? Tana seꞌae gahaꞌa so sabahaku? Owaeꞌomu se ini anaꞌi itu.”

²⁰ Anaꞌi amaitu doowaemo se Yesus. Sanowoha Yesus, seetani naꞌa kansuhu nogegohao anaꞌi maitu sampe notihambitao ne wite. Newalo-walole, nokobuha-buhamo bhe wobhano.

²¹ Yesus nofeenamo amano anaꞌi maitu, “Seꞌaemo kaomponano nopeda aini?” Notobhoosi amano, “Notanda mpini kahobuno.

²² Nentelamo dua seetani maitu nodhudhulaane weo efi bhahaꞌi weo oe, patudhuno namobinasae. Tamaka ane moolie, tulumi kainsami, mobhela kainsami lalo.”

²³ Notobhoosi Yesus, “Noafa gahaꞌa pugauꞌao, ‘Ane moolie’? Sumanomo doparasaea, o ae maka dua tetewei dopoolie!”

²⁴ Amano anaꞌi naꞌa lasao nokei, “Aparasaea Ompu! Tamaka tulumi kanau weo kakaeno kaparasaeaku ini!”

²⁵ Yesus nowohamo mie dodhulu kabhahi dolibuda, maka noꞌamahaki seetani maitu ambano, “Hintu seetani! Mefobhohe bhe mefopongke mie! Atuduko limbaꞌo toha maiꞌao ne anaꞌi aini, maka koemo suli-sulikiea!”

²⁶ Anaꞌi naꞌa nogegohaane toha seetani aitu, lasao nolimba bhe nopokakei-kei. Anaꞌi naꞌa wohaꞌano tapedamo mie mate, sampe ambado mie bhahi, “Ingka nomatemo.”

²⁷ Tamaka Yesus nointaha limano anaꞌi naꞌa maka nofowanue, lasao noeheꞌao wutono.

²⁸ Dohato kaowu se lambu, Yesus bhe anaguhuꞌino tadomoisa, dofeenamo ne Yesus ambado, “Noafa gahaꞌa ingka insaodi miina tamooliea tafolimba seetani saꞌituinia?”

²⁹ Notobhoosi ambano, “Seetani medano saꞌituini miina natifolimba, simbali dosambaheaꞌane.”

Yesus nopugauꞌao toha so kamateꞌano 9:30-32

³⁰ Domaiꞌao ne itu Yesus bhe anaguhuꞌino dokalamo toha doangka we kadieno Galilea. Anoa nongahe damandeꞌaane kakalaꞌano,

³¹ mbaꞌinomo nandoo nofoinaꞌu anaguhuꞌino. Ambano, “Anano Manusia - Idimo ini - damowae ne limando mie kokuasano, maka damongkoe. Tamaka ne katolu oleono nadumadimo toha.”

³² Anaguhuꞌino miina dalumosangiea pugauno, tamaka doteꞌi dameenae.

Laꞌae foliuno kabhala? 9:33-37

³³ Pada anaꞌa dohatomo toha we Kapernaum. Dopesua kaowu weo lambu, Yesus nofeenamo ne anaguhuꞌino, “Puga-pugauꞌaoꞌomu ae gahaꞌa we sala saꞌituinia?”

³⁴ Tamaka miina dakodiua mbaꞌinomo saꞌituini we sala dopotaga-tagaliꞌao laꞌae foliuno kabhala ne olotando andoa maitu.

³⁵ Nengkoha kaowu, nosaliꞌidamo koompulu hoduando anaguhuꞌino, maka nofohatoda ambano, “Dopoindalo dembali so neangka tabeano dombuhumai, doꞌondofao kadeki kafaraluundo mie bhaindo.”

³⁶ Pada anaꞌa, Yesus netondamo seemie anaꞌi kahobu, nofoehe-ehee ne wisendo maka nokakopue bhe nopugau,

³⁷ “Dotahima kaowu anaꞌi medando aini weo neaku, dotahimamo Idi. Dotahima Idi, suano kaowu o Idi, tamaka dotahima dua Tumudu kanau.”

Laꞌae pata foewangino, o sabhangka 9:38-41

³⁸ Nopugaumo Yohanes ne Yesus, “Guru, tawoha seemie nefolimba seetani nopake neamu, lasao taꞌeleꞌaane hampano suano mie mangkafino intaodiomu ini.”

³⁹ Tamaka Yesus notobhoosi, “Koise eleꞌaaneomua, hampano pae bhe so mehabuno giu timenteꞌaono namake neaku, lasao dua naꞌumumbu kanau.

⁴⁰ Ane miina dafoewangi, ingka o sabhangkamo.

⁴¹ Amohatokoomu inia, kotu-kotuꞌu o mie maꞌangkoomu oe kafohoꞌu mbaꞌinomo hintimiu anaguhuꞌino Mesias, Omputo Fosalamatino, tetewei naetaa dawuano.”

Sabhaha giu nekodhosaꞌao 9:42-50

⁴² “Ane nandoo mie mefekakolilinono totono lalono anaꞌi kahobu medando ini, sampe miinamo namarasaea ne Idi, selabhiꞌaku dakumantaiane kagili kontu ne wuꞌuno maka damotondue we teꞌi.

⁴³ Ane ibahano limamu naehabuangko dhosa, totoe; naetaa mesua surugaa nasembali kaowu limamu bhe mesua narakaa kohaambaliꞌae limamu, weo efi pata tipeonino.

⁴⁴ [Ne watu o kaꞌule-ule miina bhe kamatea, efino miina bhe kapeoa.]

⁴⁵ Ane ibahano aꞌemu naehabuangko dhosa, totoe; hampano naetaa mesua surugaa weo kakempamu bhe daꞌumohoko weo narakaa kohaambaliꞌae aꞌemu.

⁴⁶ [Ne watu o kaꞌule-ule miina bhe kamatea, efino miina bhe kapeoa.]

⁴⁷ Ane ibahano matamu naehabuangko dhosa, sungkie; hampano naetaa mesua weo Kafopahintaꞌano Lahataꞌala nasembali matamu bhe daꞌumohoko weo narakaa kohaambaliꞌae matamu.

⁴⁸ Ne watu o kaꞌule-ule miina bhe kamatea, efino miina bhe kapeoa.

⁴⁹ Kapaꞌamo seemie-seemie damekangkiloanda kakadee-dee, peda adhono kapopanga so Lahataꞌala dofewaniuane gaha.

⁵⁰ O gaha daanumo netaa, tamaka ane nasimotembeꞌa, kiha-kiha damekakahaane dua ae? Dadiꞌanomo, tabeano membaliomu peda gaha, pometa-metaaꞌomu.”